PATADA 8 - Sura Magali Nuntu Ngkatuwu

Paboo oni nganga ngkaloʼe ndaya 8:1-36

¹ Pedongeka! Kaloʼe meboo-boo, loʼe ndaya mampepapadongeka oni nganganya.

² Mekakore siʼa ri waʼa mpongku ntana ri wiwi njaya pai ri waʼa porampu njaya.

³ Ri baa-baa ri jaya da pesua ri kota, njairiamo da ndapadonge oni nganganya.

⁴ “Ee waʼa ntolino, ri komi kupampebooka; pura-pura anu moʼinosa ri lino ndipedongeka patiendoku.

⁵ Komi anu bareʼe gana pangaincanimi, ndipegurumo da naka loʼe monawa-nawa; komi anu tengo, ndipegurumo da ndiparata ndaya.

⁶ Ndipedongeka waʼa mpauku, maka pura-pura monco pai moyowe.

⁷ Anu kutoʼo seʼi, monco pura-pura, maka yaku mampobanciika lopu.

⁸ Waʼa mpauku mayoa pura-pura, bereʼe anu teliko-liko bara sala.

⁹ Ri tau anu loʼe waʼa mpauku monco, ri tau anu mayombu rayanya waʼa mpauku singkono.

¹⁰ Patujuku meruu ri oli ncalaka anu malino, pangaincani meruu ri oli mbuyawa malino.

¹¹ Yakumo kaloʼe; maruu olinya painaka paramata, bareʼe ndipasiwiaka pai pura-pura anu nupodaraya.

¹² Yakumo kaloʼe; ri yaku kareʼe mparata ndaya, kaloʼe ndaya pai pangaincani.

¹³ Mantubunaka i Pue posokinya mampobanciika anu jaʼa; bareʼe kupokono pobangke-bangke pai pekiunde. Kupobanciika poʼengko anu majaʼa pai waʼa mpau anu monggoli-nggoli.

¹⁴ Yaku anu mawai parata ndaya. Pai yaku seʼe anu mawianaka. Yaku loʼe pai maroso woʼu.

¹⁵ Waʼa mokole kupelae mampapelinja songka, waʼa ntau makuasa kutulungi mampepakoreka yoa.

¹⁶ Ua kadagoku, waʼa ntau bangke pai waʼa ngkabosenya moncongka mampapelinja kayoa.

¹⁷ Yaku mampotowe tau seʼe anu mampokono yaku; anu mampepali yaku, da mangarata yaku.

¹⁸ Ri yaku toka kakoreʼe, ewanceʼe seʼe katetubunaka pai kagana-gana.

¹⁹ Anu da nurata ungka ri yaku meruu ungka ri oli mbuyawa anu malino; meruu ngkasuli pai salaka anu malino.

²⁰ Yaku mangadika jaya anu mayoa, yaku melinja malulu jaya kayoa ndaya.

²¹ Tau anu mampotowe yaku, da kupapewali koreʼe, banuanya da kubuketika aga-aga.

²² Yaku ndapapewali i mPue ewa anu kaʼisa, yakumo anu uyu mbua ungka ipiamo.

²³ Yaku anu ndapareʼe ungka tepuʼu lino, ungka ri tepuʼunya, ri kabareʼepanya ndapapewali lino.

²⁴ Yaku ndapoanamo ri kabareʼepanya reʼe tasi bangke, ri kabareʼepanya reʼe mata ue.

²⁵ Yaku ndapoana ri kabareʼepanya tepatunda waʼa buyu, ri kabareʼepanya mekakore waʼa pongku ntana,

²⁶ ri kabareʼepanya ndapapewali i mPue lino pai waʼa mpada, sako tana salemo bareʼepa ndapapewali.

²⁷ Kukita ndapantale yangi, pai gawu ndabini ri wawo ntasi,

²⁸ Sindara mpadika i mPue limu ri tongo ndaoa, pai maloka waʼa mata ue ri tasi,

²⁹ sindara ndapasongka ue ntasi da naka neʼe maliunaka ungkanya. Yaku seʼe woʼu njau njairia ri tempo mpadika potunda lino.

³⁰ Yaku njau ri soria ewa ana anu ndapomawo, sandeme-sandeme yakumo anu ndapokawongko; bareʼe bali-bali polega-legaku ri suaraa.

³¹ Mawongko rayaku maroo-roo ri linoa pai lindo rayaku maroo-roo ri oyo ntolino.

³² Inceʼe painaka ndipedongeka yaku ee waʼa ntau mangura! Lulumo totorakaku, da naka lindo rayamu.

³³ Da nusabemo parada pai da nupewalimo tau anu loʼe, neʼe kojo boi nupesaru-saru inceʼe.

³⁴ Morasimo tau anu mampedongeka yaku, anu sandeme-sandeme njau mopea ri wombo banuaku, pai njau mojaga ri baa-baa ngkota peariku.

³⁵ Isema anu marata yaku, da mangarata katuwu, siʼa da ndapokono i mPue.

³⁶ Isema anu bareʼe marata yaku, mampakarugi koronya ngkalionya; tau anu mampobanciika yaku, siʼa mampotowe kapate.”