प्रेरित 15 - लाहौली बाइबिल

यरूशलेम शहरो सभा

¹ रेह यहुदी विशवासी मीहरे यहूदिया प्रदेशंङ च़ि अन्ताकिया शहरो हखा अतिरे दंङ ऊई विशवासी न्वारेतिंङ सिखाएच़ि लेहतिर कि; अगर मूसा ओ कानूनो हिसाबे केहतु खतना माह शुई सा ता केतिंङ उद्धार माह खोकसोतो।

² अपेहल पोलुस ए बरनबास ओ दोतंङ साते महस बहस शुई दंङ दोच़ी दिह ठहराएसी कि पोलुस ए बरनबास दंङ दोतु बिचंङ ज़ि रेह मीहरे दि गप्पो थल्जी प्रेरित ए कलीसिया ओ सेंहणातु कछंङ यरूशलेम शहरो हखा योर।

³ कलीसिया ओ मीहज़ी दोतु यात्रा ओ थल्जी फोआ रे ढबाह ए बगतो ओ इन्तज़ाम लहरीर; दंङ दोरे ज़ोज़ा-ज़ोज़ा फीनीके प्रदेश ए सामरिया प्रदेशंङ ज़ि शुहचे अच़ा इलिर। लगातार दोरे अमरिंङ रूहम्ज़ा लेहतिर, विशवासी न्वारे तिंङ ऊईजाति मीहतु सेहम किरच़िमी ए दंङ यीशु टोईच़ी विशवास लहज़िमी खबरो पाहठी कंड्री लेहतिर। दि रेड्रा भत्ते विशवासी न्वारे महसे खुश शुहचे इलिर।

⁴ अपेहल दोरे यरूशलेम शहर पिचे इलिरे, दंङ कलीसियाओ मीहरे ए प्रेरित दिंङ कलीसिया ओ सेंहणार दोतंङ साते खुशी रंङ साते दोईरे दंङ पोलुस ए बरनबास ए भत्ते धिर कंड्रातोर अंऊ परमेश्वरे दोतु दोरच़ी लाहते।

⁵ पर फरीसी मीहतु दलो बिचंङ अंऊ दोच़ी बिशवास लहतेर, दोतु बिचंङ च़ि थोड़े अरे मीहज़ी खड़े शुहचे कुट्री लेहतिर, “ऊईजाति बि खतना लहज़िमी थल्जी ए मूसा ऊई ला कानूनो मनेकच़िमी थल्जी हुकुम रंड्री जूंस।”

⁶ दंङ प्रेरित ए कलीसिया ओ सेंहणा मीहरे दी गप्पो पाहठी विचार लहज़िमी थल्जी ठ्रोहका शुई।

⁷ दोपहल पतरस ए महस ए झगड़ा शुहचिमी थल खड़े शुहचे दिह कुई, “हे विशवासी न्वारे, केहच़ी दीह ञेंहनि, कि महस ध्याड़ा शुहचे इलि, कि परमेश्वरे केहतु बिचंङ ज़ि गेह अंङषी चरच़तो, कि गिऊ दोरच़ी ऊईजाति ज़ि रूठे खबरो बचन रेड्रीमी थल विशवास लोहर।”

⁸ परमेश्वर मीहतु सेहम ञेंहच़ा। परमेश्वरे ऊईजाति तिंङ ञेंहतु ठ्रोह पवित्र आत्मा रें दिह कांहषी ततो कि दोई दोतिंङ एनोह मीहतु रुपंङ स्वीकार लेह केह्तो।

⁹ दोई ञेंहतु ए दोतु बिचंङ छल्ले भेद-भाव माह लहरी छना कुचे विशवासो दोरच़ी दोई दोतु सेहम शुद्ध लेह च़रति।

¹⁰ अगर झांह तोह, दंङ केहच़ी दि कुचे परमेश्वरो परीक्षा छिले लह्ज़ातंई, दि कुट्रा दोतिंङ हेंदु भत्ते रिति-रिवाज़ो भाषे लहज़ी जुंशी तोह? छना कुचे हेंदु बाह-मेमे ज़ि ए देर तचेक कि तोग तचेक हेनर ला दोतु भाषे लहज़िमी जोगे माह तोहई।

¹¹ वोई, झांह लेह ठीक माह, पर दिह पक्‍का तोह कि छना ठ्रोह दोरे मीहरे प्रभु यीशु ऊ मोह्ड़े दाह दोरच़ी उद्धार खोक्पोर; ध्वांए ठ्रोह ञेंतिंङ ला उद्धार खोकसोतो। माह मूसा ओ कानून मनेकच़िमी रंङ साते।

¹² दंङ भत्ते सभा ओ मीहरे चुपे शुहचे पोलुस ए बरनबासो रेड्री लेहतिर, कि परमेश्वरे दोतु दोरच़ी ऊईजाति तु बिचंङ छोंई घाटे मोह्ड़े-मोह्ड़े कहम ए चमत्कार लहरी।

¹³ अपेहल दोच़ी कुट्री बंद लहरिर, दंङ याकूब कुट्री लेहती, “हे विशवासी रे, गिऊ रेड्रुंई।”

¹⁴ शमौन पतरसे समझाएकाते, कि परमेश्वरे मुन्डा रिंङ छना साबित लहरी कि दुह ऊईजाति तु ख्याल तहज़ा, दंङ दोतु बिचंङ ज़ि रेह मीहतिंङ एनोह मीहरे शुहबिमी थल्जी अंङे च़रति।

¹⁵ दंङ ऊई जातितु दि बदलाव दू गप्पा रंङ साते सहमत तोह अतु पाहठी भविष्यवक्ताज़ि पवित्र शास्त्रारिंङ च़ेहसी तोह,

¹⁶ दिऊ थल गेह यह्च़ा अंज़े रज्ज़ा दाऊदो राज्य अंऊ तुहई बेहच़ी मीहच़ी नाश लहसी ताहरेर, दुह राज्य बि यह्च़ा बणाएपोग।

¹⁷ गेह दि दिऊ थल्जी लहज़ातग ताकि ऊई भत्ते मीहरे, मतलब दुह भत्ते ऊईजाति तिंङ अंऊ दोतिंङ गेह घेंङौ मीहरे शुहबिमी थल्जी अंङे च़रचातेग, दोच़ी गेह पेट्री तरपोर। केरे निश्चित शुचि तरपोंई कि झांह शुहबी तरपोतो छना कुचे गेह प्रभु परमेश्वरा अंऊ दुह कम लोहग, दोई दि गप्पा कुहषी ततो।

¹⁸ गेह घेंङौ मीहतु मदत लहरिगा कि दोरे महसे तुहई ए दि गप्पा ए ञेंई तरपोर।

¹⁹ झांह लेह गिऊ विचार दिह तोह कि ऊईजाति तु दोरच़ी अरिला मीहरे परमेश्वरो हखा किर्ज़ोर, ञेंहच़ी दोतिंङ यहुदी कानून ए रिवाज़ बि मनेकच़िमी मज़बूर माह लोहनि;

²⁰ ञेंहच़ी दोतिंङ इच्च़ा डाक च़ेऐ च़रतिन, दिह कंड्रिमी थल्जी कि दोच़ी दू बगत थाह ज़ंई अंऊ मुर्तिरिंङ चढ़ाएसी शुह दंङ कुकम थालंही, दंङ टटू छुहसी ओ शाह थाह ज़ंई दंङ जानवरा तु शुहई था ज़ेईनि।

²¹ छना कुई पुराना टेम बेहच़ी नगर-नगर मूसा ओ दि कानूनो प्रचार लहज़िमी थल्जी शुहचे तोहई, दंङ दुह हर अरामो ध्याड़ा रिंङ यहुदी सभो घरबारंङ पढ़ेक्च़ातेर।

ऊई जातितु विशवासी तिंङ डाक

²² दोपहल यरूशलेम शहरारिंङ भत्ते कलीसिया रंङ साते प्रेरित ए सेंहणा मीहतिंङ रुठे लेहती, कि ऐनातु बिचंङ ज़ि रेह मीहरे अंङे च़रतिर, मतलब यहूदा अतु मिन बरनबास लाह तोहई, दंङ सीलास अंऊ विशवासी तु बिचंङ मुखिया तोहई; दंङ दोतिंङ पोलुस ए बरनबास रंङ साते अन्ताकिया शहर हखा च़रपोंई।

²³ प्रेरिता ज़ि दुह डाक एनारंङ साते रेंज़ा शिलिर; अंऊर च़ेहसी तोहई: “अन्ताकिया शहरारिंङ, सीरिया रिंङ दंङ किलिकिया प्रदेशो बंङज़ा विशवासी न्वारे अंऊ ऊईजाति विशवासी तु बिचंङ ज़ि तोतोर, प्रेरित ए कलीसिया ओ सेंहणा ए अंऊ केहतु न्वारे तोतोर नमस्कार।”

²⁴ ञेंहच़ी दी रेड्री तातंई कि ञेंहतु बिचंङ ज़ि रेहज़ि दोहर इलजे, केतिंङ एनोह गप्पा ओ परेशान लेह च़रतिर; दंङ केहतु दिमागारिंङ उल्लझन पैदा लेह च़रतिन पर ञेंहच़ी दोतिंङ हुकुम रांहषी माह शुह।

²⁵ दिऊ थल्जी ञेंहच़ी इच्च़ा सेहम शुहचे दी रूठे चेहतिन कि ञेंहच़ी थोड़े अरे गंङमीतिंङ अंङड्रीमी फेंसला लहरिन कि हेंदु प्यारे बरनबास ए पोलुस रंङ साते केहतु कछंङ चरच़ातनि।

²⁶ दिरे झांह ठ्रोह मीहरे शुहरे अच़ि एनोह जान हेंदु प्रभु यीशु मसीहू थल्जी खतरारिंङ केहच़ी च़रतिर।

²⁷ दंङ ञेंहच़ी यहूदा ए सीलास बि अंङे च़रतिन कि दोरे दोतंङ साते योर ताकि दोरे दि गप्पा तिंङ पक्‍का लोहर अंऊ ञेंहच़ी च़ेहसी शुई।

²⁸ पवित्र आत्मा ए ञेंतिंङ दी ठीक च़ेहसा कि दी ज़रूरी गप्पारे केहच़ी, केहतु टोईच़ी ऊई महस भार मा केट्री;

²⁹ कि केरे मूर्तिरिंङ चढ़ाएसी शुई दंङ कुकम ए टटू झुचीऊ शाह थाह ज़ंई दंङ जानवरा तु शुई था ज़ेईनि। दितु दोरच़ी शत्‌ह बंङज़ेंई केहतु थल्जी रूठे शोतो। सिर्फ धोंण ए गप्पा तोहई अंऊ ञेंरे केतंङ साते कुट्री जुंज़ातंई।

³⁰ दंङ दुरे बिदा शुहचे अन्ताकिया शहरारिंङ पिच़िरे, दंङ दोच़ी कलीसिया ओ मीहरे ठ्रोहका लहच़ी दुह डाक दोतिंङ रें च़रति।

³¹ अपेहल दोरकी विशवासी ज़ि दि डाक पढ़ेक्तिर दोरे खुश शुचि इलिर छना कुचे दुह खबरे दोतिंङ महस याहब खोकसिरी।

³² दंङ यहूदा ए सीलास अरी ऐनारे बि भबिष्यवक्ता रे तोईरे, महस गप्पा रंङ साते विशवासी न्वातिंङ उपदेश रें दोतु विशवासा बि पक्‍का लहरी।

³³ यहूदा दंङ सीलास थोड़े अरे ध्याड़ा बंङज़ा दोहपल विशवासी ज़ि दोतिंङ शांतिऊ आशीष रेह यरूशलेमो कलीसियाओ हखा बिदा लहरिर।

³⁴ पर सिलास बि अन्ताकिया शहरा रिंङ बंङज़िमी फेंसला लहरी।

³⁵ दंङ पोलुस ए बरनबास अन्ताकिया रिंङ बंङज़ा इलिर; दंङ ऊई महसे मीहतिंङ प्रभु यीशु पाहठी सिखाएतिर ए प्रचार लहरिर। दोतु महस साथीर ला अंऊ विशवास लहज़ातेर दोतु कम लहज़िमी मदत थल्जी जुड़ेगी इलिर।

पोलुसो दूसरा प्रचार यात्रा ए पोलुस ए बरनावासो बिचंङ झगड़ा

³⁶ थोड़े हप्ता ओ थल पोलुसे बरनबास रंङ साते कुहई, थोड़े अरे लाहा तुहई हेनर रेह शहरा रिंङ प्रभु बचनो पाहठी प्रचार लहरिन। अतंई, हेनर यह्च़ा दुह भत्ते शहरंङ योंई अंऊर हेंज़ि तुहई प्रचार लाहतेंई दंङ हेंदु विशवासी न्वा तिंङ खमोंई कि दुरे छना तोतोर।

³⁷ दोहपल बरनबासे यूहन्ना बि अतु मिन मरकुस ला तोहई, एनारंङ साते रेंज़ा शिल्ज़िमी थल्जी विचार लहरी।

³⁸ पर पोलुसे मरकुस बि अंऊ पंफूलिया नगरा रिंङ दोतु दोरच़ी शत्‌ह शुहचे इलजी तोहई, दंङ कमारिंङ दोतंङ साते मेहली इलजी मा तोहई, साते शिल्ज़ी रुठे माह चेहती।

³⁹ दंङ दि गप्पो थल्जी पोलुस ए बरनबासो बिचंङ बहस शुचि इलि। दंङ दोरे इदि ऊईदि रंङ साते शत्‌ह शुहचे इलिर; दंङ बरनबास, मरकुस बि रेंज़ा जहाज़ंङ साइप्रसो टापू हखा अच़ा इलि।

⁴⁰ पर विशवासी तिंङ परमेश्वरो देख-भाल रिंङ केहट्रिमी थल पोलुस सीलास बि रेंज़ा अच़ा इलि।

⁴¹ दंङ दोरे भत्ते सीरिया ए किलिकिया प्रदेशारिंङ इलिर दंङ कलीसिया ओ विशवासी तिंङ पक्‍का लहज़ी लेहतिर।