PATADA 4 - Sura Magali Nuntu Ngkatuwu

Rasi anu ndarata ungka ri kaloʼe ndaya 4:1-27

¹ Ee waʼa ana ndipedongeka patuju waʼa mpapami! Parindaya incetu, siko da mewali tau anu loʼe.

² Anu kupaguruka siko seʼi madago, inceʼe painaka neʼe nupesaru-saru.

³ Ri ntongo kodi-kodipa yaku, yaku podo ngkalioku ana mpapaku pai ineku,

⁴ yaku ndapaguru mpapaku, ndatoʼo, “Neʼe nukalingani waʼa mpatujuku, neʼe kojo boi nukalingani. Wianakamo waʼa ntotoraka da naka dago katuwumu.

⁵ Pewalimo tau loʼe pai pakaila nawa-nawamu! Da nuendo-endo waʼa mpatujuku pai neʼe nunawu ri tana.”

⁶ Da nutubunaka loʼe ndaya, maka inceʼe anu mantatondoi siko; da nupomawo maka inceʼe da majagai siko naka uono mpaliu.

⁷ Anu kaʼisa anu sangaya-ngaya da nuwianaka inceʼemo: mompari-mpari da mewali tau anu loʼe. Maria ngaya anu nupodaraya, paikanya anu da nupariwawo inceʼemo da nuparata kanoto ndaya.

⁸ Loʼe ndaya inceʼe anu da nupariwawo da naka tetanderaka siko. Da nukekeni maroso, maka inceʼe anu mampakatetubunaka siko.

⁹ Siʼa anu da mawaika siko sese anu meawa mewali makotamu.

¹⁰ Pedongeka pauku anaku! Parindaya mpodago waʼa mpatujuku, da naka marate tinuwumu.

¹¹ Roomo kupaguruka siko loʼe anu mantujuka siko jaya ngkatuwu anu monco.

¹² Ane ewanceʼe katuwumu, bareʼe da reʼe salemporinya ri pelinjamu, pai bareʼe da torarambe mau sindara mpolonco.

¹³ Endo-endo mpaliu pegurumu anu roo nutarima ungka ri yaku. Porewu mpodago inceʼe, maka ungka njairia da nuparata katuwu.

¹⁴ Neʼe nululu engko ngkatuwu ntau majaʼa, pai neʼe nusue powia ntau seʼe.

¹⁵ Neʼe boi nuposaleka tau seʼe. Tilawangi tau seʼe pai pelinja mpaliu siko!

¹⁶ Tau anu majaʼa bareʼe da naleʼo yore ane bareʼepa napowia anu majaʼa. Tau seʼe bareʼe da yuru matanya ane bareʼepa napakarugi tau ntaninya.

¹⁷ Kajaʼa pai kamasii ewa pangkoni anu mawongi ri tau seʼe.

^18-19 Jaya ntau anu majaʼa wani ewa kamaeta mbengi. Tau seʼe da torarambe pai da tedungka bareʼe nasoro-soro. Paikanya jaya anu napoliu ntau madago da ewa pebete ndeme; kakomasae-sae kakomareme-reme, rantani yosamo mpodago.

²⁰ Pedongeka waʼa mpauku, anaku! Pedongeka waʼa mpatujuku.

²¹ Neʼe boi nunawu ri tana paikanya parindaya.

²² Tau anu marata ndaya da tuwu pai da madonde rayanya.

²³ Jagai mpodago rayamu, maka rayamu inceʼe anu mampakanoto jaya ngkatuwumu.

²⁴ Neʼe kojo boi nupasowa waʼa mpau anu bareʼe monco. Tilawangi waʼa mpau mbamba pai waʼa mpau anu mantinakondaya da karugi yunu.

²⁵ Da tongawa ri liomu ewambeʼi kayoa ndayamu; neʼe nupowia engko ntopokira-kira.

²⁶ Nawa-nawa mpodago nunjaa anu da nupowia, da naka reʼe powuanya waʼa anu nupotetalaka.

²⁷ Tilawangi anu majaʼa, katuwumo ri kayoa ndaya. Neʼe boi mebia ungka ri jaya anu monco.