1 पतरस 1 - लाहौली बाइबिल

नमस्कार

¹ गेह, पतरस अंऊ यीशु मसीहू प्रेरित शुगाह, दि डाक चेहच़ातग। गेह दि डाक परमेश्वरो अंङषी दू मीहतिंङ चेहच़ातग, अंऊ कि पुन्तुस, गलातिया, कपुदूकिया, आसिया, ए बितुनिया प्रदेशो शत्‌ह-शत्‌ह शहरा रिंङ परदेशी तु ठ्रोह बंङज़ातेर।

² बाह परमेश्वरे महसे तुहई केतिंङ एनोह मीहरे शुहबी थल्जी ए पवित्र आत्मा कमो दोरच़ी केतिंङ पवित्र शुहबिमी थल्जी अंङे चरच़तो। दोई दि दिऊ थल्जी लहरी ताकि केरे यीशु मसीहू हुकुमो भाषे लोहनि दंङ दोऊ शुहई दोरच़ी शुद्ध शुहचे तरपोंई। गेह प्रार्थना लहज़ातग कि परमेश्वर केतिंङ मोह्ड़े दाह ए भरपूर शांति रमतो।

इच्च़ा स्वर्गीय विरासत

³ हेंदु प्रभु यीशु मसीहू बाह ए परमेश्वरो धन्यवाद शुहबी जूंस, अच़ि हेंदु थल्जी एनोह मोह्ड़े दाह ओ दोरच़ी हेंदिंङ इच्च़ा खरकोई जीवन रांहषी ततो। छना कुचे परमेश्वरे यीशु मसीह बि सिए दोतु बिचंङ ज़ि श्रींङमी लहरी, दोई हेंदिंङ महस आत्मविशवास रंङ श्रींङमिमी जोगे बणाके च़रति; मतलब हेनर दू चीज़ खोकच़िमी पूरे उम्मीद लेह तरपोंई अंऊ दोई हेंदिंङ रंड्रीमी वाईदा लहसी ततो।

⁴ हेनर दू विरासता बि खोकच़िमी थल्जी रुमज़ा तोतोंई अंऊ परमेश्वरे हेंदु थल्जी तेयार लहसी ततो। अरिला अपेहला दू चीज़ातिंङ नाश लेह मरच़ा। अच़िला ला दू खराब लेह मरच़ि। दू अपेहला युई या दोऊ सलटे रिंङ कमी माह अपतो। परमेश्वरे दू चीज़ स्वर्गंङ तहरि।

⁵ दंङ केहतु विशवासो दोरच़ी, परमेश्वर एनोह सामर्थरंङ साते केहतु रखवाली लहज़ा अपेहल तचेक कि केरे रूठे रंङ उद्धार खोकच़ातंई कि मसीहू वापिस अपिमी ध्याड़ा कंड्रिमी थल्जी तेयार तोतोंई।

⁶ केतिंङ दि भत्ते चीज़ा तु थल्जी खुश शुहबी लेह्पोतो, चाहे हेंतेग थोड़े टेमो थल्जी शत्‌ह-शत्‌ह पाहठी परेशानी केतिंङ दुखी लहज़ा।

⁷ दि मुसीबतो मकसद दि कंड्री तोह छि केरे हेले रिंङ परमेश्वरो टोईच़ी विशवास लहज़ातंई। यीशु मसीह रिंङ केहतु विशवास ज़ंङ बे महस कीमती तोह। छना नाशवान शुहच़ा ज़ंङ मेहू बिचंङ परखेक्च़िमी थल्जी दंङ शुद्ध लेह, ध्वांए ठ्रोह अगर केहतु विशवास परखकेक्सी रंङ साते विशवास पक्‍का शुहवा, दंङ दू ध्याड़ा महस षटणा ए मोह्ड़े दाह ए आदर रमतो अपेहल यीशु मसीह यह्च़ा अपतो।

⁸ केहच़ी यीशु बि अपेहला तंङसी माह तंई, तांला केहच़ी दोरंङ साते दाह लहज़ातंई। केहच़ी दू हेंतेग ला माह तंङज़ातंई, पर केहच़ी विशवास लहज़ातंई। झांह लेह, केरे खुशीऊ मोह्ड़े दाह ज़ि महस खुश तोतोंई अंऊ दोबि शब्दा रिंङ बयान लेह मरपोंई।

⁹ केरे महस खुश तोतोंई छना कुचे परमेश्वरे केतिंङ पापो दोषो दोरच़ी बचाएच़ा। दि यीशु मसीह टोईच़ी केहतु विशवासो ईनाम शुह।

¹⁰ दि उद्धार झांह ठ्रोह तोहई अतु पाहठी भविष्यवक्तार ऊई ञेंच़िमी तातोर। दोच़ी भविष्यवाणी लहरिर, कि छना परमेश्वर केतिंङ बचाएच़िमी थल्जी केहतु थल्जी दयालु तरीका रंङ कम लोहतो अतु केरे जोगे माह तोहई। दोच़ी जबाब पेट्रीमी थल्जी महस खबरदार रंङ साते जांच लहरिर।

¹¹ मसीहू आत्मा भविष्यवक्ता तु अंदरेग तोह, अंऊ मसीहू दुख ए दू दुख थल खोकच़ा मोह्ड़े दाह ओ पाहठी दोतिंङ तुहई ए कंड्राते। भविष्यवक्ता ज़ि तुहई ए दि ञेंच़िमी कोशिश लहरिर, कि आत्मा दोतिंङ छि कंड्रा, दि भत्ते गप्पा अपेहल शोतो दंङ दि छना पूरे शोतो।

¹² पर परमेश्वरे दि भविष्यवक्ता तिंङ कंड्रिरी कि दोतु खबर दोतु एनातु थल्जी मशत पर केहतु थल्जी तोहई। दू खबर यीशु मसीहू पाहठी रूठे खबर शुह अंऊ केहच़ी हेंतेग रेड्रातंई। परमेश्वरे स्वर्गंङ ज़ि एनोह पवित्र आत्मा चरच़तो कि केतिंङ रूठे खबर प्रचार लहज़िमी थल्जी मीहतु मदत लोहतो। दि भत्ते धोंण अद्धभुत तोह कि देर तचेक कि स्वर्ग दूत कि स्वर्गदूत ला खुशी रंङ दि चीज़ा बि खंड्रातोर।

पवित्र जीवन श्रींङमी थल्जी बुलाहट

¹³ झांह लेह, केरे मीहरे सोचेक्सिमी थल्जी तेयार शुचि इलांई। खबरदार बंङज़ुंई दंङ केनातु उम्मीद पूरा ठ्रोह दुह मोह्ड़े दाह ओ टोईच़ी लगाके तंही, अंऊ यीशु मसीहू प्रकट शुहबिमी मुक्का केतिंङ खोकसोतो।

¹⁴ परमेश्वरो हुकुमो भाषे लंहि छना कुचे केरे दोऊ कटुरे शुई। दंङ दू मदम कम थालंही अतिंङ केरे दू मुक्का लहज़िमी हिटी तहज़ातंई, अपेहल केरे परमेश्वरो सच्चाई माह ञेंहच़ातंई।

¹⁵ पर हेंतेग केतिंङ भत्ते कम रिंङ अंऊ केहच़ी लहज़ातंई पवित्र शुहबी जूंस, छना कि परमेश्वर पवित्र तोह, अच़ि केतिंङ एनोह कटुरे शुहबिमी थल्जी अंङषी ततो।

¹⁶ छना कुचे पवित्र शास्त्रारिंङ दि च़ेहसी तोह, कि “केतिंङ पवित्र शुहबी जूंशी तोह छना कुचे गेह पवित्र तोतोग।”

¹⁷ अपेहल केहच़ी प्रार्थना लहज़ातंई ता दंङ केहच़ी परमेश्वरा बि केनातु बाह कुट्रातंई। पर हिद तंही कि दू भत्ते मीहतु फेंसला इच्च़ा ए ठ्रोह लहज़ा मतलब हर इच्च़ा ए छि-छि लहसी शुह। दिऊ थल्जी कि केरे दि धरती रिंङ इच्च़ा परदेशी शुहचे बंङज़ातंई दंङ केतिंङ परमेश्वरो बेह्द चेहके दोऊ महस आदर लहज़ी जूंशी तोह।

¹⁸ केहच़ी ञेंहच़ातंई कि परमेश्वरे केतिंङ केहतु निक्कमा रिति-रिवाज़ो दोरच़ी, अंऊ केहच़ी केनातु बाह-मेमेतु दोरच़ी सिखेकतुंई, छोड़ेक्च़िमी थल्जी छोह् इस्तेमाल लाहतंई। दोई केतिंङ छुड़ाच़िमी थल्जी झांह ठ्रोह ढबाहो इस्तेमाल माह लहरी अपि ज़ंङ या मुलतु ठ्रोह नाश लेह तरपोंई।

¹⁹ दिऊ वहज़ाज़ि, परमेश्वरे केतिंङ मसीहू अनमोल शुहई दोरच़ी च़ुमने च़रति अंऊ हेंदु पापो थल्जी बलि ऊ रूपा रिंङ सिए इलि। दोऊ मौत हेंदु थल्जी परमेश्वरो इच्च़ा कुरच़ो रूपा रिंङ सिद्ध बलि तोहई, छना कि यहुदी पुरोहिता तु दोरच़ी बलि चढ़ाएच़ा सिद्ध ए छल्ले दाग मेह तोहईरे।

²⁰ दि संसारो रचना बे तुहई, परमेश्वरे दि सोचेके चरच़ाते कि यीशु मसीह छुड़ाएसा शोतो। पर दू केहतु मदत लहज़िमी थल्जी दि अंतिम ध्याड़ा रिंङ दि संसारारंङ प्रगट शुई।

²¹ यीशु मसीह ज़ि अंऊ हेंदु थल्जी लाहते दोऊ वहज़ा केरे हेंतेग परमेश्वरो टोईच़ी विशवास लहज़ा तंई। दू, दू ए शुह अच़ि यीशु मसीह बि दोऊ सिमी थल यहच़ा‍‍ श्रींङमी लहरी दंङ दोबि महिमा रें। झांह लेह केहच़ी विशवास लहज़ातंई दंङ परमेश्वरो टोईच़ी केहतु विशवास हेंतेग पक्‍का तोह।

²² छना कुचे हेले ओ भाषे लहज़िमी रंङ साते केतिंङ पापो दोरच़ी शुद्ध लेह चरच़ातंई, हेंतेग केतिंङ केनातु साथी विशवासी तंङ निष्कपट दाह लेह जूंशी तोह। इदि-अई दिरंङ साते महसे ए भत्ते सेहमे दाह लेह जारी तंही।

²³ केतिंङ इदि-अई दिरंङ साते दाह लेह जूंशी तोह छना कुचे केतिंङ परमेश्वरो दोरच़ी इच्च़ा खरकोई जीवन खोकसा तोह। केतिंङ दि जीवन इच्च़ा झांह ठ्रोह चीज़ो वहज़ा माह खोकसिरी अंऊ हमेशा ओ थल्जी बंङज़ोतो। मतलब, परमेश्वरो श्रींङे ए अनंत बचनो दोरच़ी खोकसा शुह।

²⁴ पवित्र शास्त्रे दि कुट्रा, “भत्ते मीहरे श्रांङों बराबर तोतोर दंङ दोतु शोभा बंणो ऊड्रो ठ्रोह तोह। श्रांङ करचे योतो दंङ ऊड्रा धरती ऊ टोईच़ी दह्चे योतो।”

²⁵ पर परमेश्वरो बचन हमेशा बणेंके बंङज़ोतो। दि बचन मसीहू पाहठी रूठे खबर‍ शुह अंऊ केहतु बिचंङ प्रचार लहसी तोह।