1 कुरिन्थियों 12 - लाहौली बाइबिल

आत्मिक वरदान

¹ हे गिऊ प्यारे साथी विशवासी रे, गेह जुंज़ातग कि दू सवालो पाहठी अंऊ केहच़ी आत्मिक वरदाना तु पाहठी गेरंङ साते रूहक्सी तातंई, केरे रूठे रंङ समझेक्तुंई।

² केहच़ी ञेंहच़ातंई कि केरे विशवासी बणेक्पिमी तुहई छना ठ्रोह जीवन श्रींङमातंई। दंङ केरे टटे मुर्ति तु थल्जी जोज़िमी थल्जी भटकेगी इलजी तोतोंई।

³ झांह लेह गेह जुंज़ातग कि केरे ञेंई च़रतुंई, कि अंऊ ला परमेश्वरो आत्माओ अगुवाईरंङ साते कुट्रा, दोई म कुट्रा कि यीशु शापित तोह; दंङ माह अरिया पवित्र आत्मा बे कुट्री तरपोतो कि, “यीशु ए प्रभु शुह।”

⁴ पवित्र आत्माओ दोरच़ी खोकसी वरदान ता शत्‌ह-शत्‌ह तोतोर पर पवित्र आत्मा इच्च़ा ए तोह।

⁵ शत्‌ह-शत्‌ह ठ्रोह कम तोतोर अंऊ हेनर प्रभु थल्जी लहज़ातंई पर हेनर भत्तेर इच्च़ा ए प्रभु सेवा लहज़ातंई।

⁶ शत्‌ह-शत्‌ह तरीका रंङ साते परमेश्वरो हेंदु ज़िन्दगीरिंङ कम लहज़ा, पर परमेश्वर इच्च़ा ए तोह, अंऊ हेंदु भत्ते तु दोरच़ी कम लहज़ा।

⁷ हेंदु बिचंङ भत्ते तिंङ दि काबिलियत रांहषी शवात अंऊ पवित्र आत्माओ मौज़ूदगी कंड्रा ताकि हेनर हेंदु साथी विशवासी तु मदत लेह तरपोंई।

⁸ छना कुचे परमेश्वरो आत्मा इच्च़ा मीह बि बुद्धिऊ गप्पारे कुट्रीमी वरदान रंड्रा, दंङ दू ए आत्मा ऊईतिंङ ज्ञानो गप्पा कुट्रीमी वरदान रंड्रा।

⁹ दंङ अतिंङ आ दू आत्मा मसीह रिंङ विशवास पक्‍का लहज़िमी वरदान रंड्रा, दंङ रें तिंङ दू ए आत्माओ दोरच़ी टेहची दोतिंङ ठीक लहज़िमी वरदान खोकसा।

¹⁰ अतिंङ आ सामर्थो कम लहज़िमी वरदान; दंङ रें तिंङ भविष्यवाणी लहज़िमी वरदान, दंङ रें तिंङ आत्मा परखेक्च़िमी वरदान, दंङ रें तिंङ महसे पाहठी भाषा कुट्रीमी वरदान; दंङ रें तिंङ भाषा ओ अर्थ कंड्रिमी वरदान रंड्रा।

¹¹ पर भत्ते वरदान इच्च़ा आत्माओ कम तोह। दोई हर इच्च़ा विशवासी बि वरदान रंड्रा छना दोई जुंज़ा।

फुक इच्च़ा, अंङ महस

¹² छना कुचे छना ठ्रोह मीहू फुक इच्च़ा तोह दोऊ अंङ महसे तोतोर, दंङ दू इच्च़ा फुको भत्ते अंङ महसे शुहबीरंङ साते भत्ते ठ्रोहका शुहचे इच्च़ा ए फुक तोह ध्वांए मसीह ला दंङ दोऊ टोईच़ी विशवास लहज़ा विशवासी रे ला इच्च़ा तोतोर।

¹³ छना कुचे हेंज़ी भत्ते ज़ि चाहे दू यहुदी शुह, चाहे ऊई जाति, या चाहे परगर शुह, चाहे आज़ाद, इच्च़ा ए आत्माओ दोरच़ी इच्च़ा फुक शुहबिमी थल्जी बपतिस्मा लेहपच़ातंई, दंङ हेंज़ी भत्ते ज़ि दू ए आत्मा खोकसी तातंई छना ठ्रोह हेंज़ी भत्ते ज़ि इच्च़ा कोलीऊ दोरच़ी तुंङमातंई।

¹⁴ झांह लेह हेंदु फुकारिंङ इच्च़ा ए अंङ माह, पर महसे अंङ तोतोर।

¹⁵ माना कि अगर हेंदु कोंज़े कुट्रा: कि गेह गुह्ट्र माह शुगाह, झांह लेह फुको अंङ माह शुगाह, दंङ छि दोऊ झांह कुट्रीमी रंङ साते दू फुको अंङ माह केहषा आ?

¹⁶ दंङ अगर रेट्रे दि कुट्रा, गेह टिरा माह शुगाह दिऊ थल्जी गेह फुको अंङ माह शुगाह, दंङ छि दोऊ झांह कुट्रीमी रंङ साते दू फुको अंङ माह केहषा आ?

¹⁷ अगर भत्ते फुक टिरा ए शुचंङ ता रेड्री अंऊर च़ि तोहई? अगर भत्ते रेहट्रा ए शुचंङ ता वास अंऊरच़ि शोतो?

¹⁸ पर हेले परमेश्वरे हेंदु भत्ते फुको अंङ रे एनोह हिसाबे इच्च़ा-इच्च़ा लहज़ी ते फुकारिंङ केई।

¹⁹ अगर इच्च़ा ए अंङ शुचंङ, दंङ फुक अंऊर शुहबी तोहई?

²⁰ झांह लेह, भले ए फुको महसे अंङ महसे तोतोर, तांला इच्च़ा फुक तोह।

²¹ टिरा गुह्ट्र रंङ साते कुट्री मरपोतो, “गिह्बी कांह ज़रूरत माह” दंङ माह पुंज़ा कोंज़ा रंङ साते कुट्री तरपोतो, “गिह्बी कांह ज़रूरत माह।”

²² पर फुको दोरे अंङ अंऊ ऊई दोतंङ कमज़ोर चेहच़ातोर, महसे जूंशी तोतोर।

^23-24 दंङ फुको अंऊ अंङर हेंज़ी कम आदरो जोगे चेहच़ातंई दोतिंङ ए हेंज़ी महस आदर रंड्रातंई; झांह लेह हेनर ध्याना रंङ साते दू हिस्सा ओ रक्षा लहज़ातंई अतिंङ तंङषी माह जूंस, देर तचेक कि महसे आदरो जोगे हिस्सा बि महस आदर ए महस देखभाल लहज़ी जूंशी तोह। अतु खसीयत कम तोह।

²⁵ परमेश्वरे दि दिऊ थल्जी लहरी ताकि फुको रे अंङतु दोरच़ी इदि-अई दिरंङ साते झगड़ा शुहबी मेस, पर दोतिंङ इदि-अई दिरंङ साते इच्च़ा ठ्रोह देखभाल शुहबी जूंस।

²⁶ झांह लेह अगर हेंदु फुको इच्च़ा अंङ बि टेहषी तोह ता भत्ते फुकारिंङ टेहषी तोह। दंङ ध्वांए ठ्रोह, अगर हेंदु फुको अंऊआ अंङों षटणा शवात दंङ भत्ते फुको षटणा शुह।

²⁷ ध्यांए ठ्रोह केरे भत्तेर ठ्रोहका शुहचे ते मसीहू फुक शुई, दंङ केहतु बिचंङ हर इच्च़ा दोऊ शुई, दोऊ फुको अंङों बराबर।

²⁸ मसीहू दि फुका रिंङ, अंऊ कलीसिया तोह, परमेश्वरे हेंदिंङ शत्‌ह ठ्रोह सेवकाई ओ थल्जी अंङषी ततो: भत्ते बे तुहई, दोई प्रेरित, दूसरा भविष्यवक्ता, दोऊ थल मदत लहज़ा मुख्या, दंङ भत्ते पाहठी भाषा कुट्रा।

²⁹ हर इच्च़ा प्रेरित माह। हर इच्च़ा भविष्यवक्ता खबर रंड्रा माह शुहबी। हर इच्च़ा कंड्रा माह शुहबी। दंङ हर इच्चे चमत्कार लेह मरच़ि।

³⁰ भत्ते तिंङ चंगा लहज़िमी वरदान खोकसी माह, भत्ते महसे पाहठी भाषा कुट्रातोर?

³¹ भत्तेर भाषा ओ अनुवाद लहज़ा माह शुहबी, झांह लेह केतिंङ ईमानदारी रंङ साते भत्ते बे जूंशी वरदानो हिटी तहच़ि जूंशी तोह। पर गेह हेंतेग केतिंङ ऊई ला महसे रूठे अम कंङमोग।