ལུ༌ཀ༌ 16 - New Testament in Ladakhi Langageچھاگزوت ہوشارجیگی رومس۔ 1 حضرت عیسیٰ مسیح لوبٹوگس گونلا مولس، ”می چھوگپوجیگّا کھوے چھاگزوت پوے نور گودلا تانگدوگ زیرتے سپیرا تشورپا 2 کھوے چھاگزوت پوابودتے زیرس، ’ کھیرانگی سکورلا نگے چی تشورّانوگ؟ کھیورانّگا کالکھانّی کھاگ تانگ پینے سیروگّون تونگ، تانیپھارلا نگے کھیرانگ چھاگزوت ّی کوسیکا بورّامید‘۔“ 3 ” چھاگزوت پوے کھورانّگا زیرس، ’تا نگے چی چوگوس؟ سپونبوے نگا لاسنے پھینگس۔ سا سکوچیسّی کھیود نگا میراگ، لتسانّگالا نگا ٹھیلچیس راگ ۔ 4 لاسنے پھینگستے ستینگنے میگونّی نگا کھونگونی کھانگپے نانّگا دوگسا تانگ زان تانگچیسّی پھیا چوگوشیسپو نگا شیس‘۔“ 5 ”تینے کھوے سپونبوے بولون تانگستے یودکھان تشانگما ریرے چوستے بودس۔ دانگپوبوا ٹیس، ’کھیورانّگا نگے سپونبوا شالگوشیسّی بولون تسام یود؟‘ 6 کھوے زیرس، ’ ذیتونی مار لیٹار ستونگ سوم۔‘ کھوے زیرس، ’گیوگسپا کھیرانگی بولونّی تھو کھیونگستے ستونگ چیگ نانگ پھید ڈیس‘۔“ 7 ”تینے کھوے یانگ چیگّا ٹیس، ’کھیورانّگا بولون شالگوشیس تسام یود؟‘ کھوے لانتانگس، ’ٹو کییلوگارام ستون نییشو‘ یانگ کھوے زیرس، ’ کھیرانگی بولونّی تھو کھیونگستے ستون چوروگ ڈیس‘۔“ 8 ”سپونبوے ٹانگپو میدکھانّی چھاگزوت پوا، سامباچانّی لاس چوسکھانبوے پھیا ستودپا تانگس۔ ای دُنیائی می گون کھورانگونّی ٹوپاگون نیامپو ڈیل چوچیسّی نانّگا، اودّی میگونّی سانگ مانّگا سکیونجان یودتے اینوگ۔ 9 نگے کھیوجاگونلا زیرّاد، کھیوجے دُنیائی نورگون جانما پھانتھوگس تانگچیس تانگ کھونگون نیامپو دزاو چوچیسلا کول۔ تینے نوربو میدکھان چھاچیگ، نامکھے کھانگپے نانّگا کھیوجاگونلا گاسوس جوین۔“ 10 ”نیونگونجیگی نانّگا ایمان چان لوسکھانگون، مانگپوے نانّگانگ ایمان چان لوسین۔ نیونگونجیگی نانّگا ٹانگپو ماچوکھانگونّی مانگپوے نانّگانگ ٹانگپو میچو۔ 11 کالتیس کھیوجا دُنیائی نور ڈیل چوچیسّی نانّگا ایمان چان میدنا تینے سوی کھیوجا نامکھے لدینبے نور ستاداین۔ 12 کالتیس کھیوجا جانمے نورّی نانّگا ایمان چان میدنا، تینے کھیوجارانگی اینکھانبو سوی کھیوجا تانگین۔ 13 یوگپوجیگی مالِک نییسّی جابستوگ چو مینیان، چیگپوا ناپھراد یانگ چیگپوا چیسپا چوین، یا چیگپوا سنینگنے جابستوگ یانگ چیگپوا ماتھادّا جابستوگ جوانوگ۔ تینّا تسوگسلا خُدے تانگ نور نییسکوا جابستوگ ژو مینیان۔“ 14 تے تشانگما تیکا یودکھانّی نوردودچان فریسی پاگونّی تشورپا، کھونگونی حضرت عیسیٰ سی ٹھیلگود تانگس۔ 15 حضرت عیسیٰ سی کھونگونلا مولس، ”میگونّی لدُونلا کھیوجاگونّی کھیوجارانگ ٹانگپو اینکھان ستانچیسلا تھادّوگ، اِین نانگ کھیوجے سنینگّون خُدے کھیینّانوگ۔ میگونّی ما رینچان تھیکھانبو، خُدے سکوندونلا تیبو کھاملوگ تھیاین۔“ جانیانگ لابجا ریگ۔ 16 حضرت عیسیٰ مسیح مولس، ”شریعت تانگ پیغمبر گونّی ڈِیا زادکھان گُون یوحنّانی توس تشوگپا شادّا زادس۔ تیتوسنے پھارلا خُدے گیالثیدّی گاموےناتسُول شادین اینوگ، یانگ تینانّگا چھاچیسّی سونڈوس تشانگمے چوین اینوگ۔“ 17 ”اینّانگ خُدے شریعتی ایگے چیگ چیگ ستورّی سانگ، نامکھا تانگسا نیسکو ستورچیسپو لامو این۔ 18 کھورانگی ناما چادتے جان بوموجیگ نیامپو ناما چوکھانبوے لوگییم چوستے اینوگ، یانگ چادکھانّی بومو نیامپو ناما چوکھانبوینگ لوگییم چوستے اینوگ۔“ می چھوگپوجیگ تانگ لعزر۔ 19 ”چھوگپو میجیگ کوشین تانگ ریشیمّی کوسلاگ رینچان گونتے، جاگدانگ ڈونتانگاین سکیدپو چوین دوگادپین۔ 20 کھوے گھوے لدُونلا زوگسپو گانگپوا شوا بینگتے یودکھان لعزر زیرکھانّی لتسانگکھانجیگ دوگادپین۔ 21 کھوے می چھوگپوبوے چوگتسے کانے بودکھانگون زاچیسّی دودپا چوادپین، تیکا نانما کھییگون یونگستے کھوے سماکھاگون لداگّادپین۔“ 22 ”جاگشیگ لتسانگکھانبو شی، یانگ خُدے فرشتاگون سکیودتے کھو حضرت اِبراہیم یودسا کھورتے کھیرّا زادس۔ می چھوگپوبوانگ شی یانگ سوبس۔ 23 نیالوے نانّگا ردوگنگال ثانٹے تھونگین ، کھوے نامکھا ستاسپا تھاگرینگجیگنے حضرت اِبراہیم تانگ کھونگی لدُونلا لعزر تھونگ۔“ 24 ”کھوے سکاد چھینمو نیامپو زیرس، ’ابا حضرت اِبراہیم، نگیکا سنینگرجے زادستے لعزر ی دزیگوبو چھوا چوگستے نگے لچیبو ٹانگمو چو چوگّا کالا زادّانگ، چیازیرنا نگا ای میے نانّگا ردوگنگال چھینمو تھونّگاراگ‘۔“ 25 ”اینّانگ حضرت اِبراہیم لانتانگس، ’بُوژا ایدتو چوس، کھیورانّگا رانگی میتشے نانّگا سکییدپوگون تھوب زانے لعزر لا ردوگنگال گُون تھوبتے اینپین۔ تا ایکا لعزر لا سکیدپو یانگ کھیورانّگا ردوگنگال تھونگدوگ، 26 تے تشانگما ماتشاد نگاجا تانگ کھیرانگی پارلا لونگپا چھینموجیگ یود۔ یکانے کھیرانگ چھوگسلا چھا تھادنانگ چھا مینیان، یانگ تیکانے سوجیگّانگ نگاجا یودسا یونگ مینیان‘۔“ 27 ”کھوے زیرس، ’جوجو یاب حضرت اِبراہیم، لعزر نگے ابے کھانگپا کالا زادتے 28 نگے فونو نو ثنا کوا دِیگپے میتشے پھودچیس ماپھانگنا کھونگونانگ ای باردوچانّی ناسّے نانّگا لیباین مولتے سپانگپود چوگّا زادّانگ‘۔“ 29 ”اینّانگ حضرت اِبراہیم لانتانگس، ’حضرت مُوسیٰؔ تانگ جان پیغمبر گونّی شریعت کھونگونی لاگا یودتے اینوگ، تیگونلا نیانگوس‘۔“ 30 ”کھوے زیرس، ’یاب حضرت اِبراہیم تیزوگ مامول۔ کالتیس شیکھانگونّے ٹونے چیگ کھونگّونّیکا چھانا، کھونگونی گیودپا چوستے سیمس گیورین‘۔“ 31 ”حضرت اِبراہیم کھوا زیرس، ’کالتیس کھونگونی حضرت مُوسیٰؔ تانگ پیغمبر گونّی شریعت گونی کھا مانیانّا، شیکھانگونّی ٹونے لانگستے چھاکھانبوے کھانگ کھونگونی مینیان‘۔“ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation