PATADA 10 - Sura Magali Nuntu Ngkatuwu

Waʼa mpatada i Salomo 10:1–22:16

¹ Seʼimo waʼa mpatada i Salomo: Ana anu loʼe inceʼe mampakawongko raya mpapanya; paikanya ana anu mampakasusa raya inenya.

² Kaloʼe anu ndarata ri jaya anu bareʼe mayoa, inceʼe bareʼe da mepaporasi; paikanya kayoa ndaya inceʼe da mancorepaka.

³ Bareʼe ndapapaliuka i mPue tau madoyo da mate yoga; paikanya Sira da masalempori tau majaʼa, da naka neʼe narata anu natinako ndaya.

⁴ Tau malose da mewali kaasi-asi; paikanya tau anu madoyo da mewali koreʼe.

⁵ Tau anu madoyo pai loʼe da mampasambaka pangkoni ri turo mpomota, paikanya tau anu podo yore ri tempo mpomota da mampakaea koronya ngkalionya.

⁶ Tau anu madago rayanya da mangarata popadonco. Kamasii reʼe tesambuni ri sambaliku mpau ntau majaʼa.

⁷ Paendo-endo tau anu madago powianya inceʼe sambaʼa popadonco, paikanya tau anu majaʼa powianya ganggara da ndakalingani.

⁸ Tau anu loʼe napokono mantarima patuju; pai tau anu mampau katengonya inceʼe da lingu.

⁹ Tau anu mayoa rayanya da maʼuono katuwunya; tau anu mombamba sangaya-ngaya da ndaincani.

¹⁰ Isema anu mancambunika kamonco, da mampapebete kapari; isema anu manceko tau sampotunda-tunda, inceʼe mantangara da kaʼuono ngkatuwu.

¹¹ Oni mpau ntau anu madago inceʼe mampalene raya ri katuwu, paikanya ri sambaliku mpau anu majaʼa tesambunika raya anu karika.

¹² Kasina ndaya mampapebete popaiso; kapande pai towe inceʼe bareʼe mangkitanaka kasalaa.

¹³ Tau anu mataja nawa-nawanya da mampasowa waʼa mpau anu mayombu; tau tengo sitempo ndatabasi.

¹⁴ Tau anu loʼe da mampasambaka waʼa mpangaincani; paikanya tau anu tengo mayondoni karugi.

¹⁵ Kakoreʼe inceʼe mangkantawi tau koreʼe, kakaasi-asi inceʼe anu mangagero tau anu kapuru raya.

¹⁶ Powia anu madago, silinya inceʼe dago ngkatuwu, ane mampowia salaa, wuanya inceʼe da maʼai ngkaria salaa.

¹⁷ Isema anu mampedongeka peseko da maʼuono katuwunya, isema anu bareʼe mampangakuka salaanya siʼa lau ri tongo ngkapari.

¹⁸ Tau anu mancambunika sina ndaya inceʼe tau anu kambamba-mbamba. Tau anu topenuntuki inceʼe tau tengo.

¹⁹ Kakomaria-ria pau, kakomaria-ria woʼu salaa anu ndatoʼo; tau anu loʼe mampilisi pau anu da natoʼo.

²⁰ Pompau ntau anu madago da ewa salaka anu malino, paikanya ponawa-nawa ntau majaʼa bereʼe yowenya.

²¹ Pompau ntau anu madago mewali popadonco gala ntau maria, katengo ntau anu tengo mampepate koronya ngkalionya.

²² Podo ua popadonco i mPue tau da mewali koreʼe; potetala anu manee bareʼe da nakoto marangani aga-aga.

²³ Tau anu tengo napokawongko mampowia salaa; tau anu loʼe napokono mampepali loʼe ndaya.

²⁴ Tau anu mayoa da mangarata anu napodaraya; tau anu majaʼa da mangarata anu maʼai napampokaeka.

²⁵ Ane najanjangi lompiu, mawaromo tau majaʼa; paikanya tau anu mayoa bareʼe da telengko.

²⁶ Neʼe nupokau tau anu malose, maka tau setu podo da mampakalente raya, podo ewa podi mampakangilu ngisi bara ewa rangasu mampakayaya mata.

²⁷ Tubunakamo i Pue, da naka masae katuwumu; tau anu majaʼa da mate ri kabareʼepanya rata temponya.

²⁸ Pampomata-mata ntau madago mampakalindo rayanya; pampomata-mata ntau majaʼa podo ngkabongo.

²⁹ I Pue mangkariani tau mayoa, paikanya maʼopisaka tau anu mowia majaʼa.

³⁰ Tau anu mayoa da lindo pai maʼuono katuwunya; tau anu majaʼa bareʼe da mampeari tana mpojanji.

³¹ Tau anu mayoa da mampasowa waʼa mpau anu loʼe; tau anu majaʼa da ndakamumu ngujunya.

³² Waʼa mpau ntau mayoa mampapenaa raya; paikanya waʼa mpau ntau majaʼa podo mampakajuʼa raya.