PATADA 6 - Sura Magali Nuntu Ngkatuwu

Waʼa mpatada anu ntaninya 6:1-19

¹ Ee anaku, boi tau anu nupojanjika da mangkoyo indanya.

² Boi natoliamo waʼa mpaumu ngkaliomu siko pai naka manawu ri janjimu ngkaliomu.

³ Ane monco ewanceʼe anaku, kamonconya siko nakuasaimo ntau setu. Paikanya ewaseʼi jaya da kalapamu: ronga njoʼu dadu tau setu; da nupari-pari kamperapi ri tau setu da naka nalapasaka siko.

⁴ Neʼe njoʼu yore riunya, neʼepa meosa.

⁵ Lapasaka koromu ungka ri patambo setu, da ewa tonci bara lagiwa anu malapasaka koronya ungka ri topangela.

⁶ Tau anu malose sangaya-ngaya da napeole pai da meguru ri katuwu onti.

⁷ Onti bereʼe tadulakonya, bereʼe anu mancongka pai majagai,

⁸ paikanya sangkasae tempo mpomota tau seʼe mampasambaka pangkoni anu da nakoni ri tempo ngkaoro.

⁹ Ara masaepa da kayore ntau malose setu? Impia nepa da membangu?

¹⁰ Siʼa da motunda-tunda mancoko-ncoko koro mododongoro, maka natoʼo, “Oo da kuyore woʼu sambinoro, yuru mataku.”

¹¹ Paikanya ri sindara ngkayorenya setu siʼa napere ngkakura pai kakaasi-asi anu rata ewa topojampa mangkeni penai.

¹² Tau majaʼa pai baleparu mamponteesika mbamba ri mbeʼi-mbeʼi.

¹³ Nakindebaka kirenya mewali petondoni da napawianaka lopu.

¹⁴ Nawa-nawanya anu majaʼa buke pai tinako ndaya jaʼa anu mampapebete popaiso ri mbeʼi-mbeʼi.

¹⁵ Pura-pura setu da mampareʼe karugi anu mampere koronya ri kabareʼenya nasoro-soro, painaka siʼa malesa mpaliu.

^16-19 Reʼe papitu ngaya anu ndapobanciika i mPue pai bareʼe da ndapapaliuka: Poʼengko anu makiunde, nguju anu kalopu-lopu, pale anu mampepate tau anu bemasala, nawa-nawa anu marencana anu majaʼa, witi anu ganggara malai mowia jaʼa, sabi anu kambamba-mbamba pai tau anu mampapebete popaiso ri oyo ngkasiyununya.

Patiendo kono posalara 6:20–7:5

²⁰ Anaku, wianakamo nunjaa anu nasongkaka siko mpapamu, pai neʼe nukalingani waʼa mpatuju inemu.

²¹ Neʼe nukalingani waʼa mpau ntau seʼe, da nuparindaya pura-pura.

²² Waʼa pompaguru ntau seʼe da mamponinika siko ri raya mpelinjamu, inceʼe da majagai siko ri wengi pai da mantotoraka siko ane membangumo.

²³ Waʼa mpatada ntau tuʼamu da ewa silo anu merara; peseko ntau seʼe da mantujuka siko jaya ngkatuwu anu monco.

²⁴ Ane ewanceʼe siko da tetawanaka ungka ri waʼa mbeʼa wongo, pai ungka ri pekanarasi rongo ntau ntaninya.

²⁵ Neʼe boi lalio rayamu ua kadolidi ntau seʼe, neʼe boi tenoʼo rayamu mangkita napampobuyuruka matanya ri siko.

²⁶ Weʼa wongo olinya podo ewa oli ngkinaʼa santabo, paikanya mosalara pai rongo ntau ntaninya inceʼe inosa bayarinya.

²⁷ Ara nakoto ntau masoko apu pai bareʼe da wara bajunya?

²⁸ Ara nakoto ntau mayojosi waa apu pai bareʼe da maloncu witinya?

²⁹ Inceʼe siwia pai mampowongo-wongoka rongo ntau ntaninya. Isema anu mawianaka inceʼe bareʼe da lapa ungka ri popahuku.

³⁰ Ane tau mampelima pangkoni, mau ua kamaoronya, siʼa da ndapetikodi.

³¹ Pai ane ndasoko siʼa sangaya-ngaya da nabayari pitu ngkani karia olinya; mamponcuruka inceʼe da pura aga-aganya.

³² Paikanya ewambeʼi pai tuama anu mosalara? Siʼa majaʼati koronya ngkalionya! Maʼai kojo katengonya!

³³ Siʼa da ndajeani pai ndapasinggiri. Toʼonya da majaʼamo rantani masae-sae.

³⁴ Maka ua powianya setu, langkai mbeʼa setu da tumopo, painaka da mesongke kajaʼa ndayanya. Pai ane natima wela mpesawa manoto bareʼe da reʼe purundayanya.

³⁵ Bareʼe napokono da ndakanarasika doi; mau bara nunjaa ndawaika bareʼe da manturu karau ndayanya.