Yakobus 1 - Sura Magali Nuntu Ngkatuwu

Petabea 1:1

¹ Waʼa ngkasangkompo waʼa ntau i mPue Ala pura-puranya anu reʼe ri sambawo lino! Tabea ungka ri yaku, Yakobu, watua i mPue Ala pai watua i Yesu Kerisitu.

Peaya pai kaloʼe ndaya 1:2-8

² Ee waʼa ngkasangkompo anu kupotowe, ane ndipomberataka mpengaya-ngaya pompebutuka, inceʼe da ndiepe ewa porasi.

³ Maka ndiincani, ane komi todo meaya ri Pue ri tempo ndipampomberataka pompebutuka, inceʼe da marangani karoso mpeaya ndayami.

⁴ Ndijagai da naka karoso ndayami setu kakoteranga-rangani rantani komi da gana-gana kojo pai bareʼe reʼe bara nunjaa-njaa anu ndipomakura.

⁵ Ane reʼe sambaʼa tau ri oyomi maepe kakura mpaincaninya, mbolimo naperapi ri Pue Ala, da ndapawaika siʼa kaloʼe ndaya, maka i Pue Ala pande mporaya, bareʼe da ndapepurungi da mawaika tau nunjaa anu naperapi.

⁶ Paikanya tau anu merapi neʼe kanuʼu-nuʼu rayanya, pai da naaya kojo. Maka tau anu kanuʼu-nuʼu rayanya bareʼe sala ewa ropo ri tasi anu nawui ngoyu wainjoʼu-waimaʼi.

^7-8 Tau anu ewanceʼe bareʼe tumotoa ponawa-nawanya, bareʼe nakoto mampakanoto bara nunjaa anu da napowia. Tau anu ewanceʼe kamonconya neʼemo napomata-mata bara nunjaa-njaa ungka ri Pue Ala.

Kakaasi-asi pai kakoreʼe 1:9-11

⁹ To Kerisitu anu kaasi-asi da napakawongkomo rayanya maka i Pue Ala anu da maoretaka tau seʼe.

¹⁰ Pai to Kerisitu anu koreʼe mbolimo da mawongko woʼu rayanya, ane ndapakalauka i mPue Ala siʼa. Maka tau koreʼe da paya ewa sese ewo.

¹¹ Ane mesindimo reme pai ane maʼaimo karamedanya, da malelemo ewo setu pai da marudumo sesenya liu payamo woʼu kadolidi ncese setu. Ewanceʼemo da pewalinya tau anu koreʼe, tau seʼe da magero sindara mpompari-mparinya mampasambaka kakoreʼenya.

Pompebutuka pai pekelo 1:12-18

¹² Yontomo kalindo ndaya ntau anu todo ri peaya ndaya ri sindara naparata pompebutuka. Maka ri karoonya narata pompebutuka seʼe siʼa da marata saronya, inceʼemo katuwu anu ndajanji i mPue Ala ri waʼa ntau anu mampotowe Pue Ala.

¹³ Ane reʼe tau anu manawu ri pompebutuka anu ewanceʼe taʼanya, neʼe boi natoʼo, “Pompebutuka seʼi ungka ri Pue Ala kamaʼinya.” Maka i Pue Ala bareʼe da nanangi pompebutuka, pai i Pue Ala bareʼe sangkani mampebutuka tau.

¹⁴ Paikanya tau anu manawu ri pompebutuka ua ri rayanya lawi lau kasawoyo ndayanya ri anu majaʼa.

¹⁵ Mewali, ane naluluka kasawoyo ndayanya anu majaʼa setu, da metondamo salaa, pai ane matasamo salaa setu inceʼe anu mampowuaka kapate.

¹⁶ Ee waʼa ngkasangkompo anu kupotowe, neʼe boi manawu komi ri pompebutuka.

¹⁷ Pura-pura anu madago pai puru ndaya anu gana-gana ungka ri suruga kamaʼinya, ndawai i mPue Ala anu mampapewali pura-pura anu merara ri yangi. Sira Pue Ala anu bareʼe da reʼe kabalinya, bareʼe sangkani da molimbayo pogumbalinya.

¹⁸ Podo tangara ndaya-A ngkalio-A kita ndapapewali ana-A mampoliu nuntu anu monco. Powia-A ewanceʼe da naka ri tempo anu ndapakanoto kita da mewali ana uyue ri wuwunya anu Ndapapewali pai anu moʼinosa.

Ndadonge pai ndawianaka 1:19-27

¹⁹ Ee waʼa ngkasangkompo anu kupotowe, ndipedongeka kojo anu da kutoʼo seʼi! Sambaʼa-sambaʼa sangaya-ngaya da maliga pampedongekanya, malengi pompaunya pai bareʼe ganggara sengke.

²⁰ Tau anu sengke bareʼe da nakoto mampowia anu madago, anu da mampakawongko raya mPue Ala.

²¹ Inceʼe painaka nditajimo waʼa ngkabiasami anu majaʼa pai karika. Ndisabemo ri kalauka ndaya nuntu anu ndapomuya i mPue Ala ri rayami, maka nuntu seʼe rosonya mancorepaka komi.

²² Mbolimo komi da mamponggaleka nuntu anu ndatoʼo i mPue Ala, neʼe podo ndipedongeka, maka ane ewanceʼe komi mambambasi koromi ngkaliomi.

²³ Tau anu madonge Nuntu i mPue Ala, paikanya bareʼe nawianaka, inceʼe ewa tau anu ntongo mampeole lionya ngkalionya ri pembayo.

²⁴ Roo napeole mpodago lionya, nepa malai pinca siʼa, liu-liu nakalinganimo ewambeʼi potaʼa lionya seʼe.

²⁵ Padika i mPue Ala bereʼe posarinya pai mampotumpu roso da mangalapa tolino. Pai tau anu mampeguru pai mamparindaya mpodago pai mangawianaka waʼa mpadika setu, pai banya podo mampedongeka nepa nakalingani, tau setu da ndadonco i mPue Ala ri mpengaya-ngaya anu nawianaka.

²⁶ Ane reʼe sambaʼa tau anu mantoʼo siʼa mepoʼinaya ri agama, paikanya bareʼe napepewoloka kasowa mpaunya, kamonconya siʼa mambambasi koronya ngkalionya; bereʼe yowe mpanyombanya.

²⁷ Maka pepoʼinaya anu monco ri agama anu silulu pai pepokono mPue Ala Papa: inceʼemo: mantulungi waʼa ana ilu pai waʼa ntau bemba anu mapari katuwunya, pai da majagai koronya ngkalionya da naka neʼe natengosi mpepokono lino seʼi.