MATHI 11 - REN PAURIINA (BSI)

Baptis Kuptlot Johon Siikhu rek

¹ Ungta Jisu ngi siikhu rek sowm lei knii parseel lam thida, kurlouda khuwpii rek thung ngi kpurchuk rang leh kparyaam ra chet da.

² Tunva Johon ni rowng inn thung ngi Khrista nong tlot rek maryaak thungta, pauna tu kilṭhi ngi msiikhu rek Mhin hai sii da,

³ ungta Mhin theda, “Kurjung ra Mma ava pti mo, mdit mata neenni ktlok khat mlam suw chnik kaan da?”

⁴ Ungbi mhin inni Jisu ngi arthawng da, “Vang inra naan do aryaak leh naan do dee ava Johon hin ason pik in:

⁵ mik ktot ti khuw dei da, ungu kyeng ngi chet da, raaichii kthung ngi kartleu da, ungta knaa kbeeng ngi aryaa da, ungu kdiyou rek ki kardel lamda, ungta sra rek hin kṭha paumin mparyaam pik lamma.”

⁶ Ungu Nei krawlmii kma mii ava msuwkṭha.

⁷ Mmaanni msun dok in thungta, kurtuwl mii rek hinni Johon mlei thung ngi kthe pṭhun da: “Kbowk laiva talu ksuw kchet in pti? Tirthli doraan ding kakna ksuw in pti?

⁸ Talu lei naanni kchet in pti? Buw ktarnaal dang dang knaa miilai mo? Asuwn, buw ktarnaal dang dang ngi kirsim mii rek ava kruwng rek inn thu ka am.

⁹ Ava mkurthuttu talu leiji kchet in pti? Khulpu khat ksuw mo? Oji, Neiji akthe inna, khulpu khat ki kheel dek kurthuwk.

¹⁰ Mma mlei ava kchiir laaika thung ngi hanto kjit dok da, ‘Asuw, Nah amaiṭhuwm mi ktamsii khat kju siia, mma ngi Nah alam akpurchuwl pik ra.’

¹¹ Kinditti, Neiji ahin thaanni kthea,snu rek do pluk mii rek arlakki baptis kuptlot Johon hinnu klin ku khat lee ame; anto daat joso parwaan Kruwngpaam thang va kdil sisi ava mma hinnu klin sii kurthuwk ra.

¹² Baptis kuptlot Johon nit ki kupṭhun ni snii kpha thu parwaan Kruwngpaam ava ngi kut, lurki kja mdo phaak, ungu kut,lur mii rek ava ngi nam trom mi klou kurthuwk.

¹³ Mleija Johon ki mpha kpha dekki khulpu rek mkheng leh Nowlam ava mdophuwn;

¹⁴ ungta kurjung rang ki Elijah pi dida karlaang nuwm mii rek va anto abin chdaat so.

¹⁵ Taryaak na knaa kthloi mii ava ngi aryaa chaso.

¹⁶ “Pdainu hava charuwl rekka talu purtol lam nik di? Ava bajaar mun thung ngi ku ong da mdolet ṭhira ko own kmo rek hep daat lam,

¹⁷ ‘Neenni laampe dum innu, ungu naanna kardaam maan ti; neenva ṭap innu, ungu naanna kurnung karbaang maan ti,’ dilam da.

¹⁸ Mleija Johon kurjung ngi chaa nee me, ungbi mmaanni theda, ‘Tarnam mthloija,’ dilam da.

¹⁹ Mii Chapa kurjung ngi mchaak mneek nowl thungta,mmaanni theda, ‘Asuwn, poibuwr kparjaa ungu nee da kipri, khasna klou rek leh pnu kirvei rek plap khat,’ dilamda. Anto daat joso lousing nga mnong ngi mdo pindit.”

Krin kma Khuwpii rek

²⁰ Ava dilli klin klin nong rek maknem mdo tlot na khuwpii rek ava krai cha pṭhunda, mleija mmaanni plung ren hur lamme.

²¹ “Khorasin nang nga asuwkthi, Bethsaida nang nga asuwkthi! mleija naan athung inni klin nong kthuwk ava Tyr leh Sidon thung ngi kthuwk mkurthut daat tlaang bi, alraang raang ngi mmaanni buw kthii naa lam don purvut kubuk lam don plung ren mdo hur chaak raanna.

²² Pdainu ahin inni kthea,makṭewl nit va naan hinnu Tyr leh Sidon ava ngi kdiil dei bet ra.

²³ Ungta Kaparnahum nang nga parwaan kpha dekki kirkhiing namo? Nang ava sim thu akaptla pthii ra. Mleija nang athung ngi klin nong rek kthuwk ava Sodom thungki mkurthut daat tlaangbi,snii kpha thung ngi ka am daat ra.

²⁴ Pdainu Neiji ahin kthea, makṭewl nit va nang hinnu Sodom mi kdiil dei bet ra.”

Nei kihin Arvaan ungu Karnga chaan

²⁵ Mpha ava kat thung ngi Jisu ngi tpandang da, “Akpanpaak chaakka Apah, parwaan leh dulti ki Mukpu, havale ava ksing leh kdeipindi thungki dowl pthii tinu.

²⁶ Oji, Apah, Nah plungnee ado ngeen ava anto hep daat kurthuwk.

²⁷ Do mkheng ava Kpah ngi Nei kihinni mdo tparlaan dok; ungta Mpah kma donle ku mii khat lee ngi Mchapa ava dei me; ungu Mchapa ngi mhin mdo tpandan nra mdo kchol rek kma donle ku mii khat lee ngi Mpah ava dei me.

²⁸ Nong klou leh bowr krik mii mkheng Nei kihin arva chaan, ungu Neiji aparnga chni kaan di.

²⁹ Nei ki knong alou in ungta Nei kihinni ekurchuk chaan; mleija Neia kuplung knei ungu kuplung kparneem, ungta naan ki raothla karngat chaak nra pha chnaan di.

³⁰ Mleija Nei knong nga ko ol, ungu Nei kbowr ava kthowm.”