मत्ती 26 - लाहौली बाइबिल

यीशु थल्जी योजना

¹ अपेहल यीशुज़ि दिह गप्पारे कुचे केहरी दंङ एनोह चेला तिंङ कुड़ी।

² “केहच़ी ञेंहईयां कि झुह्ट ध्याड़ो थल फसह त्यार तोह, दंङ गेह मीहू योह क्रूसो टोईच़ी चढ़ाएच़िमी थल्जी चुहमसोतो।”

³ दोहपल यहुदी मोह्ड़े पुरोहित ए मीहतु यहुदी सेंहणारे काईफा मिन्दु यहुदी महापुरोहितो ल्वाड़िंङ ठ्रोहका शुईरे।

⁴ दंङ एनातु विचंङ सोचविचार लहज़ी लेह्तिरे कि यीशुबि धोखा रंङ च़ुमने सचे च़रपोंई।

⁵ पर दोच़ी कुट्रातेहर “त्याहरो मुक्कारिंङ माह, झांह शुबी माह जूंस कि मीहतु बिचंङ शासी तेंङसी शोतो।”

बैतनिय्याह रिंङ यीशु स्वागत

⁶ अपेहल यीशु बैतनिय्याह नगरंङ शमौन कोढ़ी ऊ चुंङ बगत ज़ेई लेहकी तोहई,

⁷ दंङ इच्च़ा मेच़मी मंङे संगमरमरो कवचि बोतलो अंद्रेग जटामसिऊ महस शुद्ध रुठे मंङे इत्र रेंज़ा हति; दंङ लब थक्शे दुह इत्र दोऊ पूज़ंङ केहरिर।

⁸ दिह खंड्रीरंङ दोऊ चेलारे रोहषे के कुट्री लेहतिरे, “दि मंङे इत्र छारिंङ बर्बाद लेह च़रति?

⁹ दिह ता महस लसा रंङ लंङज़ा गरीबातिंङ रेह च़रतिगा।”

¹⁰ दिह ञेंहच़ी रंङ यीशुज़ि दोतंङ साते कुतोह “मेच़िमीबि छिले तंग लाहतंई? दोई गेरंङ रूठे लहतो।

¹¹ गरीबरे केतंङ साते हमेशा बंङज़ोर पर गेह केतंङ साते हमेशा माह बंङज़ोग।

¹² दोई गिऊ फुकारिंङ दिह इत्र केहतो, दुह गिऊ पथेक्च़िमी थल्जी लहतो।

¹³ गेह केतंङ साते हेले कुट्रातग कि भत्ते संसारा रंङ अंऊ ला दिह रूठे खबर शोतो, दोहर दिऊ दी कमो च़रच़ा ला दोऊ हिदरिंङ शोतो।”

यहूदा इस्करियोति विशवास घात

¹⁴ दंङ करियोत नगरो यहूदा ज़ि, अंऊ यीशु सनी अंङषी दोतु बिचंङज़ि इच्च़ा तोहई दुह यहुदी मोह्ड़े पुरोहितो कछंङ इलि दंङ कुट्री लेहती

¹⁵ “अगर गेह दोबि केहतु गुहड़िंङ च़ुमज़ि लहरिगा ता गिह्बी छि रमोंई?” दोच़ी दोबि मुलूतु निज़ोसाह सिक्कारे तोलेके रेंऐ च़रतिरे।

¹⁶ दंङ दुह दोहथल यीशुबि च़ुमज़िमी मौका खंड्री लेहकी तोहई।

चेला तु साते फसहो अंतिम भोज़

¹⁷ दंङ सुम मेह रोटी त्याहरो मुंडो ध्याड़ारिंङ चेलारे यीशु कछंङ अंज़े रुहक्च़ी लेह्तिरे, “केई अंऊर जुंज़ातन कि ञेंहच़ी कांह थल्जी फसह ओ बगतो तेयारी लोहनि?”

¹⁸ दोई कुहतो, “नगरारिंङ फलांणा मीहू कछंङ इलजे कुंहई, गुरु कुट्री लेहकी तोह कि, गिऊ ध्याड़ा कछंङ तोह। घेंङौ चेला तंङ साते कांह दोहर फसह ओ त्याहर मनापोग।”

¹⁹ दंङ चेलाज़ि यीशु गप्पा मनेके फसह त्याहोरो रोटीऊ इंतज़ाम लेह च़रतिर।

²⁰ अपेहल योंकल शुई दुह सनीतिंङ साते बगत ज़ेई बंङज़िरी।

²¹ अपेहल दोरे ज़ेई लेहकी तोईरे दंङ दोई कुहतो, “गेह केतंङ केहतु बिचंङज़ि इच्चे गेह केतंङ साते हेले-हेले कुट्रतग कि केहतु बिचंङ ज़ि इच्च़ा गेह च़ुमज़ि लोहतो।”

²² दिरंङ दोरे महस उदास शुहचे इलिरे, दंङ हरऐके दोबि रुहक्च़ी लेह्तिरे, “हे गुरु छि गेह ता माशुहगा?”

²³ दोई जुबाब रेंई, “अच़ि गेरंङ साते पेतंङ गुहड़ केहते, दोइए गेह च़ुमज़ि लोहतो।

²⁴ गेह मीहू योह सिए योग छना कुचे दि पवित्र शास्त्ररंङ च़ेहसी तोह। दंङ परमेश्वर दुह मीहबी भयानक सज़ा रमतो अच़ि गेह धोखारंङ साते च़ुमज़ि लोहतो। दुह मीह ऊ थल्जी रुठे तोहई कि दोऊ जन्म ए माह शुहचा आ।”

²⁵ दंङ दोऊ च़ुमज़ि लहज़ा यहूदा ज़ि कुहतो, “हे गुरु, छि गेह ता माशुहगा?” दोई दोहरंङ कुहतो, “केई दिह गप्पा मनेकतङ।”

प्रभु भोज

²⁶ अपेहल दोच़ी ज़ै लेहकी तोईरे दंङ यीशुज़ि रोटी लेहप्ती दंङ परमेश्वरो धन्यवाद लहच़ी रोटी खंणी लहरी दंङ एनोह चेला तिंङ रेह कुट्री लेहती, “हाँ ज़ि, दि रोटी गिऊ फुक चेहके ज़ै च़रतुंई।”

²⁷ दंङ यीशुज़ि दाखो रसो बट्रढा गुहड़िंङ लहरी दंङ परमेश्वरो धन्यवाद लहच़ी एनोह चेला तु हखा रेंई दंङ चेलारे दुह बट्रढो दोहरची बारी-बारी तुंङमी लेहतिर।

²⁸ दंङ यीशुज़ि कुतोह, “दि दाखो रस बि केहच़ी वाईदो गिऊ शुहई ञेंए च़रतुंई अंऊ महसे मीहतिंङ दोतु पापो सज़ाओ दोहरची माफी ऊ थल्जी बहाएकचिमी तोत। दिह दुह वाईदा बि पूरा लोहतो अंऊ परमेश्वरे एनोह मीहरंङ साते बणाएठ्रा।

²⁹ गेह केतंङ साते हेले कुट्रातग कि दाखो रस दुह ध्याड़ा तचेक मा तुंङमोग अपेहल तचेक केतंङ साते घेंङौ बाहऊ राजंङ खरकोई मा तुंङमोग।”

³⁰ दंङ यीशु ए दोऊ चेलारे परमेश्वरो भजन कुचे जैतून मिन्दु गोहू टोईच़ी इलि।

पतरसो इन्कार लहज़िमी भविष्यबाणी

³¹ दंङ यीशुज़ि दोतंङ कुहतो, “केहच़ी भत्तेज़ि तोगे राता रिंङ गिऊ ठोकर जोंओंई, छना कुचे पवित्रशास्त्रंङ च़ेहसी तोह; गेह पोहाल सपोग, दंङ थाचो त्रैंईरे देखा नोखा शुहचे योर।

³² पर गेह गिऊ श्रींङमी थल केहतु तुई गलीलो हखा योग।”

³³ दिरंङ पतरसे दोरंङ साते कुतोह, “अगर भत्तेज़ि कांह बजाहज़ि ठोकर जोओर ज़ेईरंऊ, पर गेह अपेहला ठोकर माह ज़ोग।”

³⁴ दि रेड्रा यीशुज़ि पतरसो हखा कुतोह, “गेह करंङ साते हेले-हेले कुट्रातग कि तोग ए रातारिंङ कुकड़ो झुह्ट फेरा बांग रंड्री बे तुई केई श्रुम फेरा केनोह आहच़ि दिह कोहन कि, केई गिह्बी माह ञेंन।”

³⁵ पतरसे कुहतो, “अगर गिह्बी करंङ साते सीए इबि ला शुई, तांला गेह करंङ अपेहला माहनुकरेकपोग।” दंङ ध्वांए भत्ते चेलाज़ि कुतेर।

गतसमनी रिंङ प्रार्थना

³⁶ दंङ यीशु ज़ि एनोह चेला तंङ साते गतसमनी मिन्ज़ी ठारिंङ अति, दंङ एनोह चेला तिंङ कुट्री लेहती, “देहर बंङज़ुंई, दोहथल तचेक गेह दोहर इलजे प्रार्थना लोहग।”

³⁷ दंङ यीशुज़ि पतरस जब्दीऊ झुल्ला योहरे साते रेंज़ा शिली, दंङ यीशु महस ए दुखी शुबि लेहती।

³⁸ दंङ दोई कुतोह, “गिऊ सेहम महसे दुखी तोह, देर तचेक कि गिऊ प्राण लाह हुंज़ी लेहकी तोह। केरे देहर रुमज़ुंई दंङ गेरंङ चेहकी बंङज़ोंई।”

³⁹ दंङ दुह फोआ तुंखा मोदो भारे शुई, दंङ दिह प्रार्थना लहज़ी लेहती, “हे गिऊ बाह अगर शुहबी तरपा ताह दिह कटोरा गिऊ दोरच़ी टलेके इला तांला गेह छना जुंज़ातेग ध्वांए मा शुह, दंङ केई छी जुंज़ातन ध्वांए ए शुह।”

⁴⁰ दंङ दोई चेला तु कछंङ अंज़े दोरे इमरिंङ खोक्शातो दंङ पतरस रंङ साते कुंई, “छि केरे गेरंङ इच्च़ा घड़ी लाह चेहके माह तिंआ?

⁴¹ चेहकी ए प्रार्थना लहज़ा लोहनी कि केहच़ी परीक्षा रिंङ पड़ेक्ची मेहस। कनु सेहम ता तेयार तोत, पर शरीर कमज़ोर तोह।”

⁴² दंङ दोई अई फेरा इलजे दिह प्रार्थना लहच़ी लेहती, “हे गिऊ बाह अगर दिह गिऊ तुंङे मेह मटेलेकसा ताह दंङ कांह इच्च़ा पूरी शुहचे जूंस।”

⁴³ दोई अंज़े दोरे यहचा इमरिंङ खंणी, छना कुंई साते ता दोतिंङ महसे इम अपि लेहकी तोहई।

⁴⁴ दोरे केह दुह यहचा अच्च़ा इलि, दंङ ध्वांए तीसरा बार प्रार्थना लाहरी।

⁴⁵ दंङ दोई चेला तु कछंङ अंज़े दोतंङ कुह्ते, दाह ईम लांई, ए नाहचुंई; खांई दुह घड़ी पिचे इलज़ा दंङ मीहू योह, पापी तु गुहड़ रिंङ च़ुमसा योतो।

⁴⁶ अहच़ुंई, तुंखा जोनी! खंणु गिह्बी च़ुम्ज़ाड़ कछंङ पिचे इलि

यीशु बि धोखा रंङ साते चुम्ज़ी

⁴⁷ यीशुज़ि झांह कुट्री लेहकी तोहई ध्वांए यहूदा अंऊ अंङषी दोतु बिचंङ इच्च़ा तोहई, दंङ दोहरंङ साते यहुदी मोह्ड़े पुरोहित ए यहुदी सेंहणा दोरच़ी इच्च़ा मोह्ड़े भीड़ तलवारे, लट्टिरे कुरच़ा अतिरे।

⁴⁸ यहूदाज़ि अंऊ दोई दोतु मदत लाहते यीशुबि च़ुमज़िमी थल्जी तुहई ए भीड़ साते कुहषी तहरे, “अतिंङ गेह ग्वाक्षोग दुह ए यीशु शोतो; दोबि च़ुमने च़रतुंई”

⁴⁹ दंङ दोथरे ए यीशु कछंङ अंज़े कुहतो, “गुरु ज़ि!” दंङ दोबि ग्वाक्षे नमस्कार लहरी।

⁵⁰ यीशुज़ि दोबि कुहतो, “हे मित्रा, छि कामो थल्जी अंज़े शुनाह दुह लेह च़रतु।” दंङ दोऊ कछंङ अंज़े यीशु टोईच़ी गुहड़ केह दंङ दुह गिरफ्तार लेह च़रतिर।

⁵¹ यीशुज़ि साथीऊ विचंङ ईदि गुह्ट्र बड़ाके एनोह तलवार हुंज़े च़रति दंङ यहुदी महापुरोहितो दासो टोईच़ी चलाके दोऊ रेहट्रा हुंज़ी केहरी।

⁵² दंङ यीशुज़ि दोबि कुहतो, “केनोह तलवार केह केहू छना कुचे अच़ि तलवार चलाएपोर दोरे भत्ते तलवारे योह्सा तलवारारंङ साते नाश शुहचे योर।

⁵³ छि केह माञेंहना कि घेंङौ बाहऊ दोहरची बिनती लेह तरच़ातग, दंङ दोई स्वर्गदूता तु सनी पलटन हेंतेग खड़े लेह च़रपोतो?

⁵⁴ पर पवित्रशास्त्रो दुह गप्पारे कि ध्यांए शुहबिमी तोह छना पुरे शोर?”

⁵⁵ दुह मुक्का यीशुज़ि भीड़ो हखा कुहतो, “छि केहच़ी गेह डाकू चेहके गिह्बी च़ुमज़िमी थल्जी तलवार लठी रेह कुरच़ा अन्जी तोतोंई? गेह रोज मंदिरंङ बंङज़ा उपदेश रंड्रातग दंङ केहच़ी गेह माहचुमयेंतंई।

⁵⁶ पर दिह भत्ते दिऊ थल्जी शुहते कि भविष्यवक्तातु वचन पूरा शोतो।” दंङ भत्ते चेलारे यीशुबि केहट्रा दोहरची पोक्शे इलिर।

महासभाओ तुईज़ी यीशु

⁵⁷ दंङ यीशु बि च़ुमज़ार दोबि काईफा मिन्ज़ी यहुदी महापुरोहित ओ चुंङ लेन्ज़ा शीलिरेह, अंऊर यहुदी शास्त्री, पुजारीर ए सेंहणा ठ्रोहका शुहचे तोईर।

⁵⁸ पतरस ऊईतारे-ऊईतारे दोऊ थल-थल यहुदी महापुरोहित ओ ल्वाड़ी तचेक इले। दंङ तोंङ इलजे अंत खड्रीम थल्जी प्यादातंङ बंङज़ा इलि।

⁵⁹ यहुदी मोह्ड़े पुरोहित ए भत्ते यहुदी सभा यीशुबि सच़िमी थल्जी हप्सी गवाही रंड्री लेहती,

⁶⁰ पर महस हप्सी गवाही रंड्रार अपिरंङ साते लाह मखोकसिरे थल मुखंङ झुह्ट मीहरे अति,

⁶¹ दंङ कुह्तोर, “कि दी कुह्ते कि गेह परमेश्वरो मंदिर ठ्रोहआलबी लोहग दंङ दोबि षुमु ध्याड़ो थल बणाके तरपोग।”

⁶² दंङ यहुदी महापुरोहिते सभाओ बिचंङ खड़े शुहचे यीशुरंङ कुह्तोर, “केई छि ला जुबाब मा रंड्रातन? दिहरे मीहरे कनु बिरोधंङ छी गवाही रंड्रातोर?”

⁶³ पर यीशु चुप्पे बंङज़ी। दंङ यहुदी महापुरोहिते दोबि कुह्तोर, “गेह कनिंङ पिंङी परमेश्वरो वाईदा रंड्रातोग कि अगर कांह परमेश्वरो योह मसीह शुनाह ता, दंङ एतंङ कुड़ु।”

⁶⁴ यीशुज़ि दोबि कुहतो, “केह केनेह कुह्चे केहतन; बल्कि गेह केतंङ दिला कुट्रातग कि दिऊ थलबे केहच़ी खमोंई कि गेह मीहू योह, सर्वशक्तिमान परमेश्वरो सुचंङ हासी बंङज़ा राज लोहग, दंङ सर्गंङज़ि डुह बिचंङ अपोग।”

⁶⁵ दिरंङ यहुदी महापुरोहिते रोषेक्च़ा एनोह चोगा ट्रावल्ज़े च़रति दंङ कुंई, “दिह परमेश्वरो बुराई लहतो, दंङ ञेंतिंङ अतु ला गवाही ओ ज़रूरत माह! खांई केहच़ी धले दि बुराई थशातेंई।

⁶⁶ केहच़ी छि चेहच़ातंई?” दोच़ी जुबाब रेंईर, “दी सच़िमी जोगे शुह।”

⁶⁷ दंङ दोच़ी दोऊ मोहदिङ थूह लेह दोबि डुहमशूह केहट्री, दंङ ऊई ज़ि चट्टेक केह कुह्तोर।

⁶⁸ “हे मसीह, ञेंतिंङ भविष्यवाणी लेह कंड्रु कि कांह अच़ि तेंङातोह।”

पतरसो इन्कार लहज़ी

⁶⁹ पतरस धखकते ल्वाड़िंङ तोहई दंङ इच्च़ा मेच़िमी दोऊ कछंङ अंज़े कुहतो, “कांह लाह यीशु गलीली रंङ साते तोईन।”

⁷⁰ दोई भत्ते तु तुईज़ी दि कुचे इन्कार लाहते, “गेह माह ञेंहगा कि केह छि कुट्रातन।”

⁷¹ अपेहल दुह धह्कते डेऊढी हखा इलज़ा दंङ अई दासीज़ि दोबि खांई दोर खड़े मीहज़ी कुहतो, “यताह नासरत ओ यीशुरंङ साते तोहई।”

⁷² दोई कसम लेह यह्च़ा इन्कार लहतो; “गेह दिह मीह माहसेगा।”

⁷³ थोड़े टेमो थल मीहच़ी अरी दोहर खड़े तोईरे पतरसो कछंङ अंज़े दोबि कुह्तोर, “हेले पक्‍का यीशु साथीतु बिचंङज़ि इच्च़ा शुनाह, छना कुचे कांह गप्पा ज़ि कांह भेद कुह्चे रंड्रा।”

⁷⁴ दंङ पतरस कसम ज़े लेहकी तोहई, “गेह दुह मीहबी बिल्कुल माह सेका” दंङ दोहथल कुकुड़ हाऊष रेंई।

⁷⁵ दंङ पतरसबि यीशु कुट्री गप्पा हिद अति; “कुकड़ो झुह्ट फेरा हाऊष रंड्री बे तुई केई षुमु फेरा गिऊ इन्कार लोहुन।” दंङ धह्तेका इलजे हुक्शा, हुक्शा क्रप्चाते।