मत्ती 14 - लाहौली बाइबिल

यूहन्ना बपतिस्मा रंड्राढो हत्या

¹ दुह मुक्का चोथाई देशो रज्ज़ा हेरोदेसे यीशु पाहठी रेड्रा,

² दंङ एनोह परगरातिंङ कुहतो, “दिह यूहन्ना बपतिस्मा रंड्रा शुह, अंऊ सिमी दोरच़ी ला श्रींङे इलज़ा। झांह लेह यीशु दोरच़ी दिह हेरान लहज़िमी ठ्रोह कम प्रगट शुबी लेहकी तोईरे”

³ छना कुचे रज्ज़ा हेरोदेसे एनोह न्वा फिलिप्पुस ओ मेच़ा हेरोदियासो बजहच़ि, यूहन्ना जेलो अंद्रेग केहशी तहरेह।

⁴ छना कुचे यूहन्ना कुहषी तहरेह कि कनिंङ दीह तहच़ि ठीक मशोतो।

⁵ दंङ दोई दुह सच़िमी तारेह पर मीहतंङ साते बेवाते, छना कुचे मीह्जी दुह भविष्यवक्ता ञेंचातेर।

⁶ पर अपेहल रज्ज़ा हेरोदेसो जन्मदिन अन्दे दंङ हेरोदियासो मियोई दोहर गहरछे हेरोदेस खुश लेह केहते।

⁷ दोऊ थल्जी दोई वाईदा जें वचन रेंई, “कि केई छिल्ला जुना गिऊ दोरच़ी पेट्रोंई कनिङ गेह दुह रामोग।”

⁸ दुह एनोह याहऊ उल्लेक्सी कुड़ी, “यूहन्ना बपतिस्मा रनड्राडो पुंज़ा ट्रिकी त्राठिंङ केह देहर हता।”

⁹ रज्ज़ा दुखी शुहचे इलि पर एनोह वाईदाऊ बजहच़ि साते बंङज़ा मीहतु वजाहज़ि कुड़ी रें च़रतुंई।

¹⁰ दंङ जेलंङ मीहरे चरच़े यूहन्नाओ पुंज़ा ट्रिहटी लेह च़रति;

¹¹ दंङ दोऊ पुंज़ा त्राठिंङ ह्न्जे मेच़मी कटु बि रेंहई, दंङ दोई दुह एनोह याह ऊ कछंङ रेंज़ा शिली।

¹² दोऊ चेलाज़ि अंज़े दोऊ फुक शिल्ज़े पथेके चेहच़ातोर दंङ इलजे यीशु बि दोऊ पाहठी कंज़ातोर।

ङा हज़ार मीहतिंङ खिलाच़ी

¹³ अपेहल यीशुज़ि दिह थशातो, दुह किशतीऊ टोईच़ी बंङज़ा दोरच़ी सुनसान ठाहरीरिंङ हखा अह्च़ा इलज़ा। मीहरे दिह रेड्रीरंङ नगरारिंङ-नगरिंङज़ि पैदल दोऊ थले शुहचे इलिरे।

¹⁴ दोई हुंज़ा इच्च़ा मोह्ड़े भीड़ तंङरी, दंङ दोतु टोईच़ी दया लहरी; दंङ; दोई दोतु नत्पारे ठीक लहरी।

¹⁵ अपेहल ञोंकोल शुईता यीशु चेलाज़ि दोऊ कछंङ अंज़े कुह्तोर; “दीह ताह सुनसान ठारी शुह, दंङ झाहड़ा ला शुहबी लेहकी तोह मीहरे याहच़े च़रपोंई ताकि दोच़ी नगरारिंङ इलजे एनातु थल्जी बगत चुम्मोर।”

¹⁶ यीशुज़ि चेला तु हखा कुंई “दोतु इबी ज़रूरी माह! केहच़ी ए दोतिंङ बगत रांई।”

¹⁷ दोच़ी यीशुबि कुह्तोर, “ञेंहतु दोर ङा रोटी ए झुह्ट मह्छ़ तु इलावा ऊहई छल्ले मद।”

¹⁸ यीशुज़ि कुहतो; “दोतिंङ देहर गिऊ हखा हतांई।”

¹⁹ दोई मीहतिंङ षोहड़ीङ श्रांङतु टोहकठे बंङज़िमी थल्जी कुहतो दंङ दुह ङा रोटीए झुह्ट मह्छ़ लेहप्ती, दंङ सर्गो हखा खांई परमेश्वरो धन्यवाद लहरी, दंङ रोटी खन्नी-खन्नी लेह चेला तिंङ रमा लहरी।

²⁰ दंङ भत्ते मीहच़ी खोकटुंङ पिंङे बगत ज़हरिर, दंङ केह्षा इलजी सनी टोकरी उठाएकातेर।

²¹ ज़ज़ाहरे मेच़िमी रे ए कटुतु अलावा लगभग ङा हज़ार गंङमीहरे तोईरे।

यीशु तिऊ टोईच़ी जोई

²² दंङ यीशुज़ि दोहथरे एनोह चेला तिंङ किशती रिंङ चड़ाएकतो ताकि दोरे दुह्बे तुहई दोसी पले हुंज़ी जूंस, अपेहल तचेक कि दोई दोहर रुमज़ा मीहतिंङ बिदा लोहतो।

²³ यीशुज़ि मीहरे याहच़े प्रार्थना लहज़ी थल्जी ऊई गोऊ टोईच़ी अच़ा इलि; दंङ दुह ञोंह्कोलकि दोहर इच्च़ा तोहई।

²⁴ दुह मुक्का किशती गलील झीलो विचंङ छ्वली कुचे तुहरपि लेहकी तोहई।

²⁵ रातो पी पहर यीशु झीलारिंङ तिऊ टोहकठे ज़ोजा चेला तु कछंङ इलि।

²⁶ चेलारे दोबि झीलो टोईच़ी ज़ोई तंङज़िरंङ बेऐ इलदेर। दंङ कुट्री लेहतिरे “दिहता वंङ शुह” दंङ वेऐ हउषारे रंड्री लेहतिरे!

²⁷ यीशुज़ि दोहथल ए दोतंङ साते गप्पा लहरी, दंङ कुहतो थबेंई “याहो लाहनी: गेह शुगाह; बेओंई था।”

²⁸ पतरसे दोबि जुबाब रन्दो, “हे प्रभु अगर कांह ए शुहनाता, गिह्बी केनोह कछंङ तिऊ टोईच़ी जोए अपिमी आज्ञा रंऊ।”

²⁹ यीशुज़ि कुंई, “अता” दंङ पतरस किशतिंङ ज़ि तक्सा यीशु कछंङ इबिमी थल्जी तिऊ टोईच़ी ज़ोई लेहती।

³⁰ अंऊ मुक्का पतरस बि महसूस शुई कि लहन महसे तेज तोह ता दुह बेई इलि, दंङ छना ए तीरिंङ डुमज़े लेहती ता हाऊष रें कुट्री लेहती, “हे प्रभु, गिह्बी बचाएतु!”

³¹ यीशुज़ि दोहथरे गुहड़ तुंखा लेह दुह च़ुमरी, दंङ दोबि कुहतो, “हे विशवास माह लहज़ाड़ा केई छिले शक लहतेन?”

³² अपेहल दोकु किशतीऊ टोईच़ी इलदोर, दंङ लहन चसा इलि।

³³ दिरंङ अरीला किशतीऊ अंद्रेग तोईरे दोच़ी दोबि फ्यग लेह कुड़िर; “काह हेले परमेश्वरो योह शुनाह।”

गन्नेसरतंङ टेहषी दोतिंङ अईन लहज़ी

³⁴ यीशु ए दोऊ चेलारे दोसी तक्सा गन्नेसरत प्रदेशंङ अतिर।

³⁵ दंङ दोहर मीहच़ी दुह सेहच़े भत्ते ठाहरीरिंङ उजाब च़रतिर, दोच़ी भत्ते नत्पारे दोऊ कछंङ रेंज़ा हतिरे।

³⁶ दंङ यीशुरंङ साते बिनती लाहरिरे कि दोतिंङ केनोह खमज़ेतु मुखऐ थोक्च़ी रंऊ दंङ अच़िला दुह थोकातेर भत्ते अईन शुहचे इलिरे।