MATHI 18 - REN PAURIINA (BSI)

Ku ngi Klin sii

¹ Mpha ava kat thung ngi siikhu rekki Mhin arvang lamda, “Parwaan Kruwngpaam thangva ku ngi klin sii da?”

² Ungta Mma ngi nao khat ownda, mṭim inni thiida,

³ ungu theda, “Kinditti, Neiji ahin thaanni kthea, naanni plung ren hur da kmo rek lulu akurthut maan bi, parwaan kruwngpaam ava tden thung preva lut chip pchaang ni maan ti.

⁴ Hava nao heppi plung kparneem mi ka am ku mii khat ava, parwaan Kruwngpaam tha klin sii ra.

⁵ Hanto lu hep daat nao khat ku mii khatti marlaan chaak bi, ava Nei mdo tarlaan chaak;

⁶ pdainu Nei mikrin kcha hava kdil sisi thungki khat ava pnu mtlaak nra mtlot bi, mma tumva klin langlang lung khat louda mlowl leen psuk da kukthuk truwn thung ngi tvar pthi ava ngi kursuk sii ra.

Kepthleem mi Pnu Ktla

⁷ “Kepthleem rek ava ngi pnu ktla dultipaam ava msuwkthi! Mleija kepthleemma kthleng kat ra, pdainu kepthleem thung ngi ktla miilai ava msuwkthi!

⁸ Ungta akhut mdit mata akhu inni pnu thu akaptla raan mkurthutta, areen buk inra avar pthiin; mleija khut knii ungu khu knii kthloiji kṭuw knai kma meiṭhuwm thung ngi atlaak raan kchang nga, akhut akhuwn kyeng ngi rinkhu ado phaak inni kursuk sii ra.

⁹ Ungta amik inni pnu akaptla raan mkurthutta,akhor inra avar pthiin; mleija mik knii thloida sim meiṭhuwm thu ado tvar pthii raan kchang nga mik khdaatti rinkhu ado phaak chaak inni kursuk ra.

Kmaang kcha Jao Paupurtol

¹⁰ “Hava kdil sisi thungki khat naanni ado hown chaak in rome tdit adei in; mleija Neiji ahin thaanni kthea, parwaan ki mmaan waan tamsii ava mpha ktai thung ngi parwaan ki Kpah maiṭhuwmmi ka am lu.

¹¹ Mleija Mii Chapa ava ngi kmaang kcha rek kaktlan rang ki kurjung.

¹² Naanva talu abin inna? Jao arjaa khat kthloi miilai khatti, marlak inki khat mapve dokku, som tku lei tku ava lown tha ma pthii thida, kipveet dok khat ava chet don thlaam nime mo?

¹³ Ungta mma ngi mphaak chaak bi, kinditti, Neiji ahin thaanni kthea, kipveet kma som tku lei tku ava hinva mma ngi kheel sii ngi kanpat psuk chra.

¹⁴ Ava leiji hava kdil sisi rek khat mmaan chaak ra ava parwaan ki Kpah plungbin pme.

Pnu ktla Unao Khat

¹⁵ “Naan a u anao inni apsul in sora pnu mtlaak ta, vang inra adak kat leh mma tung daatti, ado tupsul naan ava athe pik in, mma ngi ataryaak pik inbi, a u anao in ava naanni aphaak chaak inna.

¹⁶ Pdainu mma ngi ataryaak pik maanbi,mii knii khat aṭhi tpom in, ditta pauna khim khaija mii knii kdummi tdee naki msakhi ra.

¹⁷ Mmaan hin rukku mma ngi maryaak nuwm mata, rinlop hin atheen; ungu rinlop hin rukku mma ngi maryaak mata, ktlok chati rek leh khasna klou rek hep lulu ngi kurthuwk chaso.

Mdo Kdaan leh mdo Rot

¹⁸ “Kinditti, Neiji ahin thaanni kthea, naanni dultipaam thu ado bowl in khim khai ava parwaan paam thang rukku kbowl ra, ungu naanni dultipaam thung ngi ado parthle in khim khai ava parwaan paam thang rukku kparthlet ra.

¹⁹ Veikhat nowl li Neiji ahin thaanni kthea, mmaan doṭhil ava naan miilai knii ngi dultipaam thung ngi arot pik inbi, mmaan tummi parwaan ki Kpah rukva krot pik lamra.

²⁰ Mleija Nei kmiing ngi knii mdit mata kdum mi mkurku thu Nei rukka mmaan arlakki ka am ping.

Mdo Ptlot pik ma Sra owr Paupurtol

²¹ Ava dilli Pitor ri Mhin arhangda theda, “Mukpu, nei ku u knaovi mupsul sora pnu mtlaak tlit daattu,knem sii ngi vei tikheu kpha thung ngi ptlot pik nimo?”

²² Jisu ngi mhin theda, “Neiva vei tikheu daattu dinu the maang, pdainu vei som tikheu kheu vi vei tikheu ra.

²³ “Ava leiji, parwaan Kruwngpaam ava kruwng khatti msra owr rek tu sum klut leh kchet ava mdo pintiin nuwm ava tu purtol che naan di.

²⁴ Mma ngi ktai mupṭhun thungta,arda man pun sowm lei parnga ktuwl miilai khat ava mhin arvan ṭhi lamda.

²⁵ Ungu mma ngi mchoi pchaan ma rang thungta, mnumei tu kilṭhi ngi mnaole ungta mdo thloi mkheng jur thida mdo choi dok nra mhin ni pau pṭum da.

²⁶ Ava leiji sra owr ava ngi pkhup pi tardiil da mhin ktham chda, ‘Mukpu mhai arda bong cha, do khim khai neiji achoi chdaat nik di.’

²⁷ Ungta sra owr ava mma kpu ngi wonsat lo chda, mlei tuwl ava ptlot pik chda.

²⁸ Pdainu sra owr ava katti, kurlouda mvan thungta,mma hinni dinarii arjaa khat pang lei ktuwl mmiiṭhi khat kurdut ṭhida; ungbi mlowl tha klel da theda, ‘Alei tuwl la mhai choi dok.’

²⁹ Ava leiji mmiiṭhi sra owr khat ava ngi, ‘Mhai arda bong cha achoi chdaat nik di,’ dida kuwn da mhin ktham chda.

³⁰ Pdainu mma ngi ro mda, mleituwl ava mchoi dok du khim khai ji rowng inn thung ngi daal pthii da.

³¹ Kthuwk nong ava mmaan miiṭhi sra owr rekki mdee in thungta, kdung ngi muplung in kpur ri karbin lamda, ungu vang lamda kthuwk nong mkheng ava mmaan ki Mukpu hin song chlam da.

³² Ava dilli Mukpu ngi mhin ni own thida theda, ‘Kṭha kma sra owr nang! Nang ngi ado ktham chaak leiji alei tuwl mkheng ado kuptlot pik.

³³ Neiji wonsat ado klo lulu ngi, amiiṭhi sra owr hin nangva wonsat lo nim ti mo?’

³⁴ Ungta Mukpu ngi mma hinki lei mdo tuwl mkheng mchoi dok du khim khai rowng inn thung ngi kseel rek hin parlaan pthiida.

³⁵ Ava leiji naanni aplung ril in thung ngi, a u anao in aptlot pik maan bi, parwaan ki Kpah ruk va naan mii pum ktaija anto ktlo ra.”