इब्रानियों 6 - लाहौली बाइबिल

¹ झांह लेह हेंज़ी अंऊ भत्ते बे तुहई मसीहू पाहठी सिखेक्तेंई दू ए मुयांदो शिक्षा दोहरगी माह तोहनि; झांह लेह अतंई हेनर दू मुयांदी शिक्षा बे तुंखा शुहचे शिक्षा ओ पाहठी विचार लोहनि। हेंदिंङ यह्च़ा दि गप्पा शुरू लहज़िमी ज़रूरत माह, कि हेंदु मदम कमो दोरच़ी पश्चाताप छना लहज़ी जूंशी तोह, दंङ परमेश्वरो टोईच़ी छना विशवास लहज़ी जूंशी तोह।

² दंङ हेंदिङ बपतिस्मा ओ पाहठी, दंङ अतुआ टोईच़ी गुह्ड़ केहच़ी आशीष रंड्रीमी पाहठी, दंङ सिए दोतु बिचंङ ज़ि श्रींङमी पाहठी, दंङ अन्तिम फेंसलाऊ शिक्षा ओ मुयांद यह्च़ा केट्रिमी ज़रूरत माह।

³ अगर परमेश्वरे हेंदिंङ मौका रमतो ता, दंङ हेनर पक्‍का शिक्षाओ हखा तुंखा बड़ेक्पोंई।

⁴ अंऊ मीहरे एनोह विशवास छोड़ेके चरच़ातोर, दोतिंङ यह्च़ा पश्चाताप ओ हालातरिंङ वापिस हपि मरच़ि। दोच़ी इच्च़ा फेरा परमेश्वरो सच्चाई ञेंई चरच़ातोर, अंऊ परमेश्वरे तरफे अपा, दंङ दोतिंङ स्वर्गो दोरच़ी वरदान खोकसा तोह दंङ दोतिंङ ऊईतु दोरच़ी वरदान ला खोकसा तोह।

⁵ दोच़ी महसूस लहसी तातोर कि परमेश्वरो तरफे अंजा खबर रूठे तोह दंङ दोच़ी अंजा दू सामर्थो ला अनुभव लहसी तातोर।

⁶ दोतिंङ यह्च़ा वापिस हपिमी छल्ले अम माह छना कुचे दोरे ध्वांए ए तोतोर छना कि दोरे ए यह्च़ा परमेश्वरो योह बि क्रूस ओ टोईच़ी चढ़ाएच़ा तोर दंङ ऊई ज़ि मसीहू मज़ाक लहज़िमी वहज़ा बणेकपातोर।

⁷ अंऊ मीहतिंङ रूठे शिक्षा खोकसा तोह, दोरे दू धरती ऊ ठ्रोह तोतोर अंऊर महस संदाण अपा। अगर ज़मीन रूठे तोह ता दंङ दोई ज़िमदारा बि रूठे फसल रंड्रा दंङ दिऊ टोईच़ी परमेश्वरो आशीष शवाह।

⁸ ऊई मीहरे ज़मीनो ठ्रोह तोतोर अंऊ छ्वक ए पोंड्रातंई, अंऊ दोतु छल्ले लस माह। दि परमेश्वरो दोरच़ी शापित शुहबिमी खतरा रिंङ तोतोर दंङ दि मेह रंङ साते योह्सा योतो।

⁹ पर हे गिऊ प्यारे साथी विशवासी रे, केहच़ी रूठे कम लहज़ातंई। छना कुचे परमेश्वरे तुहई ए केतिंङ बचाके चरच़तो। झांह लेह दि खबरदार लहज़ी केहतु थल्जी मशत।

¹⁰ छना कुचे केहच़ी रूठे कम लहज़ातंई दंङ हेंतेग ला केरे परमेश्वरो मिंदंङ परमेश्वरो मीहतु थल्जी दाह रंङ साते सेवा ओ कम लहज़ी लेहकी तोतोंई, झांह लेह परमेश्वर केतिंङ पेषतो माह छना कुचे दू धर्मी तोह।

^11-12 ञेंहच़ी माह जुंज़ातंई कि केरे सुस्त शुई। पर ञेंहच़ी जुंज़ातंई कि केहच़ी महस मेहनत लहज़ा तु ठ्रोह दाह ओ कम लहज़ी ज़ारी तंही, थल मुक्का तचेक धीरज़ ए विशवासा रंङ पक्‍का बणेंके बंङज़ेंई। दंङ पक्‍का उम्मीद तंही ताकि परमेश्वरो वाईदा बि खोक्शे तरपोंई।

परमेश्वरो अटल प्रतिज्ञा

¹³ परमेश्वरे अंऊ मुक्का अब्राहमा रंङ साते वाईदा लहरी, दंङ दोई एनोह मिन्दु कसम लहरी; छना कुचे दोबि ला मोह्ड़े अरिला माह तोहई, अतु मिन लेहपच़ी दोई कसम लोहतो।

¹⁴ दंङ दोई कुई, “गेह हेले कनिंङ महस आशीष रमोग, दंङ कनु खानदान बढ़ाएफा लोहग।”

¹⁵ अब्राहमे धीरज़ा रंङ साते लम्हें टेम तचेक इंतज़ार लहरी। दोहपल दोइ, दू खोकसिरी अतु वाईदा परमेश्वरे दोरंङ साते लाहते।

¹⁶ कसम लहज़ी बे तुहई मीहरे हमेशा एनाह बे मोह्ड़े मीहू मिन लेहपच़ी। कसमे दि साबित लहज़ी कि छि दोई कुट्रा दू हेले शुह, दंङ दी हर इच्च़ा झगड़ा योह्च़े चरच़ि।

¹⁷ झांह लेह परमेश्वरे ला इच्च़ा कसम लहरी। दिऊ दोरच़ी दोई दू मीहतिंङ अंऊ दोतंङ वाईदा लहसी तोह दि कंड्री तते कि दोई दोबि पूरा लोहतो अतु दोई वाईदा लहसी ततो।

¹⁸ दंङ देर यह्च़ा झुह्ट गप्पो ज़िकर तोह, इच्च़ा दोऊ वाईदा, दंङ अई दोऊ कसम, अंऊ अपेहल ला लेहक्सतो माह दंङ अतु पाहठी परमेश्वर अपेहल ला हप्सी कुट्री मरपोतो। झांह लेह अंऊ हेनर परमेश्वरो कछंङ सुरक्षा खोकसिमी थल्जी अंज़े शुहई दंङ अंऊ उम्मीद दोई हेंदिंङ रांहषी ततो, दोबि चुमज़ा बंङज़ा तोंहि, दंङ हेनर महस खुश तोतोंई।

¹⁹ छना इच्च़ा मोह्ड़े मेखा रंङ छ़ुह्च़ी राह्शी किशती बि खड़े ए पक्‍का लेह तहज़ा, ध्वांए दि उम्मीद हेंदु जहान बि खड़े ए पक्‍का लेह तहज़ा तोह, अंऊ दोरच़ी हेंज़ी उम्मीद लोहवातंई दू यीशु शुह; अंऊ स्वर्गंङ महापवित्र ठाहरीरिंङ परमेश्वरो कछंङ इलजी तोह।

²⁰ यीशु हेंदु बे तुंखा ए दंङ हेंदु थल्जी स्वर्गंङ इलि। दू पुरोहित मलिकिसिद्को ठ्रोह हमेशा ओ थल्जी यहुदी महापुरोहित बणेंके इलि।