PATADA 7 - Sura Magali Nuntu Ngkatuwu

¹ Endomo waʼa mpauku, anaku, pai neʼe nukalingani nunjaa anu kusongkaka siko.

² Lulumo waʼa mpatujuku da naka dago ngkatuwumu. Lulumo mpodago waʼa pompaguru da ewa nupajagai ogu matamu ngkaliomu.

³ Endomo mpaliu waʼa pompaguruku setu, pai da nudika ri rayamu.

⁴ Da nurekemo kaloʼe ndaya setu da ewa kasangkompomu pai pangaincanimu da ewa balemu maramu.

⁵ Kaloeʼe ndaya inceʼe da mampakalawa siko ungka ri weʼa wongo, ungka ri weʼa anu loʼe mangkelo tuama pai waʼa mpau anu momi.

Weʼa wongo 7:6-27

⁶ Ri anu sandeme yaku metango ungka ri tuke banuaku.

⁷ Nepa kukita waʼa ntuama anu ntongo mangurapa; paikanya anu kukomatasi inceʼe sambaʼa tau tengo ri oyo ntau seʼe.

^8-9 Ri ngkinowia montepuʼumo da tekarupu, ngalitau setu melinja-linja mosu ri posiku njaya anu da njoʼu ri banua mbeʼa sambaʼa.

^10-12 Weʼa setu inceʼemo weʼa anu berodo ri banuanya. Sakodi-sakodi njoʼu siʼa ri wiwi njaya, nepa ri tana lapa, bara mekakore tomunda ri porampu njaya. Tau setu makoje pai bareʼe maea matanya. Kukita siʼa mesuwu mampake rengko ewa weʼa wongo, mampomberataka ngalitau setu, tangara ndayanya majaʼa.

¹³ Nasokowaka ngalitau seʼe nepa naeki. Bereʼe ea matanya natoʼoka siʼa,

¹⁴ “Sandeme seʼi yaku da mabayari janjiku, inceʼe painaka yaku mampanyombaka panyomba.

¹⁵ Inceʼe painaka kumesuwu mampepali siko, da naka siko maʼi mangkoni ri banuaku. Pai seʼi kupomberatakamo siko!

¹⁶ Langka ngkayoreku roomo kukaʼuwika superei anu madolidi ungka ri tana Masiri,

¹⁷ pai roomo kuwebuka lana wongi, cendana pai kayu manisi.

¹⁸ Mewali maʼimo taperou pai tamampakaʼosa rayata sambengi seʼi.

¹⁹ Langkaiku bereʼe ri banua, siʼa ntongo mpowelua ri tana ntau lawa.

²⁰ Maria doi nakeni pai bareʼepa da mewalili ri raya anu radua minggu seʼi.”

²¹ Ewanceʼemo napangkanarasi mbeʼa setu ngalitau setu rantani naluluka pepokononya.

²² Bareʼe marate napanawa-nawa nalulumo weʼa setu ewa japi anu ndanoʼo da njoʼu ri tampa mponyampa pai ewa tau anu da ndatarunggu da ndakeni ri tarunggu anu ndapatoka tila ntau tengo;

²³ sakodipa mata mpana da mamposuki sulenya. Ewa tonci anu moyoko njoʼu ri tolia, ewanceʼemo ngalitau setu bareʼe narata ndaya inosanya da marugimo.

²⁴ Inceʼe painaka ee waʼa anake, ndipedongeka pauku. Parindaya waʼa mpatujuku.

²⁵ Neʼe ndipapaliuka weʼa anu ewanceʼe mangkanarasi siko; neʼe nululu siʼa,

²⁶ maka siʼa mageromo katuwu ntuama anu sondo.bareʼemi teimba kasondonya, anu magero ua siʼa.

²⁷ Ane njoʼu ri banuanya, posokinya mantimamo jaya njoʼu ri kapate.