PATADA 9 - Sura Magali Nuntu Ngkatuwu

Kaloʼe pai katengo 9:1-18

¹ Kaloʼe mawangu banua pai napatoa nononya papitu.

² Roo nasambale pinatuwu anu da napake mosusa, napasilolongani ue anggoro pai napatoka pangkoni.

³ Waʼa mbeʼa toporioko napokau njoʼu meboo-boo ri kandatekanya ri raya ngkota,

⁴ “Isema anu bareʼe gana pangaincaninya, ndipalai maʼi!” Ri anu bareʼe gana loʼenya, loʼe ndaya mangantoʼo,

⁵ “Ndikamaʼimo mangkoni pangkoniku pai mampeinu anggoro anu roo kupatoka.

⁶ Palaika katengo da naka madago katuwumu. Lulumo jaya ntau loʼe.”

⁷ Tau anu bareʼe napokono ndapaguru nutujuka kasalanya, siko da napopogeleka. Ane tau majaʼa nupokarau, siko da napepepara.

⁸ Neʼe nuposari tau anu bareʼe napokono nupaguru maka da napobanciika siko. Paikanya ane tau anu loʼe nutujuka kasalanya, da natubunaka siko.

⁹ Ane tau anu loʼe nupatujuki, siʼa da teranganimo kaloʼenya. Pai ane tau anu mepoʼinaya ri Pue Ala nupaguru, da teranganimo pangaincaninya.

¹⁰ Da naka mewali tau loʼe, riu-riunya tau setu da lau petubunakanya pai pampokaeka i Pue. Ane nuincani Anu Magali siko da mangarata parata ndaya.

¹¹ Kaloʼe ndaya inceʼe da mawaika siko karate ntinuwu.

¹² Ane nupotumpu kaloʼe, siko ngkaliomu da morasi. Paikanya ane bareʼe nupokono kaloʼe, siko ngkaliomu seʼe anu napakarugi.

¹³ Katengo inceʼe da ewa weʼa anu sondo engko, bereʼe pangaincaninya pai bareʼe naincani maea mata.

¹⁴ Kareʼenya da ri wombo banuanya bara ri baa-baa ngkota.

¹⁵ Ungka njairia da napampeboo tau anu moliu. Tau anu mayoa rayanya da nakanarasi, natoʼo,

¹⁶ “Ndipebia ireʼi, komi anu bareʼepa gana pangaincanimi!” Pai ri waʼa ntau tengo da natoʼoka,

¹⁷ “Ue anu ndapelima momi nyaminya, pai mangkoni ndapesambunika meruu ngkawonginya.”

¹⁸ Waʼa ntau anu mewali sinokonya setu bareʼe naincani kapura-puranya tau anu njoʼu madadu siʼa, paka mate njairia; pai tau anu mesuamo ri banuanya, wawaseʼi reʼemo ri kareʼe ntau mate.