PATADA 2 - Sura Magali Nuntu Ngkatuwu

Yowenya ane mampotumpu kaloʼe ndaya 2:1-22

¹ Sabemo waʼa pompaguruku, anaku, pai neʼe nukalingani waʼa mpatadaku ri siko.

² Pedongeka nunjaa uneki loʼe ndaya paipari-pari da nuparata ndaya.

³ Monco anaku, pompari-mpari da naka mataja ponawa-nawamu pai perapimo parata ndaya.

⁴ Pepalimo inceʼe daʼewa nupampepali wuyawa, dudukimo inceʼe daʼewa marawo aga-aga anu tesambuni.

⁵ Ane ewanceʼe, nepa da nuincani nunjaa posokinya mampokaeka i Pue, pai nepa da nurata pangaincani kono Pue Ala.

⁶ I Pue anu mangawai kaloʼe ndaya; ungka ri Sira parata ntau pangaincani loʼe pai parata ndaya.

⁷ Ri tau anu mayoa raya pai bereʼe posarinya, ndawaika siʼa petulungi pai petatondo.

⁸ I Pue mangkariani waʼa ntau anu mayoa powianya pai majagai tau seʼe anu mampomawo Sira.

⁹ Ane nupokono malulu yaku, anaku, da nuincani nunjaa anu mayoa anu monco pai madago. Pai da nuincani woʼu ewambeʼi da katuwumu.

¹⁰ Siko da mewali tau anu loʼe pai pangaincanimu setu da mampakawongko rayamu.

¹¹ Parata ndayamu pai kaloʼe mponawa-nawamu inceʼe da mantatondoi siko,

¹² pai da mantaʼamaka siko malulu engko ngkatuwu anu bareʼe madago, pai da mantilawangi waʼa ntau anu mompau kagota-gota.

¹³ Tau seʼe bareʼe napokono malulu engko ngkatuwu anu madago, tau seʼe da malulu jaya anu wani buke pai salaa.

¹⁴ Tau seʼe da mampokawongko waʼa mpowia anu majaʼa.

¹⁵ Tau seʼe toponggoli-nggoli pai tuwu ri peliko-liko.

¹⁶ Siko, anaku, da nukoto bareʼe mancabeka pekanarasi mbeʼa anu wongo anu da mangkelo siko pai waʼa mpau anu momi.

¹⁷ Weʼa setu bareʼe todo ri langkainya pai mangkalinganimo janjinya ri Pue Ala.

¹⁸ Ane njoʼu siko ri banuanya, kamonconya siko tepatotokamo ri kareʼe ngkapate. Njoʼu njairia siwiamo pai njoʼu ri kareʼe ntau mate.

¹⁹ Tau anu madadu siʼa, bemo reʼe anu mewalili ri jaya anu da njoʼu ri katuwu.

²⁰ Inceʼe puʼunya anaku, lulumo pandiri ngkatuwu ntau madago, pai katuwumo silulu pai pepokono i mPue Ala.

²¹ Maka tau anu tuwu silulu pai pepokono i mPue Ala inceʼemo tau anu mayoa rayanya, pai tau seʼemo anu da mampeari tana anu ndajanji i mPue.

²² Paikanya tau anu majaʼa pai masalaa inceʼe da ndatendeka i mPue Ala ri sambaliku ntana setu, da ewa ewo anu ndawutusi ungka ri tana.