Matius 7 - Sura Magali Nuntu Ngkatuwu

Mangabotusi tau 7:1-6

¹ “Neʼe mangabotusi tau ntaninya, da naka komi ngkaliomi woʼu bareʼe ndabotusi i mPue Ala.

² Maka ewambeʼi ndipampetisala tau ntaninya, da ewanceʼe seʼe da ndapampetisala i mPue Ala komi. Maka podasi anu ndidasika tau ntaninya, inceʼe woʼu anu da ndadasika i mPue Ala komi.

³ Ara wenu sanceso kaju ri raya mata ngkasangkompomi ndikita, ntanoka saowo kaju ri raya matami ngkaliomi bareʼe ndikita?

⁴ Ewambeʼi da ndipangangkoto mantoʼoka kasangkompomi, ‘Maʼi kupayali kaju sanceso setu ungka ri matamu,’ ntanoka ri raya matami ngkaliomi njau kaju saowo bareʼe ndikita?

⁵ Ee, toponggoli-nggoli! Yalimo riunya kaju saowo ungka ri matami ngkaliomi, nepa da yosa pangkitami pai ndileʼo mangayali sanceso kaju ungka ri mata ngkasangkompomi.

⁶ Anu magali neʼe ndiwaika asu, da naka neʼe metorobaka asu najangku komi. Pai neʼe ndiwaika mbawu matia da naka neʼe podo nayojosi ngkabongo matia setu.”

Totoraka kono kapuru ndaya mPue Ala 7:7-12

⁷ “Ndiperapimo, da ndawaika komi. Ndipepalimo sangaya-ngaya da ndirata. Nditadengkosimo dampo mbombo, da ndalokaka komi.

⁸ Maka tau anu mamperapi da ndawaika; pai tau anu mampepali da mangarata, pai tau anu mantadengkosi, dampo da ndalokaka.

⁹ Ara reʼe ri oyomi, papa anu mawaika ananya watu, ane mamperapi roti?

¹⁰ Bara nawaika ule ane naperapi wayawo?

¹¹ Ane sako komi tau majaʼa, ndiincani mawaika anami anu madago. Pagonya Papami ri suruga! Sira anu meruu woʼu da ndapawai anu madago ri tau anu mamperapi.

¹² Ndipowiamo ri tau ntaninya ewa anu ndipokono da napowiaka ntau ri komi. Inceʼemo uneki mpadika i Musa pai anu napaguru waʼa nabi.”

Boboka anu kopi 7:13-14

¹³ “Ndipesuamo mampoliu boboka anu kopi, maka boboka pai jaya anu da njoʼu ri naraka bangke pai mabini, pai maria tau anu mampokono malulu.

¹⁴ Paikanya kopi-kopi boboka pai mapepu jaya anu da nalulu ntau da jela ri katuwu, pongoli tau anu da marata nceʼe!”

Puʼu ngkaju pai wuanya 7:15-20

¹⁵ “Ndipepeole mpodago waʼa nabi kambamba-mbamba. Tau seʼe da maʼi mampomberataka komi da mokira-kira ewa bimba, ntanoka raya ntau seʼe ewa sarigala anu masii.

¹⁶ Da ndipatomata powianya da ndipaincani waʼa ntau setu. Taramanu bareʼe da mampowuaka jambu, pai konau bareʼe da mampowuaka wua ngkayuku.

¹⁷ Puʼu ngkaju anu malimbokori da madago powuanya, pai puʼu ngkaju anu bareʼe malimbokori bareʼe woʼu da madago powuanya.

¹⁸ Puʼu ngkaju anu malimbokori bareʼe da mampowuaka wua anu majaʼa, pai puʼu ngkaju anu bareʼe malimbokori bareʼe woʼu da mampowuaka wua anu madago.

¹⁹ Waʼa puʼu ngkaju anu bareʼe madago powuanya, da ndatowo pai da ndapanowa.

²⁰ Ewancetumo waʼa nabi kambamba-mbamba. Ri poengkonya da ndipaincani tau seʼe.”

Peluluta ri Pue neʼe podo ri nguju 7:21-23

²¹ “Banya pura-pura tau anu mampeboo yaku, ‘Pue, Pue,’ da mesua ri poparenta ncuruga, paikanya podo waʼa ntau anu mawianaka pepokono mPapaku ri suruga.

²² Maka ri Eo Kiama, sondo tau anu da mantoʼoka yaku, ‘Pue, Pue, ara banya kami anu mampetumbu nuntu i mPue Ala mamposabi Toʼo-Mi? Ara banya kami anu marumba i majaʼa mamposabi Toʼomi, pai maria ngaya tanda ngkuasa anu katuju?’

²³ Paikanya da mesono yaku, ‘Bareʼe kuincani komi! Ndipalai ungka ireʼi, komi waʼa ntau anu majaʼa powiami!’ ”

Topombangunaka banua anu loʼe pai topombangunaka banua anu tengo 7:24-27

²⁴ “Mewali tau anu madonge pauku seʼi pai nalulu, siʼa siwiamo pai tau anu loʼe mangawangu banuanya ri wawo roka mbatu.

²⁵ Ri tempo mpouja narumpa ue mowo, bara nawui ncumbara banua setu, paikanya bareʼe madungka maka ndawangu ri roka mbatu.

²⁶ Paikanya tau anu madonge pauku seʼi pai bareʼe nalulu, siʼa siwiamo pai tau anu tengo mangawangu banuanya ri wawo ndangiʼi.

²⁷ Ri tempo mpouja narumpa ue mowo, bara nawui ncumbara banua setu painaka madungka pai malesa!”

Kuasa i Yesu 7:28-29

²⁸ Ri karoonya mompaguru i Yesu, jingki kojo raya ntau anu madonge pompaguru-A.

²⁹ Maka Sira mompaguru pai kuasa, banya ewa waʼa guru agama ntau seʼe.