PATADA 13 - Sura Magali Nuntu Ngkatuwu

¹ Ana anu loʼe da napedongeka ane mepatada papanya; tau makiunde bareʼe napokono ndaseko.

² Pompau ntau anu madago da mampareʼe porasi; tau anu bareʼe mayoa rayanya napokono periso.

³ Tau anu timama ri pompaunya da maʼuono katuwunya, tau anu mompau pontopanyamo da napere ngkasusa ndaya.

⁴ I Malose maria ngaya anu napodaraya paikanya bareʼe mau sangaya anu da narata; tau anu madoyo motetala da mangarata pura-pura anu napodaraya.

⁵ Tau anu mayoa rayanya da napobanciika mbamba, poʼengko ntau majaʼa mepakaea pai ndaposari.

⁶ Kayoa ndaya inceʼe mangkantawi katuwu ntau anu mayoa raya; kajaʼa inceʼe mangagero katuwu ntau anu masalaa.

⁷ Reʼe tau anu moʼengko ewa tau anu koreʼe, ntanoka bereʼe aga-aganya; reʼe tau anu moʼengko ewa tau anu kaasi-asi ntanoka siʼa koreʼe.

⁸ Tau koreʼe sangaya-ngaya da mampapesuwu doi da naka uono katuwunya; tau kaasi-asi bereʼe anu da mampakarugi.

⁹ Tau anu mepoʼinaya ri Pue da merara makilaya; tau majaʼa da ewa silo anu pikamo.

¹⁰ Pekiunde podo da mampowuaka popaiso; tau anu loʼe napokono mancabe pompaguru.

¹¹ Kakoreʼe anu saru-saru ndaparata podo sarai woʼu da kakuranya; paikanya aga-aga anu ndapasambaka nteasakodi da kakoteranga-rangani.

¹² Ane anu ndapomata-mata bareʼe kobangani, mapari raya; ane anu ndapodaraya kobangani, mawongko raya.

¹³ Tau anu mampesaru-saru pompaguru i mPue, inceʼe mampakarugi koronya; tau anu mepoʼinaya ri padika i mPue Ala da mangarata silinya.

¹⁴ Pompaguru ntau anu loʼe ewa pebete ngkalindo ndaya; ane reʼe peekasi, pompaguru setu da mancorepaka.

¹⁵ Tau anu madago raya da ndaunde; tau anu bareʼe ndasarumaka da masusa katuwunya.

¹⁶ Tau anu loʼe da monawa-nawa riunya dikabareʼepanya mowia; tau anu tengo da mampoleleka katengonya.

¹⁷ Pomokau anu bareʼe loʼe podo da mampareʼe rugi; pomokau anu ndasarumaka mampakanoto da kareʼe mposilinya.

¹⁸ Tau anu bareʼe napokono ndapaguru da mewali kodi pai kaasi-asi; tau anu mangkomatasi patuju da ndatubunaka.

¹⁹ Ara meawasa ane ndarata nunjaa anu ndapodaraya! Tau anu tengo bareʼe napokono mampalaika jaʼa.

²⁰ Tau anu mogalo-galo pai tau anu loʼe, da mewali loʼe; tau anu mogalo-galo pai tau tengo da marugi.

²¹ Tau anu masala da nalulu-lulu mpaliu ngkarugi, tau anu madago bareʼe bali-bali kalindo ndayanya.

²² Tau madago da mampantaika ananya pai makumpunya kakoreʼe; kakoreʼe ntau masalaa inceʼe da ndadika tila ntau anu mayoa katuwunya.

²³ Tana anu soa da mampareʼe pangkoni tila ntau kaasi-asi; paikanya ua potengkobatu painaka tana setu bareʼe ndapotetalaka.

²⁴ Ane ana bareʼe ndatabasi posokinya bareʼe ndapomawo siʼa; ane ndapomawo, sangaya-ngaya makoje woʼu mantabasi siʼa.

²⁵ Tau anu madago sangaya-ngaya da gana mpaliu anu da nakatuwuka, paikanya tau majaʼa da makura mpaliu katuwunya.