SETERI 7 - Sura Magali Nuntu Ngkatuwu

¹ Inceʼe karadua ngkaninyamo i datu pai i Hamani molimbu mangkoni pai i Seteri.

² Sindara mpanginu anggoro, meoasi woʼu i datu ri Seteri, ndatoʼo, “Mewali siko rongoku, nunjaa kojo anu nupodaraya? Toʼomo! Manoto da kuwaika siko, mau nuperapi santongo ri kamokoleku.”

³ Mesono i Seteri, natoʼo, “Ane ndipomadago Datu, kuperapi da naka yaku pai waʼa bancaku da ndituwuri.

⁴ Maka yaku seʼi pai bancaku roo ndapobalu da ndapepate. Ane rapanya kami podo ndapobalu da mewali watua, da kumonjii-njiimo, bareʼe darata yaku ri komi Datu. Paikanya seʼi kami da ndaropu pai da ndaoʼpisaka pura-pura!”

⁵ Nepa meoasi i Datu Ahasiwero ri Datu Weʼa Seteri, ndatoʼo, “Isema anu makoje da mowia ewanceʼe? Mbeʼi tau setu?”

⁶ Mesono i Seteri, natoʼo, “I Hamani tau anu majaʼa seʼi, iwali anu mangajeani kami!” Ewa doito i Hamani mampeole i datu pai datu weʼa.

⁷ Maʼai kojo kasengke ndaya i mokole, meoko sira ndapalaika meja mpangkoni liu mpesuwu njoʼu ri bonde langkanae. Naincanimo i Hamani, roomo ndabotusi da mangahuku siʼa, inceʼe painaka maroo-roo mpaliu siʼa pai i Datu Weʼa Seteri, merapi da ndasorepaka.

⁸ Ri kapuramo mponawa-nawanya medungkalaka i Hamani ri wawo langka i Seteri, merapi da ndatuwuri, paikanya ri tempo setu i datu mewalili muni ungka ri bonde langkanae mesua njairia. Pangkita i datu powia i Hamani setu, maboo sira ndatoʼo, “Wenu? Ntongo makojepa siʼa da majaʼati i datu weʼa ireʼi, ri suaraku pai ri langkanaeku?” Butu mompau i datu ewanceʼe, ganggaramo karata waʼa mpegawai mangasilu lio i Hamani.

⁹ Nepa mompau i Haribona, sambaʼa tau ri oyo waʼa ntau anu rata mancilu lio i Hamani setu, natoʼo, “Datu, mosu ri banua i Hamani njaumo napatoka nono da ndapaloeka tau, ruampuyu pai radua meteri kalangkatinya. Inceʼe nawangu i Hamani da ndapaloeka i Modekai tau anu mantuwurimo komi Datu.” Nepa moncongka i datu, ndatoʼo, “Ndiloekamo i Hamani ri nono setu!”

¹⁰ Ewanceʼemo i Hamani ndaloeka ri nono anu napatoka da ndapaloeka i Modekai. Roo setu nepa mongku karau ndaya i datu.