इब्रानियों 12 - लाहौली बाइबिल

परमेश्वर हेंदु बाह

¹ हेंदु कछंङ झांह ठ्रोह महस मीहरे तोतोर अंऊ दोतु विशवासे दि कंड्रा कि विशवासो मतलब छि शुहबी। दिऊ थल्जी अतंई हेंज़ी हर इच्च़ा रूकावट दंङ पाप बि शत्‌ह लेह, हेंदिंङ अंऊ अमरिंङ जोज़िमी तोह, दोऊ टोईच़ी जोज़ातंई।

² हेंदिंङ यीशु तरफे खंड्री जूंशी तोह, अंऊ हेंदिंङ विशवासो दोरच़ी तुंखा बढ़ाएच़ा दंङ हेंदु विशवास पूरा लहज़ा। दोई षेह्पिमी छा चिंद माह लहच़ी ते क्रूसो दुख सहन लहरी दंङ सिए इलि; छना कुचे दोई ञेंहच़ाते कि दोई झांह लहरी। हेंतेग दू परमेश्वरो सिंहासनो सुचंङ हासी बंङज़ा तोह।

³ यीशु उदाहरणो पाहठी सोचेक्तुंई, कि दोई दू पापी तु थल्जी अंयों सहन लहरी अंऊ दोरंङ धोंण नफरत लहज़ातेर। दोई दिऊ थल्जी दुख सहन लहरी, ताकि केरे निराश शुहचे हिम्मत छोड़ेके माह केईनि।

⁴ अपेहल केरे बुराई ओ ताकतो खिलाप संघर्ष लहज़ातंई दंङ केहच़ी झांह ठ्रोह लड़ाई माह लड़ेकातंई, कि केरे सिए योंई।

⁵ पर केरे दू हिम्मतो उपदेश पेहषा इलजी तोतोंई, अंऊ परमेश्वरे केतिंङ एनोह योह चेहके ते रंदे, “हे गिऊ योह, अपेहल प्रभु ज़ि केतिंङ दि एहसास दिलाएच़ा कि केहच़ी गलत लाहतंई, दंङ अपेहल दोई केतिंङ रैहच़तो ता केहच़ी हिम्मत छोड़ेक्तुंई था।

⁶ छना कुचे प्रभु अतंङ साते दाह लहज़ा, दोबि रोहष ला लहज़ा, अतिंङ परमेश्वर एनोह योह चेहच़ा दोबि सज़ा ला रंड्रा।”

⁷ केरे अंऊ दुख सहन लहज़ातंई, दोबि परमेश्वरो रैहच़ी ञेंहनि; परमेश्वर केतिंङ योह चेहके केतंङ साते झांह ठ्रोह बर्ताब लहज़ा। दू अरि योह शुह, अपि दोऊ बाह ज़ि रैहच़ा माह।

⁸ अगर दू रोहष अंऊ भत्ते तिंङ खोकसा, केतिंङ माह खोकसा, दंङ केरे परमेश्वरो सच्चा योह माह शुई।

⁹ पर अपेहल कि हेंदु फुको बाह ज़ि ला हेनर रैहच़ते दंङ हेंज़ी दोऊ आदर लाहतंई, दंङ हेंदिंङ हेंदु स्वर्गीय बाहो अंयों आदर लहज़ी जूंशी तोह दंङ हेले दुह हेंदिंङ सुधारेक्पोतो, दोहपल हेनर दोऊ गप्पा रेड्री जूंशी तोह ताकि हेनर हमेशा ओ थल्जी श्रींङी बंङज़ोंई।

¹⁰ हेंदु संसारिक बाह छना दोबि महस रूठे अति, हेंदिंङ थोड़े टेमो थल्जी रैहच़ते कि हेनर दोऊ पवित्रता रिंङ भागीदार शुहचे योंई।

¹¹ अंऊ मुक्का रैहच़ा तोर, दू मुक्का दू रैहच़ी रूठे माह च़ेहसा, बल्कि दोई रें दुख शवाह पर थले, अपेहल हेनर दोऊ दोरच़ी सिखेक्च़ातंई दंङ दू मुक्का शांति खोकसा, छना कुचे हेनर रूठे रंङ श्रींङमी शुरू लहज़ातंई।

खबरदार बंङज़ुंई

¹² दि भत्ते गप्पातु वहज़ा ज़ि, पक्‍का शुचि इलांई दंङ केनातिंङ याहब रम्मा लंहि।

¹³ दंङ देर ए नोर खंड्रिमी बे ता, यीशु कछंङ पिचा सीधा अमरिंङ ज़ोवा लंहि ताकि हेंदु बिचंङ अंऊ मीहरे आत्मिक तरीका रंङ कमज़ोर तोतोर, दोरे भटकेच़ी मेस, पर दोतु विशवास पक्‍का शुहबी जूंस।

¹⁴ भत्ते तंङ साते मेल मिलाप तंही, दंङ पवित्र जीवन श्रींङमी हर पाहठी कोशिश लोहवा लंहि। दू मेह अच़िला प्रभु बि अपेहल खंई माह रपोर।

¹⁵ खबरदार बंङज़ुंई, झांह शुहबी मेस कि अरिला मीह परमेश्वरो मोह्ड़े दाह मेह केहषा योतो। दंङ ध्यान रांई कि अंऊला मीहबी अविशवासारिंङ कडगी ब्रन्ज़ ठ्रोह बणेक्पी थारांई अंऊ दोऊ ज़हर रंङ साते महस परेशानी वहज़ा बणेंके यवाह, अंऊ दोरच़ी दू मीह परमेश्वरो दोरच़ी शत्‌ह शुहचे योतो।

¹⁶ केहतु बिचंङ अरिला मीह झांह मीह कुकम लहज़ा शुहबी मेस, दंङ माह ए अब्राहमो पोत्र, एसावो ठ्रोह अधर्मी शोतो, छना कुचे दू जेठे योह तोहई, दोबि खास उतराधिकारी शुहबी हक तोहई पर दोई दू जन्मसिद्ध अधिकारो इस्तेमाल माह लहरी दंङ दिऊ थल्जी दोई एनोह कवचि न्वा याकूबा बि सिर्फ इच्च़ा बगतो थल्जी लंङे च़रति।

¹⁷ केहच़ी ञेंहनि, कि अपेहल दोई थले एनोह बाह इसहाको दोरच़ी आशीष खोकसी जुंज़ाते, दंङ दोबि माह खोकसिरी, दंङ मिक्ति, बहेगी ला दू आशीष बि एनोह हिस्सा रिंङ लेह मरति।

¹⁸ केरे सीने गोह कछंङ माह अतिन, अपि खंड्री ए थोक्च़ी तरच़ी तोहई, देर माह महस मेह या रोहकी डुह या लन्न माह तोहई, दंङ मीहरे झांह ठ्रोह ठाहरीरिंङ तोईरे अंऊर परमेश्वरे एनोह कानून रांई।

¹⁹ केरे तुरही ओ सग ए कुट्रा दोऊ शब्दो कछंङ माह ञेंहनि, अतु रेड्रा दोच़ी विनती लाहतेर, कि हेंतेग ञेंहतु हखा ऊई गप्पा थालोहू।

²⁰ दोच़ी दि दिऊ थल्जी कुइरे, छना कुचे दोरे दि हुकुम बि सहन लेह मरतिरे अंऊ परमेश्वरे दोतिंङ रंदे। “अगर घ्वांण ला दि गोह बि थोक्पोर, ता दू रघटु वहज़ा ज़ि सिए योतो।”

²¹ दंङ दू दर्शन झांह ठ्रोह बेह्द अंज़े तोहई, देर तचेक कि मूसा ज़ि ला कुई, “गेह महस बेवातग ए डगेक्पातग।”

²² पर केरे सिय्योन गोह कछंङ अंज़े तोतोंई, अंऊर स्वर्गीय यरूशलेम तोह, अंऊ श्रींङे परमेश्वरो शहर शुह, अंऊर लख स्वर्गदूता रे खुशी ऊ त्याहरो मनेक्च़ातेर।

²³ केरे परमेश्वरो जेठे दोतु सभा रिंङ अंज़े शुई, अंऊ दोतु मिन स्वर्गारिंङ च़ेहसी तोह। केरे केनर परमेश्वरो कछंङ अंज़े शुई, अंऊ भत्ते मीहतु न्याय लहज़ा। केरे स्वर्गंङ धर्मी मीहतु आत्माओ कछंङ अच़ा अंज़े तोतोंई अंऊ दोतिंङ हेंतेग सिद्ध बणाके केहषी तोह।

²⁴ केरे यीशु कछंङ अंज़े शुई अंऊ परमेश्वर ए मीहतु बिचंङ खरकोई वाईदा ओ बिचवाई लहज़ा, दंङ पुरच़ि शुहई कछंङ अंज़े तोहई, अंऊ हाबिलो शुई ओ ठ्रोह क्रपिमी वहज़ा पाप माफ लहज़िमी गप्पा लहज़ा।

²⁵ खबरदार बंङज़ुंई, दंङ परमेश्वर अंऊ केतंङ साते कुट्रा दोऊ हुकुमो भाषे लंहि। इस्राएलो मीहतिंङ सज़ा खोकसिरी अपेहल दोच़ी मूसा ओ चेतावनी रेड्रीमी दोरच़ी इंकार लेह च़रतिर। दिऊ थल्जी दि ञेंहतु थल्जी महस मदम शोतो अगर हेनर परमेश्वरो हुकुम भाषे माह लहज़ातंई अंऊ हेंदिंङ स्वर्गंङ ज़ि चेतावनी रंड्रा।

²⁶ अपेहल परमेश्वरे सीने गोह दोरच़ी गप्पा लाहते, दंङ दू मुक्का दोऊ सगो दोरच़ी धरती त्रुलज़े इलि, पर हेंतेग दोई दि वाईदा लहसी ततो कि, “इच्च़ा फेरा यह्च़ा, गेह माह सिर्फ धरती पर सर्ग ला त्रुलज़े लेह च़रपोग।”

²⁷ दंङ दि बोल, “इच्च़ा फेरा यह्च़ा,” दि गप्पा बि कंड्रा, कि बणाषी चीज़ारे त्रुलज़े योर दंङ ऐखा लेह केऊर। ताकि अंऊ चीज़ारे त्रुलज़े मरपोरे, दोरे हमेशा बणेंके बंङज़ोर।

²⁸ हेंदिंङ अंऊ राज खोकसा तोह, दू त्रुलज़िमी जोगे माह, झांह लेह हेनर परमेश्वरा बि धन्यवाद रम्मा लोहनि, दंङ दोऊ हिटी ओ हिसाबे भक्ति ए अराधना लोहनि, अंऊ दिरंङ दू खुश शवाह।

²⁹ छना कुचे हिद तंही कि हेनर अंऊ परमेश्वरो सेवा लहज़ातंई, दू इच्च़ा मेहू ठ्रोह तोह अंऊ अपवित्र शुचाह हर इच्च़ा चीज़ भस्म लेह च़रच़ा।