१ कोरेन्ठि 10 - लोहोरुङ्मुर्टि आचुङ्मॆ खानावाँ चिन्मिम्पा 1 बुबुनानुसाचि, मोसा टिङ्खुबा कानिम् टुबालाबाचि माङ् लिमिम्पा लॆटामिहा लोमॆ कॆ आन्ना मिॽलामिॽमा मिट्टानि। आक्खाचि चोब्न मिस्र हाङ्टेम्बाङ् आम्पक्मार खिन्डुमाऎ लाम्फु खाङ्मिसे लाखॆटुचि हाङ् पॆरॆरॆमाबाङ्स नुःरन चिखॆटुचि। 2 हाङ् आक्क खिन्दुमाऎ लाम्फु खाङ्मिॽमिम्पा खानावाँ हाङ् पॆरॆरॆमाबाङ् खॆॽमिम्पा खानावाँ खोचिऎ मोसा नुङ् बाप्टिस्मा लामिम्पा रक्न लिसा। 3 हाङ् खोचि चोप्पसॆ निवाँहाङ्ऎ पिॽमिम्पा एक्कन चामा चाआमि, 4 हाङ् निवाँहाङ्ऎ पिॽमिम्पा लावामि योवा डुङामि मान्ठाभनॆ खोचिऎ खोचिनुङ्न सोरि सोरि लाम्ढुखुबा लावामि लुङ्कॽवाबाङ् आम्पऎ योवा डुङामि हाङ् आक्क लुङ्कॽवा चाइ खिरिस्ट न। 5 हाङ्स खोचिमि लुम्पि चुःक्मिहा डिरिक् याॽमिचि नुङ् निवाँहाङ् मान्चेन्चाआ हाङ् खोचि आसास पेन्मिनिहा ठालबि सिखारामि। 6 डिरिक् निङ् याॽल लिमिम्पा आक्क खानावाँ कानिऎ वाप्मा लॆऎ खानावाँ लिडा। मसॆ कानिऎ आक्खा कानिम् पाप्पाटुबाचिऎर काइसॆ निवाँ खिम्मा फॆन्नि। 7 हाङ् खोचि ऎॽवाचिऎ मुर्टि चुङिन्ट आन्नॆ लॆःॽमा फॆन्नि। निवाँनेन् साब्चिराबि गरहाङ् साब्डा, “याॽमिचि भोजा चासि, डुङ्सि पेनामि हाङ् ब्याबिचारामि लागि लाॽलुबक्कामि।” 8 खोचिबि ऎॽवा याॽमिचिऎ ब्याबिचारा लॆटिन्ट कानिऎ लॆःॽमा फॆन्नि। खोचिऎ ब्याबिराचा लॆःॽमिम्पासॆ इॽयाक् डिनाबिॽन खोचिबि हिसुबङ् याॽमिचि लुक्खारामि। 9 हाङ् आक्खा ऎॽवाचिऎ लॆटिन्ट कानिऎ पारभु ऎठागुम्यॆ। आक्खाचिबाङ् ऎॽवाहा याॽमिचिऎ ठागुचि हाङ् खोचि पुसॆमाऎ डक्सिटुचिमि। 10 हाङ् आक्खाचिर कानि ङॆन्मा फॆन्नि, आक्खाचिबि ऎॽवाहा याॽमिचि ङॆन्मिम्पासॆ सिखॆमिक्खुबा निवाँखाटॆखुबाऎ सेरुचिमि। 11 आक्खाचिबि लिमिम्पा आक्खा खानावाँ कानिऎ वाप्मा लॆऎ खानावाँ लिसा। हाङ् बाखाटेम् लुक्खॆॽमॆ लःबि हिङ्चाखुबा कानि पेन्मिसि आक्खा खानावाँ मोसाऎ निवाँनेन् साब्चिराबि साबु। 12 मसॆ आसॆ चाइ काङा निवाँहाङ्बि नुःर येब्डिङ् मिनुक्, खो नुःर येप्ल, हॆॽनॆ हाङ्ग खो टॆःॽलिङ् खॆः। 13 आन्ना ठाःक्सि टाःहा खानावाँ याॽमिचिऎ आङ्मिम्पा खानावाँन लिः। निवाँहाङ् चाइ निवाँयुङ्मा लॆ। खोसॆ आन्नॆ आनआङ्हिसाम्निनॆ ठाःक्मॆ खानावाँ आन्नाबि पाङ्हाङ्सुनि। हाङ् आन्नाबि टाःहा आक्खा ठाःक्मॆ खानावाँ आङ्हिसाम्निर कामानुङ् खोसॆ लाम्फु सङ्क खाङ्मिकानि हाङ् आन्नॆ आक्खा ठाःक्सि टामिम्पा खानावाँ आङ्हिकाम्नि। 14 मसॆ काङॆ नाम्नाम् पिसिॽमिम्पा बुबुनानुसाचि, मुर्टि चुङ्माबाङ् मॆअङ् पेनानॆ। 15 कॆ आन्ना निवाँटाङ्पा याॽमिचिर लोमॆ पाइकानि। काङॆ लोमा ठाबाक्मिम्पा खानावाँ चाइबानऎ रु हॆॽनॆ आन्नॆॽन फागाम्नॆ। 16 पारभु भोजामि खरॆ याङ्मानुङ् कानिऎ निवाँहाङ् ओहाक् पिस्से आक्क खरॆबाङ् डुङुकिर माल् खिरिस्टऎ हारि अङ्मिम्पा योम्पक्बि मुबाक्खुबा मालिसिहॆ? हाङ् पारभु भोजाबि एम्मिम्पा चारेपा चामार, माल खिरिस्टऎ सालुङ्पि आङ्मिम्पा डुखामि योम्पक् मुःबाक्खुबा मालिसिहॆ? 17 कानि डिरिक् चुकि हाङ्स एक्कन चारेपा चु हाङ् कानि चोप्पासॆ आक्क एक्कन चारेपाबाङ् चाकि मसॆ कानि एक्कन। 18 इस्राएलि याॽमिचि खाङाम्नॆ, आक्खाचिऎ युङ्ठङ्पि सङ्टिमिम्पा चामा ठका चामा नुङ् खोचि निवाँहाङ् चुङ्मॆ योम्पक्पि सोरि लिसामि। 19 गुबि कॆ इमा यकुङॆ खानावाँ चाइ माङ्रटा? काङॆ लोमिम्पा चाइ माङ्भनॆ मुर्टि सङ्टिॽमिम्पा खानावाँ निवाँहाङ् सङ्टिॽमिम्पा पोसुर हॆॽनॆ। हाङ् मुर्टि न स चाइबानऎ निवाँहाङ् हॆॽनॆ। 20 काङॆ इमा यकुङॆ खानावाँ चाइ माङ्भनॆ मुर्टि चुङ्खुबाचिऎ निवाँहाङ् हॆॽनॆ, टर खारिॽमाङ्चिम् लागि सङ्टिॽबिकुचिमि। मसॆ कॆ चाइ आन्ना आक्खा खारिॽमाङ्चि चुङ्मॆ योम्पक् आलॆटानॆ लोकानि। 21 आन्नॆ पारभुमि हाङ् खारिॽमाङ्चिम् हिच्चिम्न खरॆबाङ् डुङ्हिसाम्निनि। मरहाङ्न आन्नॆ पारभुमि हाङ् खारिॽमाङ्चिम् हिप्पाम्न चामॆ ठालबाङ् चाहिसाम्निनि। 22 माल् कानिऎ पारभु सोम खॆॽमिॽमॆ? माल कानि खोबाङ्स चॆक्मावा नुङ्मा लॆकिहॆ टा? 23 आन्ना ऎॽवा जाना गर काकानि, “काङा माङ् मिनुॽङा चोब्ठका लॆःॽमा नुक्।” टर चाइबान लोमार, ऎॽवा योम्पक्ऎ नुऎ योम्पक् यिगुनि। आन्ना “कानिऎ चोब्ठका लॆःॽमा नुक्,” काकानि, टर चाइबान लोमार, ऎॽवा योम्पक्ऎ चाइ निवाँयुङ् लॆखुबाचि चॆकुवॆ मुसुनि। 24 आसॆस टाङ्पाम्न नुऎ लिमा ऎयगुर, टर होइढाचिम् नुऎ लिःपिटुचिर कामानुङ् मिनुःर। 25 आन्नॆ चाइ माङ् लॆःॽमा लॆ भनॆ हाटाबाङ् इन्टॆमिम्पा सा आम्नि निवाँबि चामा नुऎ रु फॆन्नॆ माङ्स मामिॽले चाआनॆ। 26 मान्ठाभनॆ निवाँनेन साब्चिराऎ गरहाङ् लोकु, “बाखाटेम नुङ् आक्कबि चुहा चोब्ठका पारभु निवाँहाङ्मि यो।” 27 हाङ् निवाँयुङ् आलॆखुबाचिऎ भोजाबि आन्ना सेःरामि हाङ् खॆॽमा मिङ्कानि हाङ्ग खारानॆ हाङ् आन्ना माङ् चामा पिकानि, म आम्नि निवाँबि चामा नुऎ रु फॆन्नॆ माङ्स मामिन्ले चाआनॆ। 28 टर आसॆ चाइ आन्ना “इगग मुर्टि सङ्टिॽमिम्पा चामॆ ठका रे” लोसानि हाङ्ग आक्क लोखुबा याॽमिम् लागि हाङ् खोम् निवाँमि लागि आक्क आचाआनॆ। 29 काङॆ ग खानावाँ चाइ आन्नॆ काइसॆ मिॽमिम्पासॆ लोमिम्पा हॆॽनॆ, टर आक्क लोखुबा याॽमिचिम् निवाँमि लागि रेम। टर आन्ना गर काकानि हला, “काङॆ मुमा नुऎ योम्पक् होइडाचिम् निवाँमि लागि मान्ठा आमुमाङॆ? 30 हाङ् काङॆ निवाँहाङ् ओहाक् पिॽसे चाकुङ् हाङ्ग कॆ चामिम्पा ठःकाबि मान्ठा होइढा याॽमिचिऎ आब्डिक् टॆःॽमा लॆऎ?” 31 कॆ गर लोकानि आन्नॆ चामॆ, डुङ्मॆ टे हॆॽनॆ, होइढा माङ्माङ् योम्पक् मुकानि चोब्न योम्पक् निवाँहाङ्मि निङ्लावामि लागि लिर। 32 आनाम् हिङ्खामाऎ याहुडिचि, हॆॽनिबारेक्चि हाङ् निवाँयुङ् लॆखुबा आसास हिङ्वा योम्पक् लॆःॽमॆ निवाँ आमुसुर। 33 आन्ना काङा रक्न लॆटानॆ। काङॆ काम् चोब्न योम्पक्पि चोब्न याॽमिचि चेन्चामिर कामानुङ् योम्पक् मुःॽङा। काङा काम्न नुऎ लिबिॽङार मिन्ङानि टर होइढाचिमि नुऎ लिबिटुचिर हाङ् खोचि हिङ्चामिर मिङ्ङा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.