LUK DO KJIT KṬHA PAUMIN Paubul 7 - REN PAURIINA (BSI)

Jisu ngi Rawlmii Klin Khat Sra owr mdo Pdam

¹ Mma ngi mii rek do aryaak rang ngi pau mdo the mkheng pṭuw dok da Kaparnahum tha valut da.

² Tunva rawlmii klin khat, ungta mma ngi kdung wonsat mdolo chaak suwk khat ava kdiyou daat rang ngi koi chda.

³ Mma ngi Jisu mlei maryaak thungta, arva da Mma ngi msuwk mdo pdam pik chaak nra Mhin kikhewl chra Jehudia kver rek hai siida.

⁴ Ungta mmaanni Jisu hin arva lamda, plung klutti Mhin ktham chlam da, the lamda, “Mma tummi hava ado tlot pik ra ava kurhui,

⁵ mleija mma ngi neen chati ava wonsat mlo chaan da, synagog msak pik in da.”

⁶ Ungta Jisu ngi vanṭoi lamda. Inn ava karlat pa kma thu, rawlmii klin ava ngi maplap rek Mhin haisii da,theda, “Mukpu mhai jat pik chma, mleija nei ki inn thung ngi athlen ra ava neia kurhui chmaang;

⁷ ava ngi mlei kurthuwk da, nei kdak kat rukva Nah ado kukurdut ṭhira ava kurhui chmaang. Pdainu pauna hehe ngi atithe pik bi, nei ksra owr ava kdam chdaat ra.

⁸ Mleija nei kdak kat rukka rutan kurdu ngi ka am miilai ping, nei kukurdu ngi rawlmii rek ka am lam: ungta hava khat ava hinni, ‘Va’ kdit che mma ngi va da, ungu ktlok nitti, ‘Arvang’ kdit che arvang da; neiji ksuwk hinni ‘Hava atlo,’ kdit che mma ngi tlo da.”

⁹ Jisu ngi hava maryaak thungta mhin ngak chda, ungbi mdil kṭoi kurtuwl mii rek hin kinle da theda, “Neiji ahin thaanni kthea, Isreel thung rap klua hanto lu ngi krin kcha Neiji pha chliit maang.”

¹⁰ Ungu mma do haisi rekki inn tha mkinlet in thungta, suwk ava kdam dokki pha lamda.

Meikhunuh Chapa Khat Jisu do Pdam

¹¹ Ava dil thang bong ngi Mma ngi Nain tdit khuwpii khat thu vada, ungta msiikhu rek leh kurtuwl mii rek mluwngpa ṭhi da.

¹² Mma ngi khuwpii paltong mhai nai thungta, asuwn, kdiyou miilai khat kdom lamda, mnuh meikhunuh ava chapa khat chrel; ungta khuwpii ava thung ki mii mluwngpa tu snu ava kilṭhi da.

¹³ Ungu Mukpu ngi snu ava mdee thungta, wonsat lo chda ungu snu hin theda, “ṭap ma,”

¹⁴ Ungta Mma ngi arva da kluwng kmeida, ungbi kukdom rekka rip chdaat da. Ungu Mma ngi theda, “Tartlaang nao ahin Neiji kthea, kardel.”

¹⁵ Ungta kdiyou miilai ava ko ongda, kpau pṭhun da. Ungta mnuh hin Mma ngi piida.

¹⁶ Mkheng inni kdung reenni ṭi lamda; ungu mmaanni Isowr panpaak lamda, “Nen narlak inni klin langlang Khulpu khat kthuwkka!” Ungta “Isowr ri mmii rek mvella!”

¹⁷ Ungta Mma mlei thung ngi hava pau ava Judia paam mkheng thung leh marveel ki khuwpaam mkheng thung ngi kurjou da.

Baptis Kuptlot Johon dosii Siikhu rek

¹⁸ Johon na msiikhu rekki hava do mkheng mhin son pik lamda.

¹⁹ Ungta Johon ni msiikhu rek knii own thida, Mukpu hin haisi lamda theda, “Kurjung ra Mma ava pti mo, mata neenni ktlok khat mlam suw nikaan di?”

²⁰ Ungta mii rek ava ngi Mhin arva lamda, mmaanni theda, “Neenna baptis kuptlot Johon ni Nah hin mdo hai tsiin, ‘Nah kurjung ra Mma ava pti mo mata neenni ktlok khat mlam suw nikaan di?’ ”

²¹ ṭhang ava kat thung ngi Mma ngi omlai knempok rek, tngana rek ungu pthla kṭha kma rek pdam da, ungta mik ktot rek mii knempokki khuw dei chda.

²² Ungu Mma ngi mhin inni arthawng da, “Vang inra Johon hin naan dodee ava leh ado aryaak in ava ason pik in: mik ktot ti khuw deida, kyeng ava ngi kchetta, raaichii kthung rek kartleuva, knaa kbeeng rekki maryaakka, kdiyou ava ngi kardella, sra hin kṭha paumin mparyaamma.

²³ Nei kihinni mkhusiir kparthii kma mii ava msuwkṭha.

²⁴ Johon siikhu rek msun dok thungta, mii mluwngpa hin Johon mlei thung ngi Jisu ngi kthe pṭhun da: “Naanni talu ksuw ra kbowklaiji kva in pti? Tirthli doraan ding kakna ksuw rang ki mo?

²⁵ Talu ksuw ra kva in pti da? Dona kparneem deek deek knaa miilai khat mo? Asuwn, kṭha dang dang ngi kurthlongda, nungaiji kpaal mii rek ava kruwng rek amna thung daat.

²⁶ Ava mkurthuttu naanni talu ksuwra kva in pti? Khulpu khat mo? Oji, Neiji ahin thaanni kthe a, mma ava khulpu khat khewl dek.

²⁷ Hava mma mlei thung ngi mdo kjit dok, ‘Asuw, Nah du sukki Neiji Ktamsii ksia, Nah adu sukki mma ngi lam akirdit pik ra.’

²⁸ Neiji ahin thaanni kthea, snu do pluk rek mmaan arlakki Johon kheelli klin ku khat lee amme, anto daat joso, Isowr Kruwngpaam thung va kdil sii mma ava ngi Johon hinnu klin ra.”

²⁹ (Mmaanni hava maryaak in thungta, mii mkheng leh khasna klou rek ava baptis kuptlot Johon ni baptis mdo ptlot lamtu kilṭhi ngi rinpindit pik chlam da,

³⁰ pdainu Pharisi rek leh Nowlam chukpu rek va mma hin baptis klou kma, mdaksaan tummi sowr poibin ava pthlei lamda.)

³¹ “Ava mkurthuttu hava charuwl mii rekka Neiva talu purtol lam nik di, mmaanna tak kdu pi di lam nik di?

³² Mmaan ava kmo rek hep daat lam, bajaar mun thu ku ong lamda ungu khat leh khat kur own lamda, ‘Neenni lampe dum innu ungu naanna kardaam maan ti, neenva ṭap ṭei innu, ungta naanna ṭap maan ti.’

³³ Mleija Baptis kuptlot Johon kurjung va thenpen chaa me ungta rik rou dii nee me; ungbi naanva ‘tarnam mthloija kdingi theen tinu.’

³⁴ Mii Chapa kurjung va chaanee da, ungbi naanva ‘Asuwn, poibuwr kparja, ju kiprii, khasna klou rek leh pnu kirvei rek plap khat,’ kdingi theen tinu.

³⁵ Anto daat joso lousing ava mnaole mkheng ngi rinpindit pik da.”

Pharisi Simon Inn thungki Jisu

³⁶ Pharisi rek arlakki khatti Jisua mdo maal ṭhi chaak nrangki the chda, ungbi Mma ngi Pharisi inn tha vang da, tebol be ngi kmaalra ko ongda.

³⁷ Ungta asuwn, khuwpii ava thungki pnu kirvei snu miilai khatti Jisua Pharisi inn thung ngi ku kong daatta tdit aryaa da, reidii thao ava uwm khat ktarnaal deek thung ngi arhai sinda.

³⁸ Mdilpang tha mkhu ther ri rip da, ṭap da, marthli ngi mkhu kupchor pṭhunda, mluw tun ki msam ava ngi knuwl da, ungu mkhu ava put da, thida reidii thaovi pbul da.

³⁹ Tunva Mma ko own kcha Pharisi ava ngi deida, mthina ngi theda, “Hava Miilai ava Khulpu khat mkurthut bi, Mma kikmei snu ava ku ungu tak hep kdu miilai tdit kdeira, mleija snu ava pnu kirvei khat.”

⁴⁰ Ungbi Jisu ngi mhin arthawngda, theda, “Simon Neiji nah hinni do khat kdo the ra ka amma.” Ungta mma ngi arthawng da, “Talu da, Chukpu?”

⁴¹ “Sum kpurpuwk miilai khatti sum lei ktuwl knii rek thloi da, ungu khatti dinarii arjaa parnga lei tuwl da, ungu khatti som parnga lei tuwl da.

⁴² Mmaanni mpiik pchaan maan thungta, mikniing inni ptlot pik lamda. Tunva mmaanve arlakki ku ngi mma va knem betti wonsat mloa?”

⁴³ Simon ni arthawngda, “Nei kdo bin chaak va mma ngi knem betti mdo ptlot pik khat ava ra.” Ungbi Jisu ngi mhin theda, “Kindit deekki nang ngi akṭewlla.”

⁴⁴ Ava dilli snu ava ktong tha kinle thida, Simon hin theda, “Snu hava nangva adea? Neiji nah inn thu klut ping, ungu nangva kukhu kdo alṭhut nra dii mpii mti, pdainu hava snuva marthli ngi kukhu pchor thida msam mi knuwl da.

⁴⁵ Nangva mput mti, pdainu Neiji karvan lu daat ki mma ngi kukhu mdo put down liit me.

⁴⁶ Nangva kluw thao pbul mti, pdainu mma va kukhu ava reidii thaovi pbul da.

⁴⁷ Ava ngi mlei kurthuwk da, Neiji ahin kthea, mupnu ton knempok ava kuptlot pikka, mleija mma wonsatta nemda, pdainu ktlowm suwnni wonsat klo rek ava ktlowm suwnni kuptlot pik.”

⁴⁸ Ungta Jisu ngi snu hin theda, “Apnu ton rekka akuptlot pikka.”

⁴⁹ Ava dilli tebol be ngi Mma do ko onṭhi mii rekki msingreel inni hanto kthe pṭhun lamda, “Pnu rek ruk kuptlot pik daat hava ku rang da?”

⁵⁰ Ungta Mma ngi snu ava hin theda, “Nah ado rin chaakki ataktlanna; kdaaiji vang cha.”