MATHI 24 - REN PAURIINA (BSI)

Jisu ngi Luwbuk Inn Mukro chaak nra mdo The

¹ Ungta Jisu ngi luwbuk Inn ma thida sun chda, ungu msiikhu rekki Mhin ni luwbuk Inn kṭha ava song chlam da.

² Pdainu Mma ngi mhin inni arthawng da, “Hava le mkheng adee inna, dei naan dida? Kinditti, Neiji ahin thaanni kthea, mdo var pthii ma ra lung khat leenni lung khat kurtuwn daatti ma liit nime.”

Plung Kunchul leh Kja Kakham

³ Ungta Jisu ngi kruwn lown leen tha mo ko on daat arlaanni, spar jikki msiikhu rekki Mhin arhang lam da, the lamda, “Hava tden kthuwk rang, ungu Nah arjun nrang leh kum ṭut kira titinna ava talu rang, mhai the pik chaan?”

⁴ Ungbi Jisu ngi mhin inni theda, “Ku mii khat lee ngi lele tha ado tiṭhi ma nraan tuk asut chaan.

⁵ Mleija Nei kmiing ngi mii knempok thleng donle, ‘Neia Khrista ping,’ di donle mmaanni mii knempok lele tha kṭhi pthii lamra.

⁶ Ungta naanni rawl rek leh rawl ki titi aryaa naan di; ava naanni piir pik maan; mleija hava ksoi liit kma kthuwk ra, pdainu mṭut nra ava pme.

⁷ Mleija chati khatti chati khat mraal kpii ra, ungu kruwngpaam khatti kruwngpaam khat mraal kpii ra, ungta mmun ktai thung ngi poi tham leh ringnaang kthuwk ra.

⁸ Hava mkheng nga kthuwk ra pdainu nao kuplu rang ngi kdung kṭou heppi mdo pṭhun na kurthuwk ra.

⁹ “Ava dilli mmaanni suwk thuw akpii raan ki akparlaan pthii raan; ungta ake eayou raan; ungu Nei kmiing ngi chati rek mkheng ngi akipder chraan.

¹⁰ Ungta mii knempokki khat leh khat kparthlei ra, khat leh khat kparder chdonle ktluw tir chra.

¹¹ Ungu kindit kma khulpu rek knempok thleng donle mii knempok lele dung ngi kṭhi pthii ra.

¹² Ungta kṭha kma knempok leiji, mii maknem mi wonsat ava kma pthii ra.

¹³ Pdainu mṭut na kpha dekki kdiil pchaang mii ava kaktlan pik ra.

¹⁴ Ungu chati rek mkheng thung ngi rinpaumin khat kurthuwkki, hava Kruwngpaam kṭha paumin ava dultipaam mkheng thung ngi karyaam ra; ava dilli mṭut na kurjung rora.

Tiṭit Kirvei

¹⁵ “Ava dilli khulpu Deniel li mdo the tiṭit kirvei naanni adee in mpha thu, mmun kchiir thung ngi krip ra. (kpa kcha mii ngi adei pindi chaso.)

¹⁶ Ava dilli Judia thu ka am rekki lown leen tha kchen lamra;

¹⁷ ungta innthlun leen ka am daat mii va mi inn thu ka am do ava klou ra jungṭum mso;

¹⁸ ungu bil thu ka am mii va mbuw klou rang ngi mdil kinle mso.

¹⁹ Ungta mpha avale thung ngi nao kuhur rek leh nao kakai rek ava tija thung ngi msuwkthi chdaatta!

²⁰ Phalbii thung leh sabath nitti achen ma nraan aṭhil dei chaan.

²¹ Mleija ava dilli dultipaam mupṭhun daat ki snii kpha thung ngi kthuwk kma lai, ka am kma, ungu tden rukku kthuwk nowl kmara, klin langlang ki suwk kthuwk ava ka amra.

²² Ungta mnit rek ava muptoi pthii ma daat ngaallu dulti mii ku khat lee pre ktlan pik nime; pdainu mdo kchol mii rek ava tummi mnit rek ava mdo ptoi pthii.

²³ Ava dilli ku mii khatti naan hinni, ‘Asuwn, Khrista ava hava tha! Mdit mata Mma ava ‘Va tha,’ dida mtheen mpha thu rin chmaan.

²⁴ Mleija kindit kma khrista rek leh kindit kma khulpu rek thleng donle, titinna klin klin leh tnga na rek akti det raan, naan ava lele dung ngi ado tiṭhi nraan, mrot khim khai thu mdo kchol rek ra.

²⁵ Asuwn, mdu jappi, Neiji akthe pik inna.

²⁶ Ava leiji mmaanni naan hin thang ngi, ‘Asuwn Mma ava kbowklai ji ka am daatta,’ dida mthe in mpha thu naanni va thuwk maan, mdit mata ‘Mma ava innka thung ngi ka am daatta,’ dida mthe in mpha thu rin chmaan.

²⁷ Mleija kowl kiplek ki kniw thuwna ki ngi kniw tlaak na kpha dekki mlen ava lulu ngi, Mii Chapa arjun nrang rukka anto hep daat ra.

²⁸ Ungta daksaa kluwng amna mun ktai thung ngi pa ah rek kurtuwl ra.

Kurjung ra Mii Chapa

²⁹ “Ungta suwk kthuwk ava dil tha kbei sekki kniw ngi kjiing chra, ungu thla ngi mar awng pii nime, ungta parwaan ki bursi rek ktla chra, ungu parwaan rutan rek ava kunchun ra;

³⁰ ava dilli Mii Chapa arjun nrang ki titinna ava kindang rora, ungta dultipaam thungki chati rek mkheng ngi kurnung karbaang donle kṭap ra, ungu Mii Chapa ngi armei tu kilṭhi ngi parwaan rutan leh mlaarnee klin langlang ngi kurjung mmaanni kdei lamra;

³¹ ungta Mma ngi waan tamsii rek ava peengkhul krowl kparyaa tu kilṭhi ngi ksii lamra, ungu dultipaam markil plii thung ki parwaan mdo pṭhunna leh mdonna ki Mma do kchol rek ava kpurkuk lamra.

Kduwt Ding ngi Kurchuk

³² “Kduwt ding ngi ekurchuk chaan; mbaak kdowng deek jamda marnaa muksun daat le, chuwr khuw knaija tdit naanni ado dee in.

³³ Ava lulu ngi, hava le mkheng naanni adee in mpha thu, paltong be katti Mma ava lam knaija tdit adei in.

³⁴ Kinditti, Neiji ahin thaanni kthea, havale mkheng mthuw du khim khai hava charuwl ava maang nime.

³⁵ Parwaan leh dultia kmaang cha kro, pdainu Nei kpauna ava maang liit nime.

Ku Khat lee ngi Mnit Mṭhang Deime

³⁶ “Pdainu mnit leh mṭhang ava ku khat lee ngi dei me, parwaan ki waan tamsii daat don, Mchapa daat don deime, pdainu Mpah daatti mdee.

³⁷ Noha nit rek lulu ngi Mii Chapa arjun nrang rukka kurthuwk ra.

³⁸ Diipa mkinlet du ungta Noha ngi arkuwngpii thu mlu du khim khai, mmaanni chaanee lamda,phal lamda innknei snu klou tlo lamda.

³⁹ Ungta diipa kinle da mmaan ava mkheng inni mlo chaak du khim khai, mmaanni dei lamme, Mii Chapa arjun nrang rukka anto hep daat ra.

⁴⁰ Ava dilli miilai knii ngi bil thu ka am ra; khat lou thidonle khat ava kma pthii ra.

⁴¹ Snu miilai knii ngi sum thung ngi bu ksura; khat lou thidonle khat ava kma pthii ra.

⁴² Ava ngi mlei kurthuwk da, asut pṭoi chaan, mleija naan ki Mukpu ava talu nitti kurjung rang tdit naanni dei chmaan ti.

⁴³ Pdainu hava adei in, innkpupa ava ngi jaanni kupru thlen na ki mpha ava mdee chaak daat tlaangbi,mma ngi mi inn ava kṭha ngi sut pṭoi donle kruwl nime.

⁴⁴ Ava leiji, naan rukka akurchuwl chaak nraan; mleija Mii Chapa ava rukka naanni ado bin phaak liit maan ṭhang ava thu Mma ngi kurjung ra.

Trin chaak kro leh Trin chaak krokma Sra Owr

⁴⁵ “Ungta mma ki Chukpu ava ngi mi inn thungki mkheng mdo silna, ungu mpha kcha ngi mii rek hin then kpii ra, trin chaak kro sra owr ava ku rang da?

⁴⁶ Chukpu ngi mthlun mpha thu ktlo meek slii ngi mdo phaak ra sra owr ava msuwkṭha.

⁴⁷ Kinditti, Neiji ahin thaanni kthea, Mma ngi mulrou mkheng nga mhin ksil nra.

⁴⁸ Pdainu kṭha kma sra owr ri mthii na ngi hanto athe sora, ‘Neiki chukpu ava kukto ra,’

⁴⁹ ungta mma miiṭhi sra owr rek ava kbun pṭhun sora, ungu chaaneeda prii da ma am arlaanni,

⁵⁰ sra owr mma ki Chukpu ava mdo bin phaak liit ma nit thu ungta ṭhang thung ngi kurjung ra,

⁵¹ ungta Mma ngi mraal kpii ra ungu ṭha tlot ktlo murson rek tu kthiira; ava thu mii rekki mhaa kril lam donle kṭap lamra.