PATADA 18 - Sura Magali Nuntu Ngkatuwu

¹ Tau anu mantilawangi tau ntaninya inceʼe posokinya podo maendo koronya ngkalionya; pura-pura parata ndaya yunu nasapu.

² Tau anu tengo bareʼe napedongeka pontotoraka; siʼa podo da mantoʼo parata ndayanya ngkalionya.

³ Salaa pai engko jaʼa dasimpoyunu; ane ndaposarimo, manoto ndapesambunika woʼu.

⁴ Pompau ntau da mewali popuʼu loʼe, ewa kayombu ntasi, malino ewa ue anu moili.

⁵ Bareʼe madago mancambiranaka tau anu baleparu, pai majeani tau anu bareʼe masalaa.

⁶ Ane tau anu tengo moo moo mompau, siʼa mampapopuʼu popaiso pai merapi da ndatabasi.

⁷ Pompau ntau tengo da mampakagero koronya; siʼa da tesoʼo pai waʼa mpaunya ngkalionya.

⁸ Penuntuki setu mawongi ndadonge; napokono ntau mangaomo.

⁹ Tau anu bareʼe mawianaka tetalanya siwia kajaʼanya pai ani napokono monjaʼati.

¹⁰ I Pue ewa banua toaya anu maroso; ndatiria kandeku ntau anu mayoa rayanya marata kalindo ndaya.

¹¹ Paikanya nasarumaka ntau waʼa aga-aganya anu da mantatondoni siʼa da ewa bente anu maroso mantolilimi kota.

¹² Tau anu mekiunde da manawu, tau anu lauka raya da ndatubunaka.

¹³ Mancono pau ri kabareʼepanya ndapedongeka, inceʼe powia ntau anu tengo pai bareʼe naincani ada.

¹⁴ Ua pampodaraya katuwu, naʼagika ntau mangkoyo kapari; ane payamo kadaraya setu da payamo woʼu pampomata-mata.

¹⁵ Tau anu moʼengko madago bareʼe bali-bali napampomaranganga pangaincani; tau loʼe bareʼebali-bali pampodarayanya pompaguru.

¹⁶ Pombai mawete jaya pai mawawanaka tau njoʼu ri waʼa ntau bangke.

¹⁷ Tau anu mompau riunya ri suara mpobotusi ndakita ewa mayoa, paikanya njaa anu natoʼo montepuʼu ndaʼuji ane jelamo sampotadanya.

¹⁸ Pai popaʼundi, ndakoto mamparoo posisala, sako popaiso ri oyo ntau makuasa ntano ndakoto mamparoo.

¹⁹ Kasangkompo anu roo ndapakajuʼa rayanya, meruu kasusanya ndatimosuki painaka kota bente anu maroso; popaiso ewa singkuagi baa-baa ngkota anu maroso bentenya.

²⁰ Ri waʼa mpau anu ndapasowa da reʼe wuanya anu ndaepe.

²¹ Jika reʼe kuasanya da mancorepaka katuwu bara da majaʼati katuwu; tau sangaya-ngaya da mangkoyo wua mpaunya.

²² Tau anu marata rongo, marata rasi; rongo inceʼe pombai mpuru i mPue.

²³ Tau kaasi-asi merapi ri petubunaka; tau koreʼe mancono ri kakasaranya.

²⁴ Reʼe bale anu betodo, reʼe anu meruu ngkaramunya painaka kasangkompo.