SETERI 6 - Sura Magali Nuntu Ngkatuwu

I Datu mabangkei i Modekai 6:1-13

¹ Ri wengi setu seʼe i datu bareʼe ndaleʼo yore. Inceʼe painaka ndaperapi sura ngkalau ndapaʼuki tuntuka ngkamokolea, ndapokau tau mangabasaka sira.

² Ri sura setu ndabasa kono i Modekai anu roomo mamparataka i datu kareʼenya radua tau anu da mampepate i datu, tau setu i Bigatani pai i Teresi. Tau radua setu anu ndapakanoto majagai paturua i datu.

³ Ndapeoasi i datu, “Bara nujaa pebangkei sili mpowia anu madago setu anu ndawaika i Modekai?” Mesono waʼa ntau setu, natoʼo, “Bereʼe bara nunjaa anu ndawaika siʼa.”

⁴ Nepa mompau i datu ndatoʼo, “Isema waʼa mpegawaiku anu reʼe ri langkanae seʼi-seʼi?” Sindara setu i Hamani nepa mesua mpinca ri soma langkanae, tinako ndayanya da maperapi ri datu da naka ndawai da maloeka i Modekai ri nono anu roo napatoka setu.

⁵ Mesono waʼa ntoporioko setu ri datu, natoʼo, “I Hamani seʼi ri langkanae da rayanya mancuara komi Datu.” Ndatoʼo i Datu, “Pokaumo napesua!”

⁶ Butu mesua i Hamani, ndatoʼo i datu ri siʼa, “Reʼe tau anu da kuwaika petubunaka anu bangke. Mewali nunjaa anu da kupowiaka tau setu?” Natoʼo i Hamani ri rayanya, “Isema woʼu anu da ndawaika i datu petubunaka anu ewancetu kabangkenya? Manoto kayakunya!”

^7-8 Inceʼe painaka mesono siʼa natoʼo, “Tau setu sangaya-ngaya da ndapaporengkoka rengko ngkamokole anu biasa ndipake Datu. Nyarami Datu da ndaramba-rambanika waʼa mpeawa ngkamokole.

⁹ Sambaʼa tau anu bangke ri negara ungka ri oyo waʼa muli i Datu anu da mampaporengko tau anu da ndatubunaka setu Datu, nepa da ndapelamba ri nyarami Datu nepa da ndakeni tau setu mantolilimi kota moliu ri tana lapa ngkota. Tau bangke setu da melinja ri suaranya pai da meboo-boo, natoʼo, ‘Ewaseʼimo pampowia i datu tau anu ndatubunaka!’ ”

¹⁰ Ndatoʼo i datu ri Hamani, “Ane ewanceʼe pakaliga tima rengko setu pai nyara, powiamo gori mpetubunaka ri Modekai to Yahudi setu. Powiamo ewa pantoʼomu roo, neʼe boi reʼe kakuranya mau sakodi. Siʼa setu njau motunda-tunda ri suara baa-baa langkanae.”

¹¹ Ungka lairia natima i Hamani rengko pai nyara, rengko setu napaporengkoka i Modekai. Roo setu i Modekai melamba ri nyara setu. Nepa napoyunu i Hamani pai waʼa ntau mantolilimi kota moliu ri tana lapa ngkota, seʼi meboo-boo i Hamani, natoʼo, “Ndipeole, ewanceʼimo ndapampapeawa i datu tau anu ndatubunaka!”

¹² Roo setu nepa mewalili i Modekai ri baa-baa langkanae. Paikanya i Hamani ganggara mewalili i banuanya. Nasilu lionya boi nakita ntau maka maʼai kojo kaea matanya.

¹³ Napauka rongonya pai waʼa yununya nunjaa anu mewali setu. Paikanya mompau rongonya pai waʼa yununya anu lawi loʼe mantoʼoka siʼa, “Tongawa siko nanangi i Modekai rosomu. Siʼa to Yahudi paikanya bareʼe nukoto maewa siʼa. Manoto da napanangi siko.”

I Hamani ndahuku mate 6:14–7:10

¹⁴ Ntongo mompasimbaju tau seʼe pai i Hamani, ratamo waʼa ntau ri langkanae, mondadu-ndadu tau seʼe da mampoyunu i Hamani da njoʼu ri polimbu mangkoni anu napareʼe i Seteri.