LUK DO KJIT KṬHA PAUMIN Paubul 6 - REN PAURIINA (BSI)

Sabath mlei thu mdo Khewl

¹ Sabath nii khatti, Mma ngi buh bil rek thu chet da, msiikhu rek va chavui angṭhe pjii lamda, mapjaa thuwnni knuwr lamda, chaa lamda.

² Pdainu Pharisi rek mii angṭhe ngi the lamda, “Talu leiji Nowlam do rot ma sabath nitti atlot inna?”

³ Ungbi Jisu ngi arthawng da, “Devid ti mpoi mtham thu mdo tlot ava naanva pa maan ti mo? mma leh mmiiṭhi rekki:

⁴ tak heppi Isowr Inn thu lut lamda, ku mii khat lee tumva Nowlam do rot kma, mdo down dok thenpen ava louda chaa da, pdainu ava thiimpu daatti mdo chaak ra, ungta mmiiṭhi rek hin rukku mma ngi pii memo?”

⁵ Ungta Mma ngi mhin inni theda, “Mii Chapa ava sabath ki Mukpu ruk kurthuwk.”

Khut Khat Kyeng Miilai Khat

⁶ Sabath nit ktlok khat thu, Mma ngi synagog thu lut da mpurchu mpha thu, mchangki khut kyeng miilai khat amda.

⁷ Ungta Nowlam chukpu rek leh Pharisi rekki Mma ava sut pṭoi lamda. Mmaanni mraal mdo piik nraan, sabath nitti kapdam sik rang mo kdingi suw lamda.

⁸ Pdainu muplung reel in ava Mma ngi deida, ungbi mkhut kseek miilai ava hin Mma ngi theda, “Hava tha arvang ra rip.” Ungbi mma ngi hanrip da ava tha rip da.

⁹ Ungta Jisu ngi mhin theda, “Neiji pau aju khewl inni, Nowlam do the dil kṭoiva sabath nit va kṭha tatlot rang mo mata sul tpurnul rang, rinkhu tiktlen rang mo mata ti ea kre rang?”

¹⁰ Ungta Jisu ngi mii mkheng nga suw ploi lam thida, ungu mhin theda, “Akhut arjii.” Ungta mma ngi arjii da, ungbi mkhut ava dam chda.

¹¹ Pdainu mmaanna kdung reenni muplung in thiida, Jisua talu pirdit che naanna kdingi karseel psuk lamda.

Jisu ngi Kenyee rek Sowm lei Knii mdo Kchol

¹² Hava nit rek thung ngi Mma ngi lown tha kṭhil chra hangda; jaan khatti Mma ngi Isowr hin kurnowl da ṭhil chda.

¹³ Ungu khuw mvaar thungta, Mma ngi siikhu rek own da, mmaan thungki sowm lei knii ava kenyee rek kdingi mmiing in thowl da;

¹⁴ Mma ngi mmiing Pitor mdo dit Simon, ungu mnaopa Andrija, Jeems, Johon, Philip, Bartholomio,

¹⁵ Mathi, Thomas, Alphias chapa Jeems, mpaam tummi plung kvar Simon,

¹⁶ Jeems chapa Judas ungta sluk arbiing Iskariot ki Juda hava lim.

Jisu do purchu rek leh mdo Pdam rek

¹⁷ Ungta Mma ngi mmaan tu jungṭum lamda, mmun khat daam ava thu rip lamda, msiikhu rek klin langlang mii mluwngpa rek leh, Judia leh Jerusalem ki mii mkheng ungu truwn biingki Tyr leh Sidon ki rek ava Mma hin karyaa chra ungu omlai mdo pdam pik lam nra klin lang lang ngi thuwk kurtuwl lamda.

¹⁸ Ungta pthla ktobor rekki suwk mdo pthuw rekka dam chlam da.

¹⁹ Ungta mii mluwngpa mkheng ngi Mma mdo nor chaak nra the lamda, mleija Mma thungki rutan thuwk da mii mkheng ava pdam da.

Kanpa leh Kja Kakham

²⁰ Ungta Mma ngi mmikki siikhu rek suw rim lam thida, theda, “Sra naan ava asuwn kṭha! mleija Isowr Kruwngpaam ava naan atum.

²¹ “Tun poi ktham naanna asuwn kṭha! mleija naanna poi kpa ra. “Tun kṭap naanna asuwn kṭha! mleija pnii chnaan di.

²² Mii Chapa ava tummi mii rekki apder chaan da, aneeng pthiin da, ning er aplo inda, ṭha me didon amiing in mlo pthiin mpha thu asuwn kṭha!

²³ Ava nit thung ngi ekanpa chaan, kanpa ngi kunchowm chaan, mleija asuwn, parwaan tha naan ki mnah ava klin ra; mleija mpah le ruk va khulpu rek hin anto mdo tlot in.

²⁴ “Pdainu suwang naanna asuwn kthi! mleija lungam na ado arlaan chaak dok in.

²⁵ “Tun poi kpa rek naanna asuwn kthi! mleija naanna apoi in ktham ra. “Tun kipnii naan ava asuwn kthi! mleija kurnung karbaang da ṭap naan di.

²⁶ “Mii mkheng ngi kṭha dida mdo the naan ava asuwn kthi! mleija mmaan pah le ruk va kindit kma khulpu rek hin anto mdo tlot in.

Aksnuwm kmarek Wonsat Alo

²⁷ “Pdainu Neiji karyaa naan hin kthea, aksnuwm kmaan rek wonsat alo chaan, akipder kcha rek hin kṭha atlown,

²⁸ pauhur kbuk rek hin phowl kṭha apii chaan, ungu akjowm kchaan rek tummi aṭhil pik chaan.

²⁹ Abiing thaan aktipeeng in mii ava hin khat ktongki ruk adoi pik; ungta aphrik in ktha klou mii hin aphrik in murson ruk apii tpom in.

³⁰ Ahin thaan kṭhil mii khim khai hin apii chaan; ungu ado anaan klou mii ava hinki lou pinle maan.

³¹ Ungta naan hin mii rek dotlot ra ado ngei in ava heppi naan ruk va atlo in.

³² “Naan wonsat aklo chaan mii rek daat wonsat alo innu, talu msit ka am da? Mleija pnu kirvei mii rek ruk va mmaan wonsat klo ava wonsat mdolo in.

³³ Ungta naan hin kṭha ktlo mii rek hin daatti kṭha atlot innu, ava talu msit ka am da? Mleija pnu kirvei rek rukva anto mdo tlot in.

³⁴ Ungta naanni arlaang chnik di kdingi ado bin in mii rek hin daatti apurpuwk innu, ava naan hinni talu msit ka am da? Ava heppi mdo arlaan chaak nra, pnu kirvei rek rukku pnu kirvei rek hin mdo purpuwk in.

³⁵ Pdainu naan aksnuwm kmaan wonsat alo in, kṭha atlot pik in, kinle ra ngei maan; mbi naanki mnah ava klin ra, ungta naan ki kparthaang sii ava chapa rek kurthuwk naan di; mleija Isowr va plung ksel ungu mthina ngi kparning ruk wonsat mdolo.

³⁶ Apah in plungnee heppi plung anei in.

Ktlok Mii Kekṭewl

³⁷ “Kṭewl maan, ungu naan ruk akṭewl in nime; mraal pii maan, ungta naan ruk araal apiin nime; aptlot pik in, ungu naan ruk akuptlot pik chraan.

³⁸ Apiin, ungta naan ruk akpii chraan; kṭha ngi apartee inra, anam inra, atnok purkuk inra, kchuwl jammi naan akhut khiin in thu ka am ra. Mleija naanni partee da ado piik naan thu akpartee pik chraan.”

³⁹ Mma ngi pau purtol rukva mhin inni theda; “Mik ktot khatti mik ktot khat kṭhi rang mo? Khur thu mikniing inni tla nime mo?

⁴⁰ Siikhu khat ava mma chukpu tun tha ka am pme, pdainu mii pum ktaiji kurkhum mi mkurchu dok dil tha, mma chukpu ava hep daat ra.

⁴¹ Naan adaksaan thungki ktobor kdei kma, talu leiji a u anao in mik thungki dangka arko inna?

⁴² Mata tak heppi a u anao hin, ‘Ku u knao, neiji amik thungki dangka ava lou pthi dok ni,’ kdingi atheenna, naan adaksaan mik kat thungki ktobor ava dei maan timo? Kṭha do tlot ktlo naan, ru kri ngi naan adaksaan kat thungki ktobor alou pthi dok in, ungta naan a u anao in mik thungki dangka ava adolo pthi nraan kinthiir deekki dei ro naan di.

Ding Khat leh Mthei

⁴³ “Mleija ding kṭha ava ngi thei kṭha kma chui me, mata ding kṭha kma ava ngi thei kṭha chui me;

⁴⁴ mleija ding ava mleenki theiji mdo tdet. Mleija kduwt rek ava tirliing leenki pme, mata rik rou ava turmu nowm thungki tchom ava pme.

⁴⁵ Kṭha miilai ava muplung thung ngi kṭha mdo purtuwl ava ngi kṭha mdo thuwṭhi, kṭha kma miilai ava muplung thung ngi kṭha kma mdo purtuwl ava mdo thuwṭhi; mleija plung thungki kdim ava ner ri kpau.

Inn Knii Ksa rek

⁴⁶ “Talu leiji Nei kdo the ava ktlo in kma, Mukpu, Mukpu, diin ti ado to own in?

⁴⁷ Nei kihin arva da Nei kpauna rek aryaa da ktlo mii pum ktai ava talu mdut tdit Neiji naan hin aju tdet inni.

⁴⁸ Mma ava kukthukki touda, lung leenni inn parkal da ksa ava hep daat, ungta dii linda, dii kluwng ngi deeng daat joso, ava tnok pchaang me, mleija knetti mdo sak dok.

⁴⁹ Pdainu aryaa thida ktlo kma mii ava mmun ktaak dul leen ni inn parkal da ksa mii ava hep daat, dii kluwng ngi mdeen daat le kbeiji tluw chda, ungta inn ava mmeel kthi ngi ktluw kcha.