PATADA 3 - Sura Magali Nuntu Ngkatuwu

Patada tila ntau mangura 3:1-35

¹ Neʼe kojo boi nukalingani nunjaa anu roomo kupaguruka siko anaku. Da nuendo-endo kojo songkaku,

² da naka marate tinuwumu pai da uono katuwumu.

³ Mbolimo siko da todo ri peaya ndaya ri Pue Ala pai ri kasitaumu. Inceʼe da nuendo-endo pai da nuparindaya kojo,

⁴ da naka ndapokawongko, ndaunde i mPue Ala pai tolino siko.

⁵ Peayamo ri Pue ri kaliogu ndayamu, pai neʼe mampobangke-bangkeka parata ndayamu ngkaliomu.

⁶ Da nutanjemo i Pue ri mpengaya-ngaya anu nuwianaka, da naka Sira mantujuka siko jaya ngkatuwu anu madago.

⁷ Neʼe meruu nupampekiundeka kaloʼemu; pepoʼinayamo ri Pue pai tilawangimo anu majaʼa.

⁸ Powiamu anu ewanceʼe da mewali pakuli ri siko anu da mampakaʼosa juʼa ngkoromu pai da mampakadonge rayamu.

⁹ Tubunakamo i Pue ri pampanyombakamu ri Sira nunjaa anu ri wawo ngkadago ungka ri waʼa aga-aga anu nupotumpu pai ungka ri wua mpojamaamu,

¹⁰ inceʼe painaka da buke waʼa bandala gandumu, ue anggoromu da maʼai ngkarianya painaka bareʼe gana tampa da ndapadika.

¹¹ Ane ndaboembi i mPue siko, da nusabe inceʼe ewa sambaʼa patiendo, pai neʼe boi malente rayamu ua pompagurua setu.

¹² Maka i Pue maboembi tau anu ndapomawo, ewa sambaʼa papa maboembi ananya anu napokapuru.

¹³ Bangke porasi ntau anu mewali loʼe pai marata parata ndaya.

¹⁴ Porasinya seʼe meruu olinya ungka ri salaka pai wuyawa.

¹⁵ Loʼe ndaya meruu olinya ungka ri watu inta; bareʼe da siwia pai pura-pura anu nupodaraya.

¹⁶ Kaloʼe ndaya mampakarate tinuwumu, mawai kakoreʼe pai katetubunaka.

¹⁷ Kaloʼe ndaya mampakadago pai mampakaʼuono katuwumu.

¹⁸ Tau anu metingkeni maroso ri kaloʼe ndaya da mangarata katuwu anu monco pai kalindo ndaya.

¹⁹ Maka ua kaloʼe i mPue mampapewali lino; kagana ngkaloʼea Sira mangantale yangi ri kareʼenya.

²⁰ Ua pangaincania Sira mangabuntasi waʼa mata ue ri raya ntana mebete painaka moilimo uenya. Sangkani pai limu ri yangi mampatudu ue ri lino.

²¹ Inceʼe painaka, kekeni maroso kaloʼe ndaya pai ponawa-nawa anu manasa kojo ee anaku! Neʼe boi nurengkasaka,

²² ane ewanceʼe da uono katuwumu – meawa pai ndapokawongko.

²³ Pelinjamu da uono pai bareʼe da torarambe witiku.

²⁴ Bareʼe da maeka rayamu ane da yore siko pai da lintu kayoremu mposambengi.

²⁵ Neʼe nupokaeka karugi anu da merampe ncoroba ewa lompiu anu da mangarumpa waʼa ntau majaʼa.

²⁶ I Pue mangajagai siko. Bareʼe da ndapapaliuka siko da tepalambunca ri raya mpatambo.

²⁷ Ane rapanya reʼe pangkotomu da mampowia anu madago ri tau ntaninya anu merapi petulungi ri siko, neʼe boi bareʼe nupokono mampowia incetu.

²⁸ Neʼe nupokau kasiyunumu da mopea-rantani bangke reme, ane seʼi seʼe nukoto da mantulungi siʼa.

²⁹ Neʼe nunawa-nawa nunjaa anu da mampakarugi kasiyunumu anu maroo-roo mosu pai siko, pai nasarumaka kojo siko.

³⁰ Neʼe nupopaisoka tau anu bereʼe powianya majaʼa ri siko.

³¹ Neʼe boi masina rayamu ri tau anu masii, pai neʼe nusue poʼengko ntau seʼe.

³² Maka i Pue mampobanciika tau anu mowia majaʼa, paikanya Sira mampokapuru tau anu mayoa rayanya ri katuwunya.

³³ I Pue mantusaki banua ntau majaʼa paikanya mangadonco banua ntau anu mepoʼinaya ri Sira.

³⁴ I Pue mampobanciika tau anumobangke-bangke, paikanya mangadonco tau anu lauka rayanya.

³⁵ Tau anu loʼe da kakolese-lese katebambari ntoʼonya, tau anu tengo da terangani pamposari.