Yesaya 1 - Sura Magali Nuntu Ngkatuwu

¹ Sura seʼi banganinya waʼa mpatiendo kono Yahuda pai Yerusale anu ndapatongawa i mPue Ala ri Yesaya anu i Amosi, ri tempo i Usia, i Yota, i Ahasi pai Hisikia moparenta ri Yahuda.

I Pue Ala manceko waʼa ntau-A 1:2-20

² Pedongekamo ee yangi, parindayamo ee lino! Ndatoʼo i mPue, “Waʼa ana anu roomo kupotiana mangaewamo Yaku.

³ Japi naincani puenya, kalide naincani dula mpangkoni anu napatokaka mpuenya. Paikanya tau-Ku to Isaraeli bareʼe naincani; bareʼe narata ndaya ntau seʼe.”

⁴ Marugimo komi banca anu masalaa, waʼa ntau anu moruta pai majaʼa! Komi manawumo ua waʼa ncalaami. Komi bareʼemo mantarima i Pue pai mantalikusimo i Pue Ala Anu Magali anu kamonconya da ndipanyomba.

⁵ Wenu painaka ndibali mpaliu? Bara da rayami da ndapakaʼai woʼu kanee hukumi? Woʼomi juku-jukumo kebisu, rayami pai nawa-nawami majaʼa.

⁶ Ungka ri woʼomi tudu-tudu ri witimi bemo reʼe anu malori suma ngkoromi. Koromi mewoke pai kenana, papowela-wela. Waʼa mbelami setu bareʼepa ndawusoʼi bara ndawewesi pai bareʼe woʼu ndapakulika lana.

⁷ Tanami roomo ndagero; waʼa ngkotami pura ndapanowa. Ri suarami napantima ntau mencua tanami pai mangagero pura-puranya.

⁸ Jamo Yerusale yabinya, paikanya ewa sambaʼa kota anu ndalimbu ncape bemoreʼe rosonya, jamo ewa kandepe ri tongo bonde anggoro bara ewa ata ncambali ri tongo bonde ncuai.

⁹ Ane rapanya i Pue Anu Makuasa bareʼe malapasaka kita bara tesangkuja tau, kita da maropumo mpaliu, ewa Sodomo pai Gumora.

¹⁰ Yerusale, waʼa ntadulako pai bancamu mewalimo ewa to Sodomo pai Gumora. Ndipedongeka nunjaa anu da ndatoʼo i mPue ri komi; parindaya nunjaa anu ndapaguruka kita i mPue Ala.

¹¹ Ndatoʼo i mPue, “Ndisarumaka bara kupokono pura-pura panyomba anu bareʼe bali-bali ndipampanyombaka ri yaku? Malente rayaku waʼa bimba anu ndiʼombasi ndipanyombaka pai lori ana japimi. Daa japi laki, bimba pai mbula bareʼe kupokono.

¹² Isema anu mampokau komi mangkeni mpengaya-ngaya panyomba setu ri kamaʼimi manyomba ri Yaku? Isema anu mampokau komi da kancao-ncao ri Banua Magaliku setu?

^13-14 Bereʼe yowenya pangkenimi waʼa mpanyomba setu. Wusu luaku maenga waunya. Marika rayaku pai bareʼe kupokono mangkita pamposusakami Wuya Dawoʼu, waʼa eo Umapo, waʼa eo mposusa pai waʼa mpotobumi ua songka mpoʼagama. Maka pura-pura setu roomo ndileroka waʼa ncalaamo pai mewali ewa sambaʼa kinoyo ri Yaku; malengekumo mangangkoyo.

¹⁵ Ane nditora palemi mekakai, bareʼe da kulinga. Bareʼemo kuimba ewambeʼi kasondo mpekakaimi, maka bareʼe kupokono mampedongeka, maka palemi setu maria ngkanimo mepepate.

¹⁶ Wusoʼimo koromu rantani magali. Peʼontoka pura-pura jaʼa anu ndiwianaka setu. Mewali neʼe ndiwianaka woʼu powia anu majaʼa.

¹⁷ Ndipegurumo mampowia anu madago. Pekakorekamo kayoa pai ndipapurasimo pejeani; waika ana ilu anu ntau seʼe pai sambiranakamo kara-kara waʼa bemba.”

¹⁸ Ndatoʼo i mPue, “Maʼi tamparoo kara-kara seʼi. Mau rapanya komi mawaa ewa polimbi ua waʼa ncalaami, komi da kubusu naka buya magali ewa bagi. Mau rapanya waʼa ncalaami sondo pai manee, bareʼemo da kupepalisi pura-pura.

¹⁹ Ane ndipokono mepoʼinaya ri yaku, komi da mangaepe waʼa anu madago anu ndirata ri tanami.

²⁰ Paikanya ane komi maewa Yaku, komi da mate ri poʼiwali. Yaku, Pue, anu mompau seʼi.”

Kota anu baleparu 1:21-31

²¹ Kota anu iʼowi todo, seʼi-seʼi ewa sambaʼa tau anu toposalara! Iʼowi pura-pura tau banganinya loʼe montimba pai mayoa raya, paikanya seʼi-seʼi napearimo waʼa ntopopepate.

²² Yerusale, iʼowi siko ewa salaka, paikanya seʼi-seʼi bemoreʼe olinya. Iʼowi siko ewa anggoro anu monyami, paikanya seʼi-seʼi mbouemo mpaliu jamo ewa ue.

²³ Waʼa ntopombawanakamu topeewa pai mewalimo pomokau ntopangangka; tau seʼe napokono mantarima parasee pai doi lekoaje. Bareʼe napokono mampelae ana ilu ri tongo mpobotusi; bareʼe napokono mampedongeka pogilu waʼa bemba.

²⁴ Inceʼe painaka i Pue Anu Makuasa, Pue Ala pue nto Isaraeli mangantoʼo, “Ee waʼa iwaliku, Yaku da mampesawaka waʼa ngkakodi ndayaku ri komi, da naka bareʼemo ndipakasusa woʼu Yaku.

²⁵ Yaku da mangahuku komi. Komi da kupakagali da ewa tau anu mampalino wuyawa; pura-pura anu keʼonu da Kuyalisi ungka ri komi.

²⁶ Da kuwaika muni komi waʼa ntopobotusi pai topepatuju ewa iʼowi. Da naka Yerusale da ndatoʼo woʼu kotaanu mayoa pai todo.”

²⁷ I Pue mayoa, inceʼe painaka Sira da mancorepaka Yerusale pai waʼa ntau anu moncosoi.

²⁸ Paikanya waʼa ntau anu masalaa pai meewa ri Sira da ndagero, pai pura-pura anu mampalaika Sira da ndaʼopisaka.

²⁹ Tau seʼe da marata ea, ua mampanyomba waʼa mpuʼu ngkaju pai mampatani waʼa bonde tila waʼa lamoa.

³⁰ Tau seʼe da mewali ewa puʼu ngkau anu malele iranya, pai da ewa bonde anu bareʼemo ndauesi.

³¹ Da ewa deami anu tenunju ua nanesiki apu, da ewanceʼe seʼe woʼu waʼa ntau makuasa da magero ua waʼa mpowianya ngkalionya anu majaʼa, pai bereʼe anu mangkoto mampapeʼonto kagero setu.