PATADA 20 - Sura Magali Nuntu Ngkatuwu

¹ Panginu anu mepakayangu mampapopuʼu tau baleparu pai makaliwongo. Tengo kojo tau manginu rantani mayangu.

² Karau ndaya i mokole ewa pengara ncinga, tau anu mangkelo karau ndaya i mokole inceʼe mampakarugi koronya ngkalionya.

³ Podo tau anu tengo mampokono popaiso; poʼengko anu ndaunde inceʼe mantilawangi popaiso.

⁴ Topojamaa anu malose inceʼemo anu bareʼe mampotetalaka jamaanya ri turonya; inceʼe painaka ri tempo mpomota bereʼe wua mpinamuya ri jamaanya.

⁵ Bangani ndaya ntau inceʼe ndapaporapaka ewa ue ri tibubu anu mayombu; paikanya naleʼo ntau anu loʼe mangantombu.

⁶ Maria tau anu mangaku siʼa sambaʼa bale, paikanya mapari ndapampepali bale anu todo kojo.

⁷ Morasi kojo ananggodi anu mampotumpu papa anu madago pai mayoa rayanya.

⁸ Ane mokole motunda ri gadera mpobotusi, da nakoto mangkita pura-pura anu majaʼa.

⁹ Ara da reʼe tau anu mangkoto da mantoʼo, “Yaku se|ʼi magali kojo rayaku pai yaku bereʼe salaku!”

¹⁰ Podasi pai pobanga ntau anu bareʼe mayoa inceʼe bareʼe ndapokono i mPue.

¹¹ Ungka ri powia ananggodi da ndapaincani kono kadago pai kayoa mpoʼengkonya.

¹² Talinga inceʼe ndapake da mampedongeka, pai mata inceʼe ndapake da meole, radua-duamo seʼe i Pue anu mampowia.

¹³ Tau anu bayore, inceʼe da kaasi-asi. Tau anu madoyo motetala inceʼe da mampotumpu pangkoni anu gana-gana.

¹⁴ Tau anu meoli da monggantali ua kasuli balu-balu. Paikanya ane naleʼomo maoli, da madonde rayanya maka nakotomo maoli.

¹⁵ Waʼa mpau anu mayombu posokinya, inceʼe meruu olinya painaka wuyawa pai mutiara.

¹⁶ Isema tau anu mampokono da mangangkoyo inda ntau ntaninya, sangaya-ngaya sintinaja da ndatima aga-aganya anu mewali poʼusi mpojanjinya.

¹⁷ Aga-aga anu ndarata ua kaloʼe motoro baliko, uyu-uyunya da mawongi ndaepe, paikanya ripurinya ndaepe ewa maomo rangiʼi.

¹⁸ Nunjaa anu da da ndapowia sangaya-ngaya da ndanawa-nawa mpodago da naka reʼe wuanya; inceʼe painaka neʼepa ndawianaka tetala ane bareʼepa manana ndapanganawa-nawa.

¹⁹ Tau anu mampokono mompau-mpau tau ntaninya bareʼe da mamnimpu madika rahasia; neʼe mogalo-galo pai tau anu maria gaga paunya.

²⁰ Tau anu mampepepara tau tuʼanya da puloru ri katuwunya, da ewa silo anu mate ri tongo mbani.

²¹ Aga-aga anu saru-saru ndaparata, ripurinya da tongawa banya sambaʼa porasi.

²² Neʼe boi manciliki jaʼa pai jaʼa; da ndatambusaka ri Pue, maka Sira anu da mampelae.

²³ Pontimba pai watu dasi anu bareʼe monco, bareʼe ndapokono i mPue.

²⁴ I Pue roomo mampakanoto jaya ngkatuwu ntolino ri wawo lino seʼi; inceʼe painaka tolino bareʼe da naincani jaya ngkatuwunya ngkalionya.

²⁵ Da nunawa-nawa mpodago ri kabareʼepanya nujanji nunjaa anu da nupanyombaka ri Pue. Maka boi nuwali sosoi ripurinya.

²⁶ Mokole anu loʼe da maincani isema tau anu majaʼa; siʼa da mangahuku tau setu bareʼe da napepurungi.

²⁷ Paepe ndaya ntolino da ewa reme ungka ri Pue, anu manciloni juku-juku ponawa-nawa.

²⁸ Ane i mokole moparenta ri towe ndaya, ri kayoa ndaya pai ri kayoa, bareʼe da bali kuasanya.

²⁹ Tau mangura ndaunde ua karosonya, pai tau tuʼa ndatubunaka ua uwanya.

³⁰ Reʼe teasantongo pangaepe pari mampapurasi kajaʼa, pai mampakagali raya ntolino.