KOLOSSIA 4 - REN PAURIINA (BSI)

¹ Kpu rek, parwaan tha naanni Kpupa Khat ado thloi in ava ado dee raan, naanki suwk rekka kindit deekki ungu kṭha ngi atlot pik in.

Kparseel

² Kṭhil cha thu kpanpaak tu kilṭhi ngi mik khut ahar inra, kdet liit kma anowl thlit chaan.

³ Ungta pauna tummi Isowr ri thurngot mdo tapvan pik chaak nraan neen ktum rukka mhai ṭhil pik chaan, Khrista ki kukthuk pau kthe thuw rang ki nei rukka rowng inn thu ka am chdaat imping.

⁴ Mleija neiji kdo the rang kat ava kdo the chaak nra mhai ṭhil pik chaan.

⁵ Mpha kcha khim khai alou inra, duwn tha ka am rek hin adaksaan na ksing ngi chet tlowng in.

⁶ Naan mii pum ktaiji tak heppi arthawng nikdi tdit ado dee nraan, ptih lulu ngi apa al inra, apau saam inna mpha ktai thu mman klu kurthuwk so.

Mṭut na Kurvui

⁷ Lam trin chaak kurhuiji sok klou, ungu Mukpu hin nei ksra owr ṭhi, nei kwonsat lo ku u knao Tykhikas ava ngi nei knong tlot mlei mkheng nga ak son pik chraan.

⁸ Tditta naanni nei ki mlei deida ungu mma ngi naan plungril ado tuk kso pik chaak nraan, hava mlei kat tummi mma ava naan hin neiji ksii chaakka.

⁹ Ungta lam trin chaak kuhui naan amii khat, ungu nei kwonsat lo ku u knao Onesimas ava mma tu kilṭhi ngi ksii chaakka. Hava tha kthuwk do khim khaija mmaanve ngi ak son pik chraan.

¹⁰ Neiji rowng inn thu kdo amṭhi Aristarkas ava ngi leer khatti aturvui chaak inna, ungu Barnabas riilam kthuwk Mak (mma mlei thu ado kparseel in ava ado arlaan dok in, mma ngi mthlen luwngta mhai kowl pik chaan.)

¹¹ Ungta Jastas mdo dit Jesu ngi leer khatti aturvui chaak inna. Isowr Kruwngpaam kira nong kdo suk ṭhi rek arlakki vunmor kreen rekka hava mmaan daat kurthuwk, ungta mmaanna nei kuplung ngamna rek lam.

¹² Naan amii khat in, Jisu Khrista ki sra owr khat Epaphras ava ngi aturvui chaak inna, naanni Isowr poibin mkheng thu plung kurchuwl, plung krippi ari nraan, mṭhil chaak mpha ktai thu mma ngi plung klutti ajubin phaak chaan da.

¹³ Mleija mma ngi naan tum leh Laodesia ungu Hirapolis rek tummi kdung nong mdo suk chaak ava neiji sakhi kuhur pik ka.

¹⁴ Nei kwonsat lo kdimpa Luk leh Demas ava ngi aturvui chaak inna.

¹⁵ Laodesia ki nei ku u knao rek leh Nimpha ungu mma inn thungki Rinlop hin leer khatti nei kdo arvui chaak ava mhai son pik chaan.

¹⁶ Ungta naan arlakki hava chethia apat dok inta, Laodesia ki Rinlop thung ruk va apa lamso; ungta naan rukva Laodesia ki chethi ado pat nraan asuw dei in.

¹⁷ “Ungta nang ngi Mukpu hinki ado arlaan chaak sok adolo ava mkurkhum nra ava ado dee ra,” kdingi Arkhipas hin mhai son pik chaan.

¹⁸ Poul nei kukhut katti kjit nu, leer khatti akurvui chaak inna. Mdo tbowl ava mhai parngiil pik chmaan. Plungnee ngi aju kurtho ṭhi chaan so.