इब्रानियों 10 - लाहौली बाइबिल

सिद्ध बलिदान

¹ मूसा ओ दोरच़ी रांहषी कानून सिर्फ दू रूठे चीज़ तु इच्च़ा सिलमोग शुह अंऊ भविष्य रिंङ अपिमी तोह, दि हेले माह। झांह लेह कानूनो अधीन बंङज़ा मीहरे हर साल इच्च़ा बराबर बलिदान चढ़ाएच़ा तोर, पर दि बलिदान दू मीहतिंङ अपेहल ला सिद्ध बणाके मरपोतो अंऊ परमेश्वरो अराधना लहज़िमी थल्जी दोऊ कछंङ अपातोर।

² अगर कानून दोतिंङ सिद्ध बणाएषी तरपोतो, दंङ बलिदान चढ़ाएसी बन्द शुहचे इबि तोहई। अराधना लहज़ा हेलेरिंङ एनोह पापो दोरच़ी शुद्ध इलजी शुचंङ दंङ दोरे तुंखा पापो दोष महसूस माह लांईया।

^3-4 पर बलि अपेहल ला पाप शत्‌ह लेह मरच़ि। बल्कि हर साल दू पापो हिद रंड्रा ला अंऊ दोच़ी लहज़ातेर।

⁵ झांह लेह अपेहल संसारारंङ अति, दंङ दोई परमेश्वरो हखा कुई, “केई माह जुंज़ातन कि मीहरे कनिंङ बलिदान ए तग चढ़ाएपोर, पर केई गिह्बी बलिदान लहज़िमी थल्जी इच्च़ा फुक रांहषी तातन।”

⁶ काह, भत्ते जानवरा बि रोह्चे ते बलिदानो दोरच़ी दंङ पाप शत्‌ह लहज़िमी दोरच़ी खुश माह शुहबी।

⁷ दोहपल मसीह ज़ि परमेश्वरो हखा कुई, हे परमेश्वर खंणु, गेह दू ए लहज़िमी थल्जी अंज़े शुगाह अंऊ केई जुंज़ातन। छना गिऊ पाहठी दि गप्पा पवित्र शास्त्रा रिंङ च़ेहसी तोह।

⁸ मूसा ओ कानून कंड्रा, कि “पाप ओ वहज़ा ज़ि तग ए बलिदान चढ़ाएसी जूंशी तोह। पर मसीह ज़ि दि गप्पातु पाहठी छारिंङ कुहतो कि परमेश्वरा बि दितु ज़रूरत माह?”

^9-10 दंङ दोई कुई, “हे परमेश्वर खंणु, गेह दू ए लहच़ी अतिगा अंऊ केई जुंज़ातन।” परमेश्वर बलिदान बे तुहई कानून योह्च़े च़रच़ा ताकि दोई इच्च़ा खरकोई कानून बणाके तरपोतो। दंङ दिऊ थल्जी, हेनर यीशु बलिदानो दोरच़ी पवित्र शुहचे इलांई अंऊ मसीह ज़ि एनोह फुको दोरच़ी अई इच्च़ा फेरा चढ़ाके चरच़तो।

¹¹ हर इच्च़ा यहुदी पुरोहित हर ध्याड़ा वेदी ओ तुईज़ी खड़े शवाह दंङ मीहतु पाप शत्‌ह लहज़िमी थल्जी विधि पूरा लहज़ा। दू लगातार इच्च़ा ठ्रोह बलि चढ़ाएच़ा अंऊ अपेहल ला दू मीहू पाप शत्‌ह लेह माहरच़ा अंऊ दोई लहसी ततो।

¹² पर हेंदु यहुदी पुरोहित यीशु मसीह ज़ि हेंदु पापो माफी ओ थल्जी एनाबि हमेशा ओ थल्जी सिर्फ इच्च़ा बलिदानो रूपारिंङ चढ़ाके च़रति। दंङ हेंतेग दू बाह परमेश्वरो सुचंङ हासी सिहासनो टोहकठे इज्ज़तदार ठाहरीरिंङ बंङज़ा इलजी तोह।

^13-14 छना कुचे मसीह ज़ि एनाबि सिर्फ इच्च़ा फेरा बलिदानो रूपारिंङ परमेश्वरा बि रें चरच़तो दंङ झांह लेह दोई मीहतिंङ पवित्र लेह च़रति दंङ दोरे हेले रिंङ हमेशा ओ थल्जी धर्मी बणेंके इलिर दंङ दोर्तिंङ एनोह भत्ते बैरीतिंङ एनोह अधीन लहज़िमी थल्जी रूमज़ा तोह।

¹⁵ पवित्र आत्मा ला हेन्दिंङ दि कंड्रा कि दि हेले शुह। प्रभु परमेश्वरो दू वाईदा हिद लंहि अतु पाहठी गेह तुहई कुहषी ताहरेग।

¹⁶ “यह्च़ा प्रभु ज़ि कुट्रा कि” “अंऊ खरकोई वाईदा गेह दू ध्याड़ो थल इस्राएलो मीहतंङ साते लोहग, दू दि तोह कि गेह घेंङौ कानून दोतु सेहमो टोईच़ी च़ेओग, दंङ गेह दोतु अन्तरात्मा रिंङ केहऊ।”

¹⁷ परमेश्वरे दि ला कुट्रा, “गेह दोतु पाप, दंङ दोतु मदम यह्च़ा अपेहल ला हिद माहलग।”

¹⁸ दंङ हेंतेग परमेश्वरे हेंदु पाप माफ लेह चरच़तो दंङ हेंतेग हेंदिंङ छल्ले बलिदान लहज़िमी ज़रूरत माह।

परमेश्वरो कछंङ इलांई

¹⁹ झांह लेह, हे गिऊ प्यारे साथी विशवासी रे, यीशु ज़ि हेंदु थल्जी एनोह जीवन बलिदान लेह च़रति, हेंतेग हेनर याहबा रंङ साते स्वर्गंङ परमपवित्र ठाहरीरिंङ प्रवेश लेह तरपोंई।

²⁰ इच्च़ा बलिदानो रूपारिंङ सिए ते, यीशु मसीह ज़ि स्वर्गो पवित्र तम्बू पर्दा रिंङ प्रवेश लहरी दंङ खरकोई अम बणाके च़रति अंऊ दोरच़ी हेंदिंङ जीवन खोकसोतो।

²¹ झांह लेह हेंदु कछंङ इच्च़ा झांह ठ्रोह यहुदी पुरोहित तोह अंऊ परमेश्वरो चुंङ राज लहज़ा।

²² दंङ अतंई हेनर, मसीहू शुई पुरच़ि ते हेंदु सेहम शुद्ध लहच़ी दंङ साफ ती रें हेंदु फुक शुहल्ज़े संङा सेहम ए पक्‍का विशवासा रंङ साते परमेश्वरो कछंङ योंई।

²³ हेंतेग हेनर बिना छा शक मेह हेंदु दू उम्मीद रिंङ अटल बंङज़ोंई, छना कुचे हेनर परमेश्वरो टोईच़ी दोऊ वाईदा पूरा लहज़िमी थल्जी विशवास लेह तरपोंई।

²⁴ अतंई हेनर इदि-अई दिरंङ साते दाह ए रूठे कमो दोरच़ी इदि-अईदि बि याहब रम्मा लोंहि।

²⁵ अतंई हेनर परमेश्वरो अराधना लहज़िमी थल्जी ठ्रोहका शुहबी छोड़ेक्पोंई माह, छना कि रें मीहच़ी लहज़ातोर। पर हेंदिंङ इदि-अईदि बि याहब रंड्री जूंस दंङ चेतावनी रंड्री जूंशी तोह, खास लहज़ी हेंतेग कि अपेहल यह्च़ा प्रभु वापिस अपिमी ध्याड़ा कछंङ अपि लेहकी तोह।

²⁶ हेंदिंङ दि कम लहज़ी जूंशी तोह, छना कुचे रूठे खबरो सच्चाई ञेंई थल, अगर हेनर ञेंई ते पाप लहज़ातंई, झांह ठ्रोह छल्ले बलिदान माह अच़ि हेंदु पाप शत्‌ह लेह तरपोतो।

²⁷ बल्कि, दोतिंङ सिर्फ परमेश्वरो न्याय ए भयानक मेहू उम्मीद लहज़ी जूंशी तोह दंङ दोतिंङ नाश लेह च़रपोतो छना कुचे अंऊ दोच़ी परमेश्वरो विरोध लहज़ातोर।

²⁸ अंऊ ला मीह मूसा ओ कानूनो भाषे माह लहज़ाते, दोबि झुह्ट या षुमु मीहू गवाही खोकसिमी थल, दाह मेह सच़ी चरच़ातेर।

²⁹ अगर मूसा ओ कानूनो हिसाबे झांह ठ्रोह सज़ा तोहई, दंङ दू मीहू सज़ा महस मोह्ड़े शोतो अंऊ परमेश्वरो योह अपमान लहज़ा। दोई परमेश्वरो योह बि एनोह कोंज़ो पोयंङ नुच़िह चरच़तो छना कुचे दोई दोऊ आदर-सत्कार माह लहरी। दोई मसीहू दू शुहई अपवित्र ञेंहरी अतु दोरच़ी परमेश्वरे दोबि पवित्र बणाएच़िमी वाईदा शुरू लाहते। दोई पवित्र आत्माओ अपमान लहरी अतु दोरच़ी दोई मोह्ड़े दाह खोकच़ातंई।

³⁰ छना कुचे ञेंहच़ी परमेश्वरा बि ञेंहच़ातंई अच़ि कुट्राते, “बदला लेहपच़ी गिऊ कम शुह, गेह ए बदला लेहपोग।” दंङ पवित्र शास्त्रा रिंङ दि ला कुहषी तोह, कि “प्रभु एनोह मीहतु फेंसला लोहतो।

³¹ श्रींङे परमेश्वरो गुह्ट्रे सज़ा खोकसी इच्च़ा महस भयानक गप्पा शुह।”

³² पर केहच़ी दू शुरूआतो ध्याड़ो पाहठी सोचेक्तुंई अपेहल केहच़ी पहली बार मसीहू पाहठी ञेंईनि। केहच़ी महस दुखारंङ साते खरे कष्ट लाहतंई, पर केरे विशवासा रिंङ पक्‍का बणेंके तोईनी।

³³ रेह बिचंङ ता झांह शुई कि, कि केरे अपमान ए अत्याचार सहन लहज़ा भत्ते तु तुईज़ी तमाशा बणेंके इलांई, दंङ रें बिचंङ केरे दू मीहतु बिचंङ शामिल शुहचे इलांई अंऊ दोतु अपमान शवाते दंङ अंऊ दोतंङ साते मदम बर्ताब शवाते।

³⁴ केरे कैदी तु दुखा रिंङ ला दुखी शुहचे इलिन, दंङ केनातु टंगा ढबाह ला खुशी रंङ लुटाके च़रतिन; छना कुचे केहच़ी ञेंहच़ातंई कि केहतु कछंङ हेंतेग ला दू चीज़ारे तोतोर अतु वाईदा परमेश्वरे लाहते, अंऊ कि महस खास तोह दंङ हमेशा ओ थल्जी बणेंके बंङज़ा।

³⁵ झांह लेह अपेहल मीहरे केतिंङ सताएपोर, दंङ केनातु याहब था छोडे़क्तेंई ताकि केतिंङ परमेश्वरो तरफे इच्च़ा मोह्ड़े ईनाम खोकसोतो।

³⁶ झांह ठ्रोह टेमारिंङ केतिंङ विशवास धीरज़ा रंङ सहन लहज़िमी ज़रूरत तोह, ताकि केरे परमेश्वरो हिटी पूरे लेह तरपोंई। दोहपल केतिंङ दू भत्ते खोकसोतो अतु परमेश्वरे वाईदा लहसी ततो।

³⁷ छना कुचे, पवित्रशास्त्रा रिंङ च़ेहसी तोह, “हेंतेग महसे थोडे़ टेम केहषा इलज़ा, अपेहल कि अंजा दुह अपतो, ख्राह माह लोहतो।”

³⁸ पर गिऊ मीहरे अंऊ विशवासो दोरच़ी धर्मी बणाके इलजी तोतोर, श्रींङे बंङज़ोर, अगर अच़िया परमेश्वरो टोईच़ी विशवास लहज़ी छोड़ेके च़रच़ा, दंङ गिऊ सेहम दोतंङ साते खुश माह शोतो।

³⁹ हेनर दू मीहतु ठ्रोह माह शुई अंऊ परमेश्वरो टोईच़ी विशवास लहज़ी छोड़ेके चरच़ातोर दंङ नाश शुहचे यवातोर पर हेनर दू मीहतु ठ्रोह शुई अंऊ एनोह विशवासो दोरच़ी अनंत जीवन खोक्शातोर।