PATADA 19 - Sura Magali Nuntu Ngkatuwu

¹ Moruana tau kaasi-asi anu mayoa raya ri katuwunya, painaka tau tengo anu kambamba-mbamba.

² Kadoyo anu bareʼe nayunuki ngkaloʼe bareʼe madago; tau anu moncoruru da mampowia kasala.

³ Tolino mampakarugi koronya ngkalionya ua katengonya; ri purinya nepa i Pue anu napetisala.

⁴ Tau koreʼe da kakoteranga-rangani yununya; tau kaasi-asi da napalaika yununya.

⁵ Tau anu mombamba ri kareʼe mpobotusi, bareʼe da lapa ungka ri popahuku.

⁶ Pura-pura tau napari-pari da mantima raya ntau bangke; pura-pura tau napokono da mobale-bale pai tau anu pande mporaya.

⁷ Tau kaasi-asi bareʼe napeole ngkasangkomponya, pagonya ane jamo yununya. Mau ewambeʼi pompari-mparinya bareʼe da nakoto mantima raya ntau seʼe.

⁸ Isema anu mangampepali pangaincani mampotowe koronya; pai isema anu mamparindaya nunjaa anu napeguru, da lindo rayanya.

⁹ Tau anu mombamba ri kareʼe mpobotusi, manoto da ndahuku pai da ndagero.

¹⁰ Bareʼe sintinaja tau tengo da gana-gana katuwunya; pai bareʼe woʼu singkana watua da mancongka tau makuasa.

¹¹ Tau anu loʼe nakoto maomo kasengke ndayanya, siʼa ndaunde maka bareʼe napepalisi salaa ntau ri siʼa.

¹² Karau ndaya mokole ewa pangara ncinga; kapande ndaya mokole ewa rini anu mayoʼosi waʼa mpinamuya.

¹³ Ana anu tengo nakoto magero papanya, rongo anu banggantali ewa polepe ue anu bareʼe oti-oti.

¹⁴ Banua pai aga-aga nakoto ntau tuʼa mampareʼeka ananya, paikanya rongo anu loʼe inceʼe pombai mpuru i mPue.

¹⁵ Molose-lose inceʼe mampakalintu kayore, pai ri purinya i malose da yoga.

¹⁶ Tau anu maepoʼinaya ri waʼa ncongka i mPue Ala da tesorepaka, tau anu mampesaru-saru da mate.

¹⁷ Mantulungi tau kaasi-asi siwiamo pai mampaponcabo i Pue; nepa i Pue anu da mangasili.

¹⁸ Patimamasi anamu ntongo madagopa ndapakoronya, maka ane bareʼe, posokinya nupapaliumo da kageronya.

¹⁹ Mbolimo da naka tau pasengke maepe ngkalionya silinya. Ane nupelae siʼa, siko podo marangani kajaʼa ndayanya.

²⁰ Ane nupodaraya meguru pai da mampedongeka patuju, ripurinya siko da mewali tau loʼe.

²¹ Tolino mampotumpu tinako ndaya anu sondo, paikanya podo anu ndapakanoto i mPue anu da mewali.

²² Anu ndapomata-mata ri sambaʼa tau inceʼemo katodo. Moruana kaasi-asi painaka kambamba-mbamba.

²³ Tubunakamo i Pue, da naka lindo ndayamu; da rodo rayamu pai lawa ungka ri karugi.

²⁴ Reʼe tau anu maʼai kojo kalosenya, sako da masumpu pangkoni ri nganganya ngkalionya malente rayanya.

²⁵ Ane tau anumekiunde ndahuku, tau anu bareʼe gana pangaincaninya marata patiendo. Ane tau anu madago engkonya ndaseko siʼa da terangani kaloʼenya.

²⁶ Ane anu majeani pai mairi tau tuʼanya, inceʼemo ana anu mepakaea pai ndaposari.

²⁷ Anaku ane bareʼemo da nupokono meguru woʼu, danukalinganimo nunjaa anu roo nupeguru.

²⁸ Mawai posabi mbamba, inceʼe mampesaru-saru padika; mampakarugi tau ntaninya napokawongko ntau majaʼa.

²⁹ Tau tengo anu mapeni raya, manoto da ndatabasi.