मत्ती 20 - लाहौली बाइबिल

बगीचा ओ मज़दूरो कथा

¹ “स्वर्गो राज दिह कथाओ ठ्रोह तोह इच्च़ा ज़िमदार मुंजे धकतेखा इलि कि एनोह दाखो बगीचारिंङ कहम लहज़िमी थल्जी मीहरे लगाएपोतो।

² दोई कम लहज़ातिंङ ध्याड़ी इच्च़ा मुलतु टंगा लहतो दंङ दोरे एनोह दाखो बगीचारिंङ चरच़तो।

³ दंङ मुंजे 9 बजे हुंज़ा दोई बज़ारंङ ऊहई मीहरे बेकार खड़े तंङातो,

⁴ दंङ दोतंङ कुहतो, केरे ला दाखो बगीचारिंङ ईलांई, दंङ छि शोतो केतिंङ रमोग। दंङ दोरे ला कम लहज़िमी थल्जी इलिरे।

⁵ दंङ दोई नीरो टेमारिंङ ए ञोंकल कि तीन बजे हरे लाह ध्यांए लहरी।

⁶ लगभग ञोंकल कि पांच बजे दोई ऊहई दोरे खड़े तंङातो, दोतंङ साते कुहतो केरे देर नीरा पूरे छिले बेकार खड़े तोहई? दोच़ी दोबि कुह्तोर, दिऊ थल्जी कि अच़िला ञेंहरे कमारिंङ माह लगाएती।

⁷ दोई दोतिंङ कुहतो केरे लाह दाखो बगीचारिंङ ईलांई दंङ कम लांई।

⁸ ञोंकल कि दुह ज़िमदारे एनोह भंडारीबि कुहतो, अंऊ भत्ते बे थल मुखंङ कम लहज़िमी अंज़े तोईरे दोतिंङ ए तुहई मुखंङ अंज़े कम लहज़ातिंङ ध्याड़ी रेह च़रतु।

⁹ अपेहल दोरे अतिरे अंऊ ञोंकल कि लगभग 5 बजे कमा लगासी तोईरे दोतिंङ पूरा ध्याड़ो इच्च़ा मुलतु टंगा खोकसिरी।

¹⁰ अरी कम लहज़ार मुंजे अंज़े तोईरे दोच़ी चेहकातोर दोतिंङ महस खोकसोतो, पर दोतिंङ ला पुरा ध्याड़ो इच्च़ा मुलतु टंगा खोकसिरी।

¹¹ अपेहल खोकसा इलि दंङ दोरे ज़िमदारो हखा कुड़कुड़ाके कुट्री लेह्तिरे।

¹² दिहरे थल मुखंङ अंज़े दोच़ी इच्च़ा ए घंटा कहम लाहतेर, दंङ तांला केई दोतिंङ ञेंहतु बराबर ए ध्याड़ी रें च़रच़तन, ञेंहच़ी नीरा पूरे कम लहज़ातंई ए ऐके सेहन लहज़ातंई,

¹³ दोहपल बगीचो मालिके दोतु बिचंङ इच्च़ाबि जुबाब रेंई, हे मित्रा, गेह करंङ छल्ले अन्याय माहलग। छि केई ए गेरंङ पुरा ध्याड़ा कम लहज़िमी थल्जी इच्च़ा ध्याड़ाओ ध्याड़ी (इच्च़ा मुलतु टंगा) महकुहतेना?

¹⁴ केनोह ध्याड़ी उठातु, दंङ अच्च़ा ईला; गिऊ हिटी तोह कि अंयों कनिंङ रमोग धोंणे गेह दोतिंङ रमोग अंऊ थल मुखंङ अंज़े तोईरे।

¹⁵ दंङ गिह्बी दि अधिकार तोह कि गेह घेंङौ ढबाह घेंङौ हिटी रंङ साते खर्च लोहग। कनिंङ जलन शुबी मेस छना कुचे गेह ऊईतु थल्जी रुठे तोतोग।

¹⁶ दीह रीति रंङ अरी थलेसी तोतोर दोरे तुंखा शोर; दंङ अरी तुईज़ी तोतोर दोरे थलका शोर।”

एनोह सिमी बारे यीशु अईसंङ भविष्यवाणी

¹⁷ यीशुज़ि यरूशलेम शहरो हखा इलज़ा सनी चेला तिंङ एकांतारिंङ शिल्ज़ी, दंङ अमरिंङ दोतिंङ कुट्री लेहती।

¹⁸ “रेड्रुंई ञेंरे यरूशलेम शहरो हखा य्वातोनि। गेह मीहू योह बि यहुदी मोह्ड़े पुरोहित ए यहुदी शास्त्री तु गुहड़िंङ च़ुमने च़रपोर।

¹⁹ दंङ दोच़ी गिह्बी सच़िमी सज़ा रेह ऊई जातितु गुहड़िंङ रेह च़रपोर कि दोच़ी दोऊ मज़ाक लोहऊर, कोड़ा बाहपोर, दंङ क्रूसो टोईच़ी चड़ाएपोर, दंङ षुमु ध्याड़ारिंङ षीङे योतो।”

इच्च़ा याहो बिनती

²⁰ अपेहल जब्दीऊ झुह्ट योहतु याहज़ि एनोह योहतंङ साते यीशु कछंङ अंज़े फ्यग लहते दंङ दोऊ दोरच़ी छाह पेट्री लेहती।

²¹ यीशुज़ि दोरंङ कुहतो, “केई छि जुंज़ातन?” दोई दोहरंङ कुहतो दिह बचन रंऊ कि, “गिऊ दिकु झुल्ला योहरे कांह राजारिंङ इच्च़ा बि केनोह सुचंङ हासी दंङ ऊईदि बि फुचंङ हासी बेठाके च़रतु।”

²² यीशुज़ि जुबाब रंहदो, “केहच़ी मा ञेंहनी कि केहच़ी छि पेट्रातोनि। अंऊ दुख गिह्बी खोकसिमी तोह छि केहच़ी दुह दुख उठाएपोनि आ?” दोच़ी दोबि कुह्तोर, “वेई उठाएपोनि।”

²³ दोई दोतंङ कुहतो, “केहच़ी गिऊ दुख ता सेहन लेह तरपोंई, पर घेंङौ सुचंङ ए फुचंङ हासी बैठाच़िमी कम गिऊ मशत, पर अतु थल्जी गिऊ स्वर्गो बाहऊ दोरच़ी त्याहर लहसी दिह तोह दोतु ए थल्जी शुह।”

²⁴ दिह रेड्रीरंङ साह चेलारे दोकु न्वातु थल्जी रोहष लहज़ी लेहतिर।

²⁵ यीशुज़ि दोरे कछंङ बुलाके कुट्री लेहती, “केहच़ी ञेंच़ातंई कि अंऊ ऊई जातितु अधिकारी तोतोर दोरे दोतु टोईच़ी जोररंङ साते राज लहज़ातोर, दोच़ी मीहतु टोईच़ी अधिकार लहज़ातोर, दंङ अंऊ दोरे मोढ़े अधिकारी तोतोर, दोतु टोईच़ी एनोह अधिकार कंड्रातोर।

²⁶ पर केहतु बिचंङ झांह माह शोतो; पर अरी लाह केहतु बिचंङ मोह्ड़े शुहबी जुंज़ा, दुह केहतु परगर बणेक्तुंई;

²⁷ दंङ अंऊ ला केहतु दोरच़ी मोह्ड़े शुहबी जूंस, दुह केहतु दास बणेकतु;

²⁸ छना कि गेह मीहू योह; दिऊ थल्जी अंज़े मशुह कि गिऊ सेवा टहल शुहबी जूंस, पर दिऊ थल्जी अंज़े शुह कि सेवा टहल लोहग, दंङ महसतिङ बचाएच़िमी थल्जी घेंङौ जान रमोग।”

झुह्ट काणे तिंङ टिरा रंड्री

²⁹ अपेहल यीशु ए दोऊ चेलारे यरीहो शहरंङज़ि हुंज़ी लेहकी तोईरे, दंङ इच्च़ा मोह्ड़े भीड़ दोतु थले शुहचे इलि।

³⁰ दंङ झुह्ट काणे मीहरे अरी सड़को मुखंङ तोईरे, दिह रेड्रीरंङ कि यीशु इबी लेहकी तोह हऊषेके कुड़िर, “हे प्रभु दाऊदो खानदानो योह ञेंहतु टोईच़ी दया लोहऊ।”

³¹ मीहच़ी दोरे रैहच़ातेर कि चुप्पे शोर; पर दोरे ऊहई लाह हऊषेके कुट्री लेहतिर, “हे प्रभु, रज्ज़ा दाऊदो खानदानो योह ञेंहतु टोईच़ी दया लोहऊ।”

³² दंङ यीशुज़ि खड़े शुहचे, दोरे बुलाके कुहतो, “केहच़ी छि जुंज़ातंई कि गेह केहतु थल्जी लोहग?”

³³ दोच़ी दोबि कुह्तोर, “हे प्रभु दिह कि ञेंहतु टिरारे अल्सी जूंस।”

³⁴ यीशुज़ि दाह चेहके दोतु टिरातिंङ पछ रेंई, दंङ दोरे दोहथरे खंड्री लेहतिरे; दंङ दोऊ थल शुहचे इलिरे।