པི༌ཏྲར༌ 1 5 - New Testament in Ladakhi Langage

اُسکیونگ تانگ کھیوگتونگ گُونلا لابجا۔

¹ نگانگ مسیح عبادت خانہے گوٹھید، کھونگی ردوگنگالّی گواہ یانگ کھونگ سنگون زانے، کھونگی سپالّی نانّگا ڈیسشیسچانّی، کھیوجے ٹوا شریعتی لابکھان گون لا جُووا ریگ یود۔

² لُوگ زی تسوگسلا کھیوجے لاگا خُدے ستادا زادکھانّی لُوگُو گُونلا، گیالّا چوستے ستاستوگ چوشیگ۔ کھیوجاگونّی تیبو وانگ تانگستے چوچوگکھان تسوگسلا ماچوا، اُسکیونگ جیگی تشولّا رانگ تھادتے چوشیگ۔ ای لاسگون نور یا پینیا ستاستے ماچو، اِین نانگ خُدا جابستوگی چھاگلاس این سامتے چوسشیگ۔

³ کھیوجے لاگا ستادکھانّی عبادت خانہ پو وانگ نیامپو ٹھید ماٹھیدّا، تیگونّی پھیا سپیجیگّا گیورشیگ۔

⁴ لُوگ زی تشانگمے سپونبو، حضرت عیسیٰ سی سنگون زانے، کھیوجاگونلا خُدے چھوگسنے توسگیون لوسشیسّی سپالّی تاج پو تھوبین۔

⁵ تینّا تسوگسلا کھیوگتونگّونّی، کھیوجارانگ اُسکیونگونی وانگی یوگا بورتے کھانیونشیگ۔ یانگ پاسمو نیامپو چیگ تانگ چیگّا جابستوگ ژوشیگ، چیازیرنا خُدے ہلژخمہ شوقبُو بوے نانّگا مولتے دوگ، ”نگے پھوسوچانگونلا گیابگال چواد۔ اِین نانگ نیامشونگّونلا شزدے تانّگاد۔“

⁶ تیبویپھیا خُدے ستوبسچان چھاگی یوگا سیمس پاسمو نیامپو دوگشیگ، تینے توسرانّاچیگ، کھیوجاگونلا خُدے سیوا سالّا زادِین۔

⁷ رانگی تشیرکھا تانگ ردوگنگال تشانگما خُدے چھاگّا ستود، چیاجونا کھونگی کھیوجا ستاستوگ زادّانوگ۔

⁸ کھیوجاگونّی شانگ چوستے، رانگسیمس چونتے بورشیگ، چیازیرنا ردودگونّی گوبا کھیوجے ڈاو نی کُوچو تانگکھانّی سینگّے تسوگسلا، میگون ٹھیسّتور چوستے زاچیسّی پھیا ژالین ڈولدوگ۔

⁹ ایمان ستانپو نیامپو کھوے گیابگالّا نولشیگ، چیازیرنا دُنیا گانگپوے نانّگا کھیوجے فونو گونلانگ، تینّا تسوگسّی ردوگنگال تھونگین یودکھانبو، کھیوجا گیُوس اینوگ۔

¹⁰ شزدے تشانگما یودکھانّی خُدے، مسیحا گیُودتے، کھیوجاگون کھونگی تھامیدپے سپالّی نانّگا ڈیسشیسلا بودّا زادس۔ تا کھیوجاگونلا سکابسّتوگسشیگ ردوگنگال نیونگستے ستینگنے حضرت عیسیٰ سی کھونگرانگی کھیوجاگونلا چیتشانگما لوگستے سالّا زادِین، یانگ ستوبسچان، ستانپو تانگ سکولمینیانچیس چوا زادِین۔

¹¹ تُوسگیُونّے گیُونلا وانگ تشانگما کھونگی چھاگّا لوسشیگ۔ امین۔

آخری جُو نہ سلام۔

¹² نگے ایمان چان تھیسکھانّی فونو ، سِیلاسی روگس نیامپو ای ایگے دورلدوسشیگ ڈِیاد۔ ای ایگے ڈیچیسّی گیونتشانبو، کھیوجاگونلا سپوسپا تانگچیس تانگ کھیوجاگونلا جونگین یودکھانگون، خُدے شزدے کھاگجیگ اینکھانبوے گواہ تانگچیسپو این۔ ای شزدے نانّگا ستانپو دوگشیگ۔

¹³ کھیوجا نیامپو لدامسکھانّی بابل عبادت خانہے کھیوجاگونلا سلام کالدوگ۔ نگے بُوژا ژوگس مرقُس سیانگ کھیوجا سلام جُوروگ۔

¹⁴ چیگ تانگ چیگّا، مسیحاپے چامسپا نیامپو سلام ژوشیگ۔ مسیح نانّگا اینکھان تشانگمالا جیدے تھوبشیگ۔ امین ۔