Matius 25 - Sura Magali Nuntu Ngkatuwu

Nuntu mporapa anaweʼa sampuyu 25:1-13

¹ “Ane ratamo i Ana Manusia mampatongawa Poparenta mPue Ala, katedikanakanya daʼewa nuntu mporapa seʼi: sampuyu anaweʼa njoʼu mantomu tumpu ngkoro anu da ndawawa, wungka-wungka tau seʼe mangkeni pelita.

² Alima ri oyo ntau seʼe tengo, pai alima anu ntaninya loʼe.

³ Anaweʼa alima anu tengo setu nakeni silonya paikanya bareʼe napatoka lananya.

⁴ Paikanya anaweʼa alima anu loʼe nakeni pelita pai reʼe lana napatoka.

⁵ Paikanya ua bareʼe ronga rata tumpu ngkoro tuama, mawilamo raya anaweʼa sampuyu setu mopea-pea, yurumo matanya painaka tekayore tau seʼe.

⁶ Ntongo mbengi, ndadongemo oni nganga ntau meboo-boo, ‘Tumpu ngkoro tuama jelamo! Ndikamaʼimo tapantomu!’

⁷ Kalumbangu anaweʼa sampuyu setu, mantutuni pelita ntu seʼe.

⁸ Mompau waʼa anaweʼa anu tengo setu ri anu loʼe natoʼo, ‘Ndiwaika kami lanami sakodi, maka pelita mami da matemo.’

⁹ Mesono waʼa anaweʼa anu loʼe setu, ‘Bareʼe da kawai!’ maka ane kawaika komi, pura-pura kita da natambo lana mpelita. Aginya ndikanjoʼumo ndioli galami ri goda.

¹⁰ Njoʼumo kojo waʼa anaweʼa anu tengo setu maoli lana mpelita. Sindara ngkanjoʼu ntau seʼe maoli lana, jelamo tau ndawawa. Waʼa anaweʼa alima anu tokamo setu mesuamo sangkani-ngkani pai tumpu ngkoro tuama ri kareʼe mposusa, nepa nadampo ntaliwanua wombo!

¹¹ Ungka lairia jelamo waʼa anaweʼa anu tengo ngena, meboo-boo tau seʼe natoʼo, ‘Pue, Pue! Ndilokaka kami wombo!’

¹² Paikanya mesono tumpungkoro tuama natoʼo, ‘Bareʼe kuincani komi!’ ”

¹³ Ndapapusa i Yesu nuntu mporapa setu ndatoʼo, “Inceʼe puʼunya painaka ndiponcoro-ncoro maka bareʼe ndiincani remenya pai jaanya.”

Nuntu mporapa toporioko tatogo 25:14-30

¹⁴ “Ane rata i Ana Manusia ewa Pue, katedikanakanya, daʼewa nuntu mporapa seʼi. Sambaʼa tuama da malai mowelua ri kalawanya. Napeboo waʼa ntoporiokonya, nepa napesarumakaka ri tau seʼe aga-aganya.

¹⁵ Sambaʼa-sambaʼa toporioko setu nawaika malulu pangkotonya. Sambaʼa anamayunu nawaika alima ncowu doi wuyawa, anu sambaʼa nawaika radua ncowu doi wuyawa, anu sambaʼa nawaika sancowu doi wuyawa. Roo setu nepa malai siʼa.

¹⁶ Toporioko anu mantarima alima ncowu doi wuyawa, liu-liu malai mobalu-balu, ri pobalu-balunya seʼe narata rasinya alima ncowu woʼu doi wuyawa.

¹⁷ Ewanceʼe seʼe toporioko anu mantarima radua ncowu doi wuyawa, narata rasinya radua ncowu woʼu doi wuyawa.

¹⁸ Paikanya toporioko anu mantarima sancowu doi wuyawa setu, nakae tana nepa nasambunika doi mpuenya njairia.

¹⁹ Masae kojo nepa mewalili puenya pai natepuʼumo mosireke pai waʼa toporiokonya.

²⁰ Maʼimo anamayunu anu nawaika alima ncowu doi wuyawa, natonjuka puenya sampuyu ncowu doi wuyawa, natoʼo, ‘Pue, doi ndiwaika yaku owi alima ncowu doi wuyawa. Ndipeole, kurata rasi alima ncowu woʼu.’

²¹ Mesono puenya, ‘Madago, sikomo anamayunu anu madago pai todo. Ua siko ndasarumaka mampakoroka anu sakodi, da kupesarumakaka ri siko anu maria. Pesuamo mosusa pai yaku!’

²² Maʼi woʼu toporioko anu nawaika radua ncowu doi wuyawa owi natoʼo, ‘Pue, doi anu ndiwaika yaku owi radua ncowu doi wuyawa. Ndipeole, seʼi rasinya radua ncowu woʼu.’

²³ Mesono puenya, ‘Madago, siko toporioko anu madago pai todo. Ua siko ndasarumaka mampakoroka anu sakodi, da kupesarumakaka anu maria. Pesuamo mosusa pai yaku!’

²⁴ Nepa maʼi woʼu toporioko anu nawaika sancowu doi wuyawa, natoʼo, ‘Pue, kuincani kakominya tau anu masii, komi da mampota anu bareʼe ndipomuya pai da mamparuru wua mpinamuya anu bareʼe ndisawu.

²⁵ Maeka rayaku, painaka kusambunika doimi seʼe ri raya ntana. Seʼimo muni doimi seʼe.’

²⁶ Mesono puenya, ‘Sikomo toporioko anu majaʼa pai malose! Ara nuincanimo kayakunya da mampota anu bareʼe kupomuya pai da mamparuru wua mpinamuya anu bareʼe kusawu?

²⁷ Ane ewanceʼe, ara wenu bareʼe nudika doiku ri tau anu da mampapoana doi, da naka ane jelamo yaku nepa kutima doiku sangkani pai ananya.

²⁸ Ua ewanceʼemo, tonju maʼi doiku setu da kupawaika tau anu mampotumpumo sampuyu ncowu doi wuyawa sinjau.

²⁹ Maka tau anu lawi reʼemo anunya, da ndawaika woʼu ranganinya, da naka mariamo mpodago anunya. Paikanya tau anu bereʼe anunya, sako anu reʼe yau sakodi da ndawali ntima muni.

³⁰ Ungka lairia anamayunu anu bareʼe moyowe setu, tajikamo ri kawengi-wenginya, njairia da potumanginya pai kaparinya.’ ”

Pobotusi ri Eo Kiama 25:31-46

³¹ “Ane jela i Ana Manusia ewa Mokole naaweri waʼa malaʼeka, Sira da motunda ri gadera mpoparenta anu meawa.

³² Pura-pura tau ri sambawo lino seʼi da ndapasambaka ri suara-A. Roo setu tau seʼe da ndatila radua ntila ewa pampatani ntopongkambi mbula pai bimba.

³³ Waʼa ntau anu todo mawianaka pepokono mPue Ala da ndapasambaka ri tondo mokana pai anu ntaninya ri tondo mokaii-A.

³⁴ Roo setu da ndatoʼo i Mokole ri waʼa ntau anu ri tondo mokana-A, ‘Ndikamaʼimo komi waʼa ntau anu ndadonco mPapa-Ku, ndipesuamo ri peawa anu roo ndapatokaka komi ungka ri pontepuʼu lino.

³⁵ Maka ri tempo Yaku maoro, ndipakoni Yaku, pai ri tempo Yaku maranganga ndipapanginu Yaku. Ri tempo Yaku ewa linggona ndipolinggona Yaku ri banuami.

³⁶ Yaku melambe-lambe ndiwaika Yaku rengko, Yaku majuʼa ndipakuli, Yaku ri raya ntarunggu nditulungi Yaku.’

³⁷ Da mesono waʼa ntau setu, ‘Pue, impiamo kapangkita Komi maoro pai kapakoni, bara maranganga kawaika Komi panginu?

³⁸ Impiamo kapangkita Komi ewa tau linggona, pai kasale Komi kapolinggona ri banua mami? Impia kapangkita Komi melambe-lambe kawaika Komi rengko?

³⁹ Impiamo kapangkita komi majuʼa bara ri raya ntarunggu, pai katulungi Komi?’

⁴⁰ Da mesono i Mokole setu, ‘Da nakanoto ri rayami, pura-pura anu roo ndipowia ri sambaʼa kasangkompo-Ku anu mapari katuwunya seʼi, inceʼemo powiami ri Yaku.’

⁴¹ Nepa da mompau woʼu i Mokole setu ri waʼa ntau anu ri tondo mokaii-A, ndatoʼo, ‘Ndipalaimo ungka ireʼi, komi waʼa ntau bagagu! Ndipesuamo ri raya apu anu bareʼe mate-mate, anu roo ndapatoka tila i Majaʼa pai waʼa kerubionya.

⁴² Maka ri tempo Yaku maoro, bareʼe ndipakoni, ri tempo Yaku maranganga, bareʼe ndipapanginu Yaku.

⁴³ Yaku ewa tau linggona, bareʼe ndilinga pai bareʼe ndipolinggona Yaku ri banuami. Melambe-lambe Yaku bareʼe ndiwaika yaku rengko. Yaku majuʼa pai ri raya ntarunggu bareʼe ndipakuli pai bareʼe nditulungi Yaku.’

⁴⁴ Nepa da mesono tau seʼe natoʼo, ‘Pue, impiamo kapangkita Komi maoro, bara maranganga, bara ewa tau linggona, bara melambe-lambe, bara majuʼa, bara ri raya ntarunggu, pai bareʼe katulungi Komi?’

⁴⁵ Da mesono i Mokole setu ndatoʼo, ‘Da nakanoto ri rayami ri tempo kabareʼenya ndipokono mantulungi mauja sambaʼa ri oyo ntau anu mapari katuwunya seʼi, posokinya bareʼe ndipokono mantulungi Yaku.’

⁴⁶ Waʼa ntau setu da ndahuku ri kareʼe mpopahuku anu bareʼemo da reʼe kapusanya, pai waʼa ntau anu mawianaka pepokono i mPue Ala da mangarata katuwu anu monco bareʼe – da reʼe kapusanya.”