फिलेमोंन 1 - लाहौली बाइबिल

अभिवादन

¹ गेह पोलुस अंऊ यीशु मसीहू सेवकाई ऊ थल्जी जेलारिंङ तोतोग। दिह डाक चेहच़ातग। ञेंहतु विशवासी न्वा तीमुथियुसो तरफे कनिंङ फिलेमोनबि ला नमस्कार। काह हेंदु साथी मित्र शुनाह दंङ हेंदु ठ्रोह ए मसीहू सेवा लहज़ातन।

² गेह हेंदु रिहंङ अफाफिया ए, हेंदु विशवासी न्वा अरखिप्पुस, अंऊ इच्च़ा योद्धा ओ ठ्रोह परमेश्वरो सेवा लहज़ा दंङ दुह कलीसिया अंऊ केहतु चुंङ ठ्रोहका शवाह दोतिंङ लाह चेहच़ातग।

³ गेह प्रार्थना लहज़ा तग कि हेंदु बाह परमेश्वर ए प्रभु यीशु मसीह दोरच़ी मोह्ड़े दाह ए शांति केतिंङ खोकसा लोहतो।

फिलेमोनो दाह ए विशवास

⁴ गेह अपेहल लाह प्रार्थना लहज़ातग, दंङ हमेशा कनु थल्जी परमेश्वरो धन्यवाद लहज़ातग।

⁵ छना कुचे गेह प्रभु यीशु मसीह रिंङ कनु विशवास ए परमेश्वरो भत्ते मीहतु थल्जी कांह दाह ए विशवासो पाहठी रेड्रातग।

⁶ गेह प्रार्थना लहज़ातग कि विशवासी मीह तंङ साते छना कांह संगति तोह दुह बड़ेक्पी जूंस, दुह भत्ते रूठे चीज़ो पता लेहपि रंङ साते अंऊ परमेश्वरे हेंदिंङ रांहषी ततो, दि भत्ते मसीहू महिमा ओ थल्जी शोतो।

⁷ छना कुचे हे प्यारे विशवासी न्वा, गेह ऊईतु थल्जी कांह दाह खंऐ महस खुशी ए शांति खोकच़ातग, कि कनु दोरच़ी परमेश्वरो मीहरे खुश शुहचे इलोर।

उनेसिमुसो थल्जी निवेदन

^8-9 गेह कनिंङ दिह गप्पा कुट्रातग अंऊ कनिंङ लेह जूंशी तोह। गेह दुह अधिकारो इस्तेमाल लेह तरच़ातग अंऊ मसीह गिह्बी रांहषी ततो पर गेह झांह माह लग दिऊ वजह, गेह कनिंङ दिह लोह कुट्री लेहकी तोतोग छना कुचे हेनर इदि-ऊईदि रंङ साते ए परमेश्वरो मीहतंङ साते दाह लहज़ातंई। गेह पोलुस यांङदे तोतोग दंङ केतंङ साते रूहक्च़ातग अतिंङ मीहच़ी कैदा रिंङ केहषी तातोर छना कुचे गेह यीशु मसीहू सेवा लहज़ातग।

¹⁰ गेह उनेसिमुस थल्जी विनती लहज़ा, अंऊ गिऊ योह ठ्रोह तोह। अपेहल गेह जेलारिंङ तोईग दंङ दुह मसीह रिंङ गिऊ योह बणेंके इलि।

¹¹ दुह ता मुण्डारि कनु छिल्ल कमो जोगे माह तोहई, पर हेंतेग कनु ए गिऊ थल्जी झुल्लो थल्जी कमो जोगे तोह।

¹² हालांकि गेह उनेसिमुस रंङ साते महस दाह लहज़ातग, तांला गेह दोबि कनु कछंङ वापिस चरच़ातग।

¹³ गेह दोबि घेंङौ मदतो थल्जी देर ए तहच़ि तातेग अपेहल गेह यीशु मसीहू पाहठी रूठे खबरो प्रचार लहज़िमी वहज़ा ज़ि कैदारिंङ तोईग। दुह देर गिऊ मदत लहज़िमी थल्जी कांह जगह लेहपच़ी तरच़ाते छना कुचे गेह ञेंहच़ातग कि केई गिऊ मदत लेह जुंज़ातन।

¹⁴ पर गेह कनु हिटी मेह छिल्ल लेह मरतिगा, कि कनु दि श्रर्ण (उपकार) दबाबारंङ साते माशुह पर खुशी रंङ साते शुहबी जूंस।

¹⁵ शायद दिह ए वहज़ा तोहई कि परमेश्वरे उनेसिमुस बि थोड़े टेमो थल्जी कांह दोरच़ी ऊईतार पोक्पिमी अनुमति रें च़रति ताकि दोई मसीहू टोहकठे विशवास लेह च़रपोतो, दंङ केई दुह हमेशा ओ थल्जी केनोह कछंङ तहच़ि तरपोन।

¹⁶ पर हेंतेग दुह सिर्फ कांह दास ए मशत पर दास बे ला बढ़कर तोह, दंङ हेंतेग दुह कांह प्यारे विशवासी न्वा शुह, अंऊ गिऊ खास प्यारे ता तोह, पर कनिंङ दोबि ला महस दाह लहज़ी जूंशी तोह छना कुचे दुह केहतु सेवक शुह दंङ मसीह रिंङ इच्च़ा न्वा ला शुह।

¹⁷ अगर केई गिह्बी केहनो साथी न्वा चेहच़ातन, दंङ दोबि झांह ठ्रोह ग्रहण लोहतो छना केहच़ी गिह्बी ग्रहण लहतंई।

¹⁸ दंङ अगर दोई कनु छा नुकसान लहसी ततो, या दोऊ टोहकठे कनु छा कर्ज़ा तोह, दंङ गेह दोऊ भुगतान लोहग।

¹⁹ गेह पोलुस घेंङौ गुह्ट्ररंङ दि चेहच़ातग कि गेह घेंङै दोऊ भुगतान लोहग; हालांकि केई तुहई बे दि ञेंहच़ा कि गेह अगर कांह मदत माह लाहइंयां ता, दंङ केई केनोह दोरच़ी दि खरकोई जीवन माह खोकच़तन, दिऊ थल्जी काह केनोह दिह जीवनो थल्जी गिऊ कर्ज़दार तोतोन।

²⁰ हे प्यारे मित्रा, दि खुशी गिह्बी मसीह रिंङ कनु दोरच़ी खोकसिरी, इच्च़ा साथी विशवासी ओ रूपारिंङ झांह लेह गिह्बी खुश लोहू।

²¹ गेह कनु आज्ञाकारी शुहबिमी भरोसा तहच़ि ते, कनिंङ चेहच़ातग, दंङ दि ञेंच़ातग, कि छिल्ला धिर गेह कुट्रतग केई दोबि लाह बढ़ के लोहन।

²² इच्च़ा गप्पा अई तोह, कि केनोह चुंङ गिऊ थल्जी इच्च़ा कमरा तेयार तोह; छना कुचे गिह्बी उम्मीद तोह कि परमेश्वर केहतु प्रार्थना ओ जबाब रमतो कि गेह केहतु कछंङ अपोग।

अंतिम अभिवादन

²³ इपफ्रास, अंऊ यीशु मसीहू पाहठी प्रचार लहज़िमी रंङ वहज़ा गेरंङ साते कैदारिंङ तोह, दोई केतिंङ नमस्कार लहज़ा।

²⁴ दंङ मरकुस ए अरिस्तखुर्स ए देमास ए लूकास अंऊ मसीह रिंङ गेरंङ साते प्रभु कम लहज़ातोर; दितु कनिंङ नमस्कार।

²⁵ गेह प्रार्थना लहज़ा तग कि प्रभु यीशु मसीहू मोह्ड़े दाह केहतु टोहकठे शुहवा लोहतो। अमीन।