Matius 3 - Sura Magali Nuntu Ngkatuwu

Tuntu i Yohane Topopariu 3:1-12

¹ Ri tempo setu montepuʼumo i Yohane Topopariu motuntu ri pada bone ri tana Yudea, natoʼoka tau,

² “Ndikajeamo ungka ri waʼa ncalaami,” nepa natoʼo woʼu, “maka bareʼemo masae i Pue Ala da moparenta ewa sambaʼa Mokole!”

³ I Yohane seʼimo anu natinako ndaya i Nabi Yesaya ri waʼa mpaunya seʼi, “Reʼe tau meboo-boo ri pada bone, ‘Ndipatokakamo i Pue jaya-A; ndipalenekamo Sira jaya-A.’ ”

⁴ Wuyu Onta inceʼe anu napopuju ngkoro i Yohane, soʼo ntongonya pela mpinatuwu, pai pangkoninya podo bombeu pai juyu uani.

⁵ Maria tau ungka ri Yerusale, ungka ri sambawo ntana Yudea pai ungka ri samalele wingke ngkoro Yarade maʼi madadu i Yohane.

⁶ Waʼa ntau setu rata mampangakuka waʼa ncalaanya, nepa nariu i Yohane waʼa ntau seʼe ri Koro Yarade.

⁷ Maria woʼu to Parisi pai to Saduki rata ri Yohane da mekiriu. Paikanya pangkitanya karata ntau seʼe, natoʼoka tau seʼe, “Komi tau majaʼa! Isema anu mantoʼo kakominya da ndikoto lapa ungka ri popahuku i mPue Ala anu darata?

⁸ Nditujumo ri powiami kakominya majeamo ungka ri waʼa ncalaami.

⁹ Neʼe ndisarumaka da ndikoto lapa ungka ri popahuku maka nditoʼo i Burahima inceʼemo ngkaimi. Da ndipaincani, ungka ri waʼa mbatu seʼi woʼu, ndakoto i mPue Ala mampapewali muli i Burahima!

¹⁰ Tokamo uase da ndatowoka kaju pai da ndarantasi ngkekale-kalenya. Pura-pura kaju anu bareʼe madago powuanya da ndatowo pai da ndatendeka ri apu.

¹¹ Yaku seʼi, ue anu kuriuka komi da mewali petondoni ngkajeami ungka ri waʼa ncalaami; paikanya Sira anu nepa da rata mantondaraka yaku, da mangariuka komi Inosa mPue Ala pai apu. Sira meruu ngkabangke ngkuasa-A pai yaku. Sako da mangkeni talupa-A yaku seʼi bareʼe sintinaja.

¹² Pale-A mantangke duku mpontapi da ndatapika gandu rantani maiti. Gandu da ndapariala paikanya pura-pura ota da ndapanowa ri apu anu bareʼe mate-mate!”

I Yesu ndariu 3:13-17

¹³ Ri tempo setu malaimo i Yesu ungka ri Galilea njoʼu ri koro Yarade. Njairia Sira madadu i Yohane merapi da ndariu.

¹⁴ Paikanya bareʼe napokono i Yohane da mariu Sira. Maka natoʼo i Yohane, “Kamonconya Komi yau anu da mariu yaku. Ewambeʼi da pewalinya ja-Komi anu maʼi mangadadu yaku.”

¹⁵ Paikanya mesono i Yesu ndatoʼo, “Bareʼe makuja, ri tempo seʼi. Maka ewanceʼemo kita da mawianaka pura-pura pepokono i mPue Ala.” Mewali nariumo kojo i Yohane i Yesu.

¹⁶ Karoonya ndariu mesore Sira; ndakitasaka teloka yangi, pai ndakita i Yesu Inosa mPue Ala menaʼu ewa petudu ntonci putiʼa ri wawo ntanoana i Yesu.

¹⁷ Nepa ndadonge oni nganga mPue Ala mantoʼo, “Seʼimo Ana-Ku anu Kupotowe, Siʼa mampakawongko raya-Ku.”