PATADA 17 - Sura Magali Nuntu Ngkatuwu

¹ Moruana sangkaku kinaʼa ndakoni ri kalindo ndaya, painaka pangkoni monyami mowawo-wawo paikanya ndakoni ri popaiso.

² Watua anu loʼe da makuasa ri ana ngkoro anu podo mepakaea; pai da mangarata tila panta siwia pai kasangkompo ana ngkoro setu.

³ Wuyawa pai salaka ndapakalino pai apu, paikanya raya ntau ndaʼuji i mPue.

⁴ Tau majaʼa da mangalulu totoraka ntau majaʼa, tau kalopu-lopu napokono mampedongeka waʼa mpau mbamba.

⁵ Isema anu mampasinggiri tau anu kaasi-asi, inceʼe mampetikodi i Pue Ala anu mampapewali. Isema anu mampokawongko karugi ntau ntaninya, manoto da marata popahuku.

⁶ Anu napokawongko ntau anu matuʼamo inceʼemo ana makumpunya; anu napokawongko waʼa ana inceʼemo tau tuʼanya.

⁷ Tau anu ndatubunaka bareʼe sintinaja mampasowa waʼa mpau mbamba; tau tengo bareʼe sintinaja mampasowa waʼa mpau anu tonga.

⁸ Reʼe tau mantoʼo doi dampo nguju, inceʼe sangaya kuasa anu ndapojingki maka pai doi dampo nguju mpengaya-ngaya ndakoto mawianaka.

⁹ Ane ndapodaraya napokono ngkasitau, neʼemo ndapepalisi kasalaa anu nawianaka ntau seʼe. Majuʼisi kasala yunu podo marapasi pobale.

¹⁰ Sambaʼa peseko reʼe poyowenya ri tau anu loʼe, painaka saatu mbela inabasi ri tau anu tengo.

¹¹ Tau majaʼa napokono mampareʼe kamaʼase, paikanya kapate da rata ri siʼa ewa suro anu masii.

¹² Moruana simpadopa pai indo beruangi anu tetaji ananya, painaka pai tau tengo anu mampotumpu katengonya.

¹³ Isema anu masili kadago pai kajaʼa, bareʼe da tepalai jaʼa ungka ri banuanya.

¹⁴ Mantepuʼu popaiso siwiamo pai mangkae jaya da poili ue; inceʼe painaka panggalauramo ri kabareʼepanya montepuʼu popaiso.

¹⁵ I Pue mampobanciika tau anu mancambiranaka tau anu baleparu, pai mampakasala tau anu bareʼe masala.

¹⁶ Bereʼe yowenya tau tengo mantaji doi da mampepali loʼe, maka bareʼe lau nawa-nawanya anu madago.

¹⁷ Sambaʼa bale bareʼe da mampakarugi yunu, paikanya sambaʼa kasangkompo da naposikoyo kapari ndaya.

¹⁸ Tau anu mojanji da mposikoyo inda ngkasiyununya inceʼemo tau anu tengo.

¹⁹ Tau anu mampokono salaa, napokono popaiso. Tau anu podo bangke nganga, mampepali da kagero.

²⁰ Sambaʼa tau anu kalopu-lopu bareʼe da marata kalindo ndaya, tau anu joke jila da marata rugi.

²¹ Marata ana anu tengo posokinya marata kasusa ndaya, mewali papa ana anu tengo bareʼe mampakawongko raya.

²² Penaa ndaya mangkeni kadonde ngkoro; kasusa ndaya mampakalente wuku.

²³ Topobotusi anu modengoo da mantarima ngkaroo doi dampo nguju, pai bareʼe mayoa pobotusinya.

²⁴ Tangara ndaya ntau anu lau parata ndaya inceʼemo da mangarata loʼe, paikanya tangara ndaya ntau tengo bareʼe tumotoa.

²⁵ a anu tengo mampakapari raya mpapanya, pai mampakasusa raya inenya.

²⁶ Bareʼe sintinaja da ndagiwu tau anu bareʼe masalaa; bareʼe sintinaja ndajeani tau anu madago engkonya.

²⁷ Tau anu mataja utanya, bareʼe sondo paunya. Tau loʼe rodo rayanya.

²⁸ Sambaʼa tau anu tengo da ndasarumaka loʼe ane monjii siʼa pai nadampo ngujunya.