མད༌ཐཱ༌ 28 - New Testament in Ladakhi Langageحضرت عیسیٰ سونتیا لانّگا زادس۔ 1 شابّاد، آرام چوچیسی جاگی ستینگنے زانییمے جاگّا نگاتوگ نییما شارکیسلا، ماگدالّینما مریم تانگ جان مریم جیک قبرستان ستالا سونگ۔ 2 ہونمیدلا سانگّول ما چھینموجیک یونگس چیازیرنا خُدے فرشتا نامکھانے بابستے قبرستانی گھوے کانے ردوا لیب لیب پو ریلتے، تیکا ژوگس۔ 3 کھونگی ژالدونگ سکاملاگ تسوگسلا لتانگشان یانگ نامزا کھا ژوگس کارپو یودپین۔ 4 کھونگ تھونگتے ثونگاین یودکھان ماگمیگون ماثانٹے جیگستے دارین سیکا گییلتے شیکھان ژوگس گیور۔ 5 فرشتے بومو نییسکوا مولس، ”جیگس ماجیگس، کھیوجے کیانگشینگیکا کیانگسکھان حضرت عیسیٰ سی ژالکھانبو نگا گیوسیود۔ 6 کھونگی کا مید؛ کھونگی مولکھان نانگجین کھونگ سونتیا جانگستے این۔ یونگستے کھونگی جنازہ بورسے ناسّا ستوس۔ 7 تینے گیوگسپا سونگتے کھونگی لوبٹوگس گونلا شود، ’کھونگ شیکھانگونّی ٹونے سونتیا جانگستے، کھیوجے سانگ سنگونلا گلِیلی یولجونگسّی نانّگا سکیودین ۔ تیرو کھیوجاگونلا کھونگ جالین۔‘ نگے شادکھانگون ایدتو بور۔“ 8 تینے بوموگون جیگسنانگ تھادتے گامو نیامپو قبرستان نے بانگتانگاین کھونگی لوبٹوگس گونلا شادّالا سونگ۔ 9 کھونگ نیسکو چھین یود زانے ہونمیدلا حضرت عیسیٰ سی کھونگونی لدُونلا جالتے، ”جولے“ مولس۔ کھونگون حضرت عیسیٰ سی لدُونلا سونگ یانگ کھونگی جابسلا تھامستے سجدہ تانگس ۔ 10 حضرت عیسیٰ سی کھونگونلا مولس، ”جیگس ماجیگس۔ سونگتے نگے فونو گونلا، گلِیل لا سونگ زیر یانگ کھونگونی نگا تیرو تھونگین ۔“ قبرستان ثونگکھانگونّی ناتسُول شادس۔ 11 بومو نیسکو چھین یود زانے، ماگمی ثونگکھان کھاچیگ یروشالیمّی گیالسا یونگستے جونگکھان تشانگما اِمام کُنی چھونمو گونلا شادس۔ 12 اِمام کُنی چھونمو گونتانگ یہُودی پے اُسکیونگون دزومستے ماگمیگونلا پینے مانگپو تانگستے زون تانگچوگچیسّی تھابسلدینگس۔ 13 کھونگونی ماگمیگونلا زیرس، ”کھیوجے، ’ژانلا نگاجا نیدلا سونگتے یود زانے کھوے لوبٹوگسگون یونگستے سپھور کوستے کھیرتوگ‘ زیرگوس۔ 14 کالتیس تیبو کالونّی تشورنا، نگاجے سکیوبستے کھیوجا چھادپا پھوگ میچوگ۔“ 15 تینے ماگمیگونّی پینے لینتے کھونگونی زیرکھان نانگجین چوس پاسانگ، یہُودی پے ٹوا دیرینگ تشوگپانگ تے سپیرابو کھییبساین اینوگ۔ حضرت عیسیٰ سی ستینگجوگی لابجا سالس۔ 16 تینے گلِیلی نانّگا حضرت عیسیٰ سی سونگ مولکھانّی ریکا لوبٹوگس چوگشیگپو سونگ۔ 17 کھونگونی حضرت عیسیٰ سی جالّاچیگ سجدہ تانگس ، اِین نانگ کھاچیگی (کھونگ حضرت عیسیٰ سی اینّاہے سامستے) تھےژومس چوس۔ 18 حضرت عیسیٰ سی کھونگون یودسا سکیودتے مولس، ”نامکھا تانگ دُنیائی نانّگا یودکھان تشانگمیکا وانگچھا گانگپو نگا سالّا زادتے این۔ 19 تیبویپھیا گیالکھاگ تشانگمے نانّگا سونگتے میگون نگے لوبٹوگس گیورچوگچیسلا سونڈوس چوستے کھونگونلا یاب، بُوژا تانگ ہلژخمہ رُوح بوے مِنتخسی نانّگا غوتا تونگ۔ 20 یانگ نگے کھیوجا تانگکھانّی کا تشانگما کھانیانچیسلا کھونگونلا لابجا تونگ، یانگ نگا توسّی تھاما تشوگپانگ کھیوجا نیامپو توسگیون دوگچیسپو ایدتو بور۔“ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation