रोमियो 3 - लाहौली बाइबिल

परमेशवरो न्यायऊ बचाव (प्रतिरक्षा)

¹ दंङ अच़िया कुट्री तरपोतो कि यहुदी शुहबिमी छि फायदा ए खतना ऊ छि फायदा?

² वोई, इच्च़ा यहुदी शुहबिमी महस फायदा तोह। भत्ते बे ज़रूरी गप्पा दि तोह कि, परमेश्वरो बचन यहुदी मीहतिंङ रांहषी तोह।

³ अगर रे यहुदी परमेश्वरो थल्जी विशवासो जोगे माह तोईरे ता छि शुई? छि दिऊ मतलब दि तोह आ कि परमेश्वर दोतंङ साते लहसी वायदारिंङ विशवासो जोगे माह?

⁴ मह! बिल्कुल ला माह! भले हर इच्च़ा मीह हप्सी शोतो तांला परमेश्वर सच्चा साबित शोतो। छना कि पवित्रशास्त्र परमेश्वरो पाहठी कुट्रा, “झांह लेह कांह केनोह गप्पारिंङ धर्मी ठहरेसोन, दंङ फेंसला लहज़ा केई जय खोकपोन।

⁵ झांह लेह अगर हेंदु मदम कम परमेश्वरो धर्मिकता कंड्रा, दंङ ञेंहच़ी छि कुंई? छि दि कि परमेश्वरो रोहष लहज़ी ए, हेंदिंङ सज़ा रंड्री गलत शुह? दिह ता गेह मीहू रीति टोईच़ी कुट्रातग।

⁶ मह! बिल्कुल माह! अगर परमेश्वरे यहुदी तु फेंसला लहज़िमी सही माह ता, दंङ दुह पक्‍का रूपारिंङ संसारो मीहतु फेंसला लेह मरपोतो।

⁷ पर अगर गिऊ हप्सी परमेश्वरो सच्चाई बि प्रगट लहज़ा ता दंङ दोबि ऊई ला महिमा खोकसा, दंङ दोई छना गिऊ फेंसला लेह तरपोतो दंङ गिह्बी इच्च़ा पापी रूपारिंङ अरोपी ठहराके तरपोतो?”

⁸ पर अंऊ गिऊ थल्जी झांह ठ्रोह गप्पा लहज़ा दुह सज़ा ओ हकदार तोह, अंऊ दोरच़ी भलाई उत्पन्न शोतो? छना कि रें मीहरे अंऊ हेंदु निन्दा लहज़ातोर, कुट्रातोर कि ञेंहच़ी दिए सिखाएक्च़ातंई। पर अंऊ गिऊ पाहठी झांह ठ्रोह कुट्रातोर दू सज़ा ओ हकदार तोह।

अरिला धर्मी माह

⁹ दंङ, छि ञेंरे यहुदी मीहरे गैर यहुदी मीहतु बे रूठे तोतोंईयां? माह! बिल्कुल माह! छना कुचे ञेंहच़ी तुहई साफ-साफ कुह्चे चरच़ातेंई कि यहुदी ए ऊईजाति भत्ते पापो शाक्ति ऊ अधीन तोतोंई।

¹⁰ छना पवित्रशास्त्रारिंङ च़ेहसी तोह, “कि परमेश्वरो नज़रारिंङ अरिला धर्मी माह, इच्च़ा लाह माह,

¹¹ झांह ठ्रोह इच्च़ा ला मीह माह अंऊ हेले रिंङ दि चेहच़ा कि छि सही तोह; अरिला परमेश्वरा बि ञेंहच़ी माह जुंज़ा।

¹² भत्ते परमेश्वरो दोरच़ी शत्‌ह शुहचे इलिर, दोरे भत्तेर परमेश्वरो थल्जी बेकार शुहचे इलोर, अरिला भलाई लहज़ा माह, इच्च़ा ला माह।”

¹³ अलसी कब्रो दोरच़ी अंजा बासो ठ्रोह दोतु गप्पा झखंजी तोह। दोतु लेह हप्सी रंङ साते पिंङे इलजी तोह। दोतु शब्द ओमड्रा बिषो ठ्रोह तोह अंऊ नुकसान लहज़ा दंङ सिमी कारण शुहचे यवात।

¹⁴ दंङ दोतु गप्पा श्राप ए कड़ागे रंङ साते पिंङषा तोह।

¹⁵ दोच़ी हत्या लहज़िमी थल्जी जल्दबाज़ी लहज़ातोर।

¹⁶ दोरे अंऊर ला यवातोर बुराई ए टेहषी अपातोर।

¹⁷ दोरे शांति रंङ बंङज़ी मरच़ातेर,

¹⁸ दोतिंङ परमेश्वरो बेह्द तोत ए माह।

¹⁹ ञेंहच़ी ञेंच़ातंई कि कानून छिला कुट्रा, दुह मीहतंङ साते कुट्रा, अंऊ मुसाओ कानूनो अधीन तोतोर, ताकि मीहतिंङ बहाना बणाएट्रिमी दोरच़ी रोकेकी तरपोंई, दंङ संसारो भत्ते मीहरे परमेश्वरो फेंसला ओ अधीन शोर।

²⁰ कानूनो भाषे लहज़ी रंङ अरिला मीह परमेश्वरो तुईज़ी धर्मी माह शुहबी, छना कुचे मुसाओ कानूनो दोरच़ी हेंज़ी सिर्फ रूठे रंङ ञेंए तरपोंई कि ञेंहच़ी पाप लाहतंई।

विशवासो दोरच़ी धर्मिकता

²¹ पर हेंतेग मुसाओ कानूनो नियमो भाषे लहज़ा मेह परमेश्वर ऐनाहरंङ साते सही घोषित लहज़ा। महस तुहई मुसाओ कानून ए भविष्यवक्ता तु कताबारिंङ दि च़ेहसी तोहई कि छना हेनर परमेश्वरो दोरच़ी धर्मी शुहचे इलजी तोतोंई।

²² अपेहल हेनर यीशु मसीहू टोहकठे विशवास लहज़ातंई, दंङ हेनर परमेश्वरो दोरच़ी धर्मी शुहचे य्वातंई, अंऊ कि भत्ते विशवास लहज़ा तु थल्जी तोह। परमेश्वर भत्ते तंङ साते इच्च़ा ठ्रोह व्यवहार लहज़ा।

²³ झांह लेह भत्ते ज़ि पाप लहसी तातोर दंङ दू महिमा तचेक पिचे मारतेंई अंऊ परमेश्वरे रंड्रा।

²⁴ पर परमेश्वरो मोह्ड़े दाह ओ दोरच़ी दोई हेंदिंङ यीशु मसीहू ज़ि हेंदु पापो सज़ाओ दोरच़ी छुड़ाके च़रति, दंङ हेंदु छा लहज़ी मेह परमेश्वरे घोषित लहज़ा कि हेनर धर्मी शुई।

^25-26 परमेश्वरे यीशु मसीह बि हेंदु पापो थल्जी बलि शुहबिमी थल्जी च़चे च़रति। यीशु मसीह ज़ि एनोह जीवनो बलि दिऊ थल्जी रें च़रति, ताकि दोऊ टोहकठे विशवास लहज़ा हेनर परमेश्वरो कछंङ अपि तरपोंई। दंङ परमेश्वरे दि दिऊ थल्जी लहरी कि दोई तुहई दि सही लहरी, अपेहल दोई पापी तिंङ माफ लहज़िमी थल्जी धीरज़ लहरी। दिरंङ दि ला पता लेहकी यवात कि परमेश्वर सही तोह, अपेहल दोई दुह मीहतिंङ अपनाएच़ा अंऊ यीशु टोहकठे विशवास लहज़ातोर।

²⁷ दंङ, छि झांह ठ्रोह चीज़ तोह कि अतु पाहठी हेंज़ी घमंड लेह तरपोंई? दोऊ थल्जी छल्ले जगह माह। अंऊ मुसाओ कानूनो वहज़ा ज़ि? दि दिऊ थल्जी तोह छना कुचे हेनर कानून भाषे लहज़ातंई? माह, पर यीशु मसीहू टोहकठे विशवास लहज़िमी वहज़ा रंङ तोह।

²⁸ दिऊ थल्जी ञेंहच़ी ञेंहच़ातंई कि मीह सिर्फ मुसाओ कानूनो पालन लहज़िमी रंङ साते मशत, पर यीशु मसीहू टोहकठे विशवास लहज़िमी रंङ साते धर्मी शुहचे यवात।

²⁹ परमेश्वर सिर्फ यहुदी तु ए परमेश्वर माह शुह, पर दुह ऊईजाति तु ला परमेश्वर शुह।

³⁰ छना कुचे इच्च़ा ए परमेश्वर तोह, अंऊ खतना लहसी यहुदी तिंङ विशवासा रंङ दंङ खतना मेह ऊईजाति तिंङ ला विशवास मेह धर्मी बणाके च़रपोतो।

³¹ दंङ छि हेंज़ी कानूना बि विशवासो दोरच़ी बेकार बणाके चरच़ातंई? बिल्कुल लाह माह! पर हेनर दू कानून बि साबित लहज़ातंई अंऊ परमेश्वरे मुसाओ दोरच़ी रांहषी तते।