Matius 28 - Sura Magali Nuntu Ngkatuwu

Pembangu i Yesu pai pepatongawaa ri waʼa mbeʼa 28:1-10

¹ Butu liumo eo Umapo, mowuro-wuro mpodago ri eo minggu i Maria Madalena pai i Maria anu ntaninya njoʼu mampeole dayo setu.

² Tingkarasaka molindugi maʼai. Sambaʼa malaʼeka mPue Ala menaʼu ungka ri suruga, naduli watu anu ndadampoka dayo setu nepa motunda ri wawonya.

³ Lio malaʼeka setu ewa kila, pai puju ngkoronya maʼai kabuyanya.

⁴ Waʼa ncurodado anu mojaga njairia merata eka ndayanya, kandende-ndende memisa lionya ewa lio ntau mate.

⁵ Mompau malaʼeka setu ri waʼa mbeʼa setu, natoʼo, “Neʼe maeka! Kuincani komi mampepali i Yesu anu roomo ndapaku setu.

⁶ Sira bemoreʼe ireʼi. Sira membangumo ewa anu roo ndatoʼoka komi owi. Maʼi ndipeole waka mpauli Sira.

⁷ Seʼi-seʼi ndipalaimo maliga-liga, ndipetumbuka waʼa anaguru-A, ‘Sira membangumo, pai Sira njoʼumo mesindiu ri Galilea. Njairia da ndipangkita Sira!’ Endomo anu roo kutoʼoka komi.”

⁸ Maliga-liga palai waʼa mbeʼa setu mampalaika dayo, ri raya ntau seʼe eka nagalo wongkondaya, molonco-lonco tau seʼe da mampetumbuka waʼa anaguru i Yesu kono anu mewali setu.

⁹ Tingkarasaka i Yesu mampomberataka waʼa mbeʼa setu ndatoʼo, “Madago-dago!” Metimosuki tau seʼe ri Sira, nasokowaka witi-A pai manyomba ri Sira.

¹⁰ Ndatoʼo i Yesu, “Neʼe maeka. Ndiakomo ndipetumbuka waʼa anaguruku da naka njoʼu ntau seʼe ri Galilea; njairia da napangkita ntau seʼe Yaku.”

Pompetumbu ncurodado anu mojaga 28:11-15

¹¹ Sindara mpalai waʼa mbeʼa setu, bara tesangkuja surodado anu mojaga ri dayo setu mewalili ri kota, pai napetumbuka waʼa ntadulako ntadu mpanyomba pura-pura anu mewalimo.

¹² Mogombo waʼa ntadulako ntadu mpanyomba pai waʼa nto pombawanaka nto Yahudi, kabotu gombo ewaseʼi, waʼa ncurodado anu mojaga setu da ndawaika doi dampo nguju,

¹³ nepa ndatoʼoka, “Ewanceʼi da ndipampauka tau, watangkoro i Yesu setu napelima waʼa anagurunya mposambengi ri sindara kami tekayore.

¹⁴ Pai ane nadonge i petoro anu mewali setu, nepa kami da mangkanarasi Sira, naka neʼe napokarau komi.”

¹⁵ Natima waʼa ncurodado setu doi, pai mawianaka ewa anu roo ndatotorakaka tau seʼe. Inceʼemo puʼunya painaka laolita setu tebambari ri waʼa nto Yahudi nakarataka eo-eo seʼi.

I Yesu mepatongawa ri waʼa anagurua 28:16-20

¹⁶ Malaimo anaguru i Yesu anu sampuyu pai sambaʼa, njoʼu ri buyu ri tana Galilea silulu pai anu roo ndatoʼo i Yesu ri tau seʼe.

¹⁷ Butu nakita ntau seʼe i Yesu njairia liu-liu metutu tau seʼe manyomba ri Sira. Paikanya reʼe ri oyo ntau seʼe anu bata-bata rayanya.

¹⁸ Ndatimosuki i Yesu tau seʼe nepa ndatoʼoka, “Pura-pura kuasa anu ri suruga pai anu ri lino roomo ndawaika Yaku.

¹⁹ Inceʼe painaka ndipalaimo ri pura-pura lemba ri sambawo lino, tau seʼe da ndipapewalimo waʼa anaguru-Ku. Tau seʼe da ndiriu ri toʼo mPapa, pai i Ana pai Inosa Magali.

²⁰ Ndipatadaka tau seʼe da napaincani malulu pura-pura anu roo Kusongkaka komi. Pai da ndipaincani Yaku da sangkani-ngkani pai komi rantani rata ri kapusa lino.”