Matius 24 - Sura Magali Nuntu Ngkatuwu

I Yesu mampau kono da kagero Banua i mPue 24:1-2

¹ Palai i Yesu ungka ri Banua i mPue, jelamo waʼa anaguru-A madadu Sira; waʼa anagurua mantujuka Sira ewambeʼi karoso pai kadolidi Banua i mPue setu.

² Mompau i Yesu ri tau seʼe ndatoʼo, “Ara ndikitamo pura-pura setu? Ndiincanimo, bareʼemo da reʼe mau saogu watu anu da mokenta pai kasiwatunya. Pura-pura setu da magero.”

Kapari pai pejeani 24:3-14

³ Ungka lairia malai i Yesu ri Buyu ngKaju Lana, pai sindara Sira motunda-tunda njairia, jelamo waʼa anaguru-A mompasimbaju pai Sira. Natoʼo ntau seʼe, “Nditoʼoka kami impiamo da pewalinya pura-pura setu. Pai nunjaa waʼa petondoninya da kamaʼimi muni pai kapusa lino.”

⁴ Mesono i Yesu ndatoʼoka tau seʼe, “Ndipakadago, neʼe boi komi ndatengosi!

⁵ Maka maria tau da jela mampake toʼo-Ku, da natoʼo, ‘Yakumo Mokole Tadungkadago!’ Maria tau da natengosi ntau seʼe.

⁶ Da ndidonge oni mpombetoto pai waʼa bambari mpoʼiwali, da mewali, paikanya incetu banya posokinya jelamo eo kiama.

⁷ Tau salemba da mampoʼiwalika tau anu salembanya, pai negara anu sambaʼa da maungku negara anu ntaninya. Ri mbeʼi-mbeʼi da mewali oro pai lindugi.

⁸ Paikanya pura-pura setu nepa pontepuʼunya kapari, ewa kapari naepe mbeʼa anu da moʼongaa.

⁹ Ri tempo setu komi da ndasoko pai ndapepombaika da ndajeani, komi da ndapepate, sambawo lino damampobanciika komi, ua kakominya anaguru-Ku.

¹⁰ Ri tempo setu maria tau anu da mampesapuka Yaku, tau seʼe da mombenawusaka pai da mombepobanciika.

¹¹ Maria nabi kambamba-mbamba da jela, pai maria tau anu da nalinguni.

¹² Da kakoteranga-rangani kajaʼanya powia ntau painaka bareʼemo da tongawa pombepotowe.

¹³ Paikanya tau anu todo rantani ri kapusanya da ndasorepaka.

¹⁴ Pai Nuntu ngKatuwu kono Poparenta i mPue Ala da ndapobambarika ri sambawo lino da naka pura-pura tau mangadonge. Roo setu nepa da kiama.”

Kajaʼa anu mampakagero 24:15-28

¹⁵ “Da ndikitasi ‘Kajaʼa anu mampakagero,’ ewa anu natoʼo i Nabi Danieli, mekakore ri kareʼe anu magali. (Komi anu mabasa da ndipepewoloka posokinya!)

¹⁶ Ri tempo setu tau anu njau ri Yudea da molonco ndeku ri buyu mongkodo.

¹⁷ Tau anu reʼe ri wawo ata banua neʼe menaʼu da mantima bara nunjaa-njaa ri raya banua.

¹⁸ Pai tau anu njau ri jamaa neʼe mewalili da mantima jubanya.

¹⁹ Maʼaisa kaparinya ri-eo-eo setu naepe mbeʼa anu manee koronya pai ine anu ntongo mampasusu ongaa!

²⁰ Ndipekakaimo da naka neʼe komi da molonco ri tempo mpouja bara ri eo Umapo.

²¹ Ri waʼa eo setu da reʼe sangaya kapari anu maʼai ewa anu bareʼepa reʼe pewalinya ungka ri pampapewali lino rantani wawaseʼi, pai bareʼemo da reʼe woʼu pewalinya.

²² Ane rapanya bareʼe ndapakaʼede i mPue Ala tempo setu; manoto bareʼe da reʼe mau sambaʼa tau anu da tesorepaka. Paikanya ua tau-A, i Pue Ala mampakaʼede tempo setu.

²³ Ri tempo setu ane reʼe tau anu mantoʼoka komi, ‘Peole, Mokole Tadungkadago reʼe ireʼi!’ Bara natoʼo, ‘Sira reʼe ri njau!’ – Neʼe boi ndiaya tau setu.

²⁴ Maka da rata waʼa ntoponcorepaka anu kambamba-mbamba pai waʼa nabi anu kambamba-mbamba. Tau seʼe da mawianaka waʼa mpowia anu ndapojingki, pai waʼa tanda ngkuasa da napetengosika, sako waʼa ntau i mPue Ala seʼe da natengosi.

²⁵ Mewali da ndisoro-soro! Roomo Kutoʼoka komi – ri kabareʼepanya mewali.

²⁶ Ane reʼe tau anu mantoʼoka komi, ‘Peole, Sira njau ri pada bone!’ Neʼe njoʼu komi njairia. Bara ane natoʼo ntau seʼe, ‘Peole, Sira njau mesambuni ri raya lincu seʼi!’ – neʼe ndiaya.

²⁷ Maka karata i Ana Manusia daʼewa pesindi ngkila ungka ri pebetea rata ri kasoyoa.

²⁸ Ri mbeʼi kareʼe anu oso njairia seʼe da kanjau ntonci topekoni anu oso.”

Karata i Ana Manusia 24:29-31

²⁹ “Bareʼe masae ungka ri kaliu tempo ngkapari setu, ogu eo bareʼemo da merara ewanceʼe seʼe wuya bareʼemo da merara. Waʼa betuʼe manawu ungka ri yangi, pai da singkapurimo waʼa ngkuasa ri tongo ndaoa.

³⁰ Roo setu da tongawamo petondoni i Ana Manusia ri yangi. Pura-pura tau ri lino da motumangi. Da nakita ntau seʼe i Ana Manusia maʼi ri wawo limu ri kakuasa pai ri peawa anu bangke.

³¹ Surupeta anu bangke da ndatawuisi, pai i Ana Manusia da mampokau waʼa malaʼeka da mampasambaka tau-A ungka ri aoponumo lino, ungka ri tando yangi rata ri tando yangi ntaninya.”

Totoraka ewa katuwu ngkaju ara 24:32-35

³² “Ndipegurumo ri katedikanaka ngkaju ara. Ane waʼa raʼanya damata pai mayuʼu, pai montepuʼu molonde, ndiincani mosumo tempo mporeme.

³³ Ewanceʼe seʼe ane ndikita pura-pura setu mewali, ndiincani mosumo mpodago temponya.

³⁴ Da ndipaincani! Bareʼepa pura mate tau anu tuwu salapi seʼi da mewalimo pura-puranya setu.

³⁵ Yangi pai lino da paya, paikanya nuntu-Ku bareʼe da paya rantani masae-sae.”

Bereʼe tau anu maincani eo pai jaanya 24:36-44

³⁶ “Bereʼe anu maincani eonya pai jaanya, waʼa malaʼeka ri suruga bareʼe naincani, Ana mPue Ala seʼe bareʼe naincani. Podo i Papa anu maincani.

³⁷ Da kajela i Ana Manusia, daʼewa pewalinya ri tempo ngkatuwu i Noho.

³⁸ Ri tempo ngkabareʼepanya nasambori ue lino seʼi, waʼa ntau mangkoni pai manginu, morongo. Ewanceʼe pewalinya rantani rata ri tempo mpeʼulaya i Noho ri duanga.

³⁹ Bareʼepa tekiwoi raya ntau, ri kabareʼepanya malodongi tau seʼe ri raya ue, ewanceʼemo da pewalinya ri karata i Ana Manusia.

⁴⁰ Ri tempo setu radua tau anu motetala ri nawu, sambaʼa da ndatima, sambaʼa da ndapalaika.

⁴¹ Radua weʼa ntongo mombaju montiwani, sambaʼa da ndatima sambaʼa da ndapalaika.

⁴² Mewali ndiponcoro-ncoromo, maka bareʼe ndiincani impia eonya da kajela mPuemi.

⁴³ Neʼe ndikalingani inceʼi! Ane rapanya naincanimo ntumpu banua tempo da kamaʼi nto pelima mposambengi, manoto siʼa bareʼe da yore, da naka to pelima bareʼe mesua ri banuanya.

⁴⁴ Inceʼe painaka komi woʼu ndipompatokamo, maka da karata i Ana Manusia ri tempo anu bareʼe ndisoro-soro.”

Anamayunu anu todo pai anu bareʼe todo 24:45-51

⁴⁵ Ndatoʼo woʼu ri Yesu, “Isema ntano toporioko anu todo pai manoto rayanya? Siʼamo anu da nadika mpuenya mewali tadulako ri waʼa yununya, siʼamo anu ndasarumaka da mampasilolongani pangkoni waʼa yununya ane jelamo temponya.

⁴⁶ Maʼai kojo porasinya toporioko setu ane ri pewalili mpuenya narata ntongo mamponggaleka tetalanya.

⁴⁷ Ndipoaya moncomo, toporioko setu da nadika mpuenya mamporewu waʼa aga-aganya.

⁴⁸ Paikanya ane toporioko setu majaʼa da natoʼo ri rayanya.

⁴⁹ ‘Ntongo masaepa nepa da mewalili i pueku,’ ungka lairia natepuʼumo mabobaki waʼa ntoporioko anu ntaninya, mopancua pai waʼa nto poyangu-yangu.

⁵⁰ Ungka lairia puenya da mewalili ri eo pai jaa anu bareʼe ndasoro-soro.

⁵¹ Manoto toporioko setu da nabobaki mpuenya, nepa ndatajika ri kareʼe waʼa nto pokira-kira. Tau seʼe da motumangi pai da maepe pari njairia.”