Matius 21 - Sura Magali Nuntu Ngkatuwu

I Yesu ndabangkei ri pesua-A ri kota Yerusale 21:1-11

¹ Mosumo kota Yerusale, jelamo tau seʼe ri lipu Bepage ri puʼu buyu ngKaju Lana. Njairia ndapokau i Yesu anaguru-A radua da mesindiu.

² Ndatoʼoka, “Ndikanjoʼumo ri lipu anu tasuara sinjau. Njairia da ndirata sambaʼa kalide ndataka pai ananya. Ndilede raduamo seʼe pai ndinoʼo rimaʼi.

³ Pai ane reʼe tau mampeoasi, nditoʼoka tau setu, ‘Da ndapake i mPue!’ Mewali bareʼemo da napetangani ntau setu ndinoʼo kalide setu.”

⁴ Pewalinya ewanceʼe kobanganimo Nuntu i mPue Ala anu nawati nabi mantoʼo,

⁵ “Toʼokamo Sioni, peole Mokolemu rata mampago siko. Sira mantuju kalauka ndaya melamba ri kalide, sambaʼa kalide anu mangurapa.”

⁶ Roo setu njoʼumo anaguru-A anu radua setu nawianaka ewa anu ndapepokauka i Yesu ritau seʼe.

⁷ Nanoʼo ntau seʼe kalide setu pai ananya nawoncu ntau seʼe jubanya nalampika wutongo ngkalide setu nepa melamba i Yesu.

⁸ Maʼai ngkasondo tau anu mantale waʼa jubanya ri jaya saʼe mantandosi waʼa raʼa ngkaju masiwu nepa natalesaka ri tongo njaya.

⁹ Santila tau sondo setu mamporiuka, pai santila woʼu anu mantondaraka, meboo-boo tau seʼe natoʼo, “Tuwu Ana i Daudi! Ndadoncomo Sira anu rata ri toʼo i mPue! Undemo i Pue Ala Anu Ndate ri Peawanya!”

¹⁰ Ungka njairia sindara mpesua Yesu ri kota Yerusale, guagamo tau sandaya ngkota setu natoʼo, “Isema tau setu?”

¹¹ Mesono tau sondo anu mampoyunuki i Yesu, natoʼo, “Siramo i Yesu nabi ungka ri Nasare ri tana Galilea.”

I Yesu mesua ri Banua i mPue 21:12-17

¹² Roo setu Mesua i Yesu ri Banua i mPue, ndairi pura-pura tau anu mobalu-balu njairia. Ndabalikoʼa waʼa meja ntopontolo doi, pai waʼa bangku ntopobalu-balu tonci tokuku.

¹³ Nepa ndatoʼoka waʼa ntau seʼe, “Lau ndaʼuki ri Sura Magali ndatoʼo i mPue Ala, ‘Banua-Ku, da ndatoʼo banua kareʼe mpekakai.’ Paikanya ndipapewali kareʼe ntopojampa!”

¹⁴ Maʼimo waʼa ntau buta pai waʼa ntau anu pungku madadu i Yesu ri Banua i mPue, pai ndapakaʼosa tau seʼe.

¹⁵ Paikanya butu nakita waʼa ntadulako ntadu mpanyomba pai waʼa guru agama powia i Yesu ewanceʼe maʼai kajaʼa ndayanya. Majaʼa woʼu raya ntau seʼe madonge waʼa ananggodi meboo-boo natoʼo, “Tuwu Ana i Daudi!” Maʼaimo kojo kajaʼa ndaya ntau seʼe.

¹⁶ Natoʼo ntau seʼe ri Yesu, “Ara ndidonge nunjaa anu natoʼo, ntau seʼe?” Mesono i Yesu ndatoʼo, “Io, Kudonge,” “Ara bareʼepa ndibasa ri Sura Magali, ewaseʼi: ‘Waʼa ananggodi pai waʼa ongaa roomo Kupaguruka pau mpeunde anu gana-gana’?”

¹⁷ Roo setu ndapalaika i Yesu tau seʼe, mesuwu Sira ungka ri raya ngkota, njoʼu ri lipu Betania, sambengi njairia.

I Yesu mantadeasi kaju ara 21:18-22

¹⁸ Bangke reme mowuro-wuro mewalili muni Sira ri kota, ri yae njaya ndaepe maoro-A.

¹⁹ Ndakita sampuʼu kaju ara ri wiwi njaya. Njoʼu ndapeole kaju ara setu ri puʼunya bara reʼe wuanya, paikanya bereʼe mau saogu, podo iranya anu marombo. Ndatoʼoka kaju ara setu, “Siko bareʼemo da reʼe powuamu!” Ri tempo setu seʼe liu malele kaju ara setu.

²⁰ Ri pangkita waʼa anaguru-A anu mewali setu jingki raya ntau seʼe napeoasi, “Ewambeʼi painaka kaju ara setu liu-liu malele pai mangau?”

²¹ Mesono i Yesu ndatoʼo, “Monco, ane ndiaya pai bareʼe bata-bata rayami, komi seʼe da ndikoto mampowia ewa anu Kupowia ri kaju ara seʼi. Pai banya podo anu ewanceʼe, da ndikoto mantoʼoka buyu sinjau, ‘Kateokotakamo pai penawumo ri tasi!’ Sangaya-ngaya da mewali.

²² Pai pura-pura anu ndiperapi ri pekakaimi sangaya-ngaya da ndirata podoia ndiaya.”

Pompeoasi kakononya kuasa i Yesu 21:23-27

²³ Ungka lairia i Yesu mewalili ri Banua i mPue, mesua Sira mompaguru njairia. Ntongo mompaguru Sira, nakohomo waʼa ntadulako ntadu mpanyomba pai ntopombawanaka nto Yahudi Sira nepa mompeoasi natoʼo, “Nunjaa Nuporoso pai Nupangkoto mampowia pura-puranya seʼi? Isema anu mawaika siko kuasa setu?”

²⁴ Mesono i Yesu ndatoʼo, “Yaku woʼu reʼe anu da Kupeoasi ri komi. Pai ane roo ndisono, nepa da Kutoʼoka komi pai kuasa incema kupampowia pura-pura seʼi.

²⁵ I Yohane mopariu pai kuasa incema? Kuasa i mPue Ala bara kuasa ntolino?” Montepuʼu napombetoʼoka waʼa ntadulako ntadu mpanyomba pai waʼa ntopombawanaka nto Yahudi, “Ane tatoʼo, ‘Pai kuasa mPue Ala,’ da natoʼoka kita, ‘Ane ewanceʼe wenu painaka bareʼe ndaya siʼa?’

²⁶ Paikanya ane tatoʼo, ‘Pai kuasa ntolino,’ maekata tau sondo, maka tau seʼe pura-pura mantoʼo i Yohane sambaʼa nabi.”

²⁷ Mewali mesono tau seʼe, “Bareʼe kaincani!” Nepa ndatoʼo i Yesu ri tau seʼe, “Ane ewanceʼe, yaku woʼu bareʼe da Kutoʼoka komi pai kuasa incema Kupawianaka pura-puranya seʼi.”

Nuntu mporapa katedikanaka ananggodi radua 21:28-32

²⁸ Ndatoʼo woʼu i Yesu, “Ewambeʼi parata ndayami kono anu da Kupau seʼi?” “Reʼe tau sambaʼa mampotumpu ana tuama radua. Tau setu njoʼu ri ananya anu tukaka natoʼoka, ‘Anaku, siko da njoʼu motetala ri bonde anggoro saeo seʼi.’

²⁹ Mesono ananya, ‘Bareʼe kupokono!’ Paikanya roo setu tebalisaka nawa-nawanya pai njoʼu ri bonde anggoro setu.

³⁰ Ungka lairia njoʼu papanya ri ananya anu karadua, pai mantoʼo pau anu siwia. Natoʼoka papanya, ‘Io papa.’ Paikanya bareʼe njoʼu siʼa.

³¹ Mewali, isema ri oyo radua ananggodi setu anu malulu songka mpapanya?” Mesono waʼa ntadulako ntadu mpanyomba pai waʼa ntadulako nto Yahudi, natoʼo, “I ana tukaka.” Ndatoʼo i Yesu ri tau seʼe, “Monco Kutoʼoka komi waʼa ntoponduru asele pai waʼa mbeʼa anu betumoro da mampesindiuka komi mewali tau i mPue Ala.

³² Maka i Yohane Topopariu jela mantujuka komi jaya ngkatuwu malulu pepokono i mPue Ala, paikanya bareʼe ndiaya pompagurunya; paikanya waʼa ntoponduru asele pai waʼa mbeʼa anu betumoro naaya siʼa. Paikanya mau ndikitamo pura-pura setu bareʼe liu-liu ndibalisaka ponawa-nawami pai bareʼe ndiaya i Pue.”

Nuntu mporapa waʼa ntopotetala ri bonde anggoro 21:33-46

³³ Ndatoʼo i Yesu, “Ndipedongeka woʼu nuntu mporapa anu sambaʼa seʼi. Reʼe tau sambaʼa mampotumpu tana, tana setu napobonde anggoro, nawaya ncape, pai nakae wayau da ndapampaa wua anggoro, nepa nawangu kandepe mpojaga. Roo setu nadika waʼa ntau anu ndasaro da mampotetalaka bonde anggoro setu, nepa malai siʼa njoʼu ri tana ntaninya.

³⁴ Butu ratamo ri tempo mpopupu wua anggoro, napokaumo waʼa anamayununya mampomberataka waʼa nto pojaga ri bonde anggoro da mantima tilanya.

³⁵ Paikanya waʼa anamayununya seʼe nasoko waʼa nto potetala ri bonde anggoro, sambaʼa nabobaki, saʼe napepate, pai anu ntaninya woʼu nawunu mbatu.

³⁶ Ungka lairia napokau woʼu ntumpu bonde setu anamayununya anu ntaninya sangkarianya woʼu pai anu napokau riunya. Paikanya tau seʼe woʼu napowia nto potetala ri bonde ewa yunu ntau seʼe anu riunya.

³⁷ Kapusanya napokau ntumpu bonde setu ri tau seʼe ananya ngkalionya. Nanawa-nawa, ‘Manoto anaku da natubunaka.’

³⁸ Paikanya butu nakita waʼa ntopotetala bonde setu ana ntumpu bonde setu, napombetoʼoka ntau seʼe, ‘Siʼamo seʼi tumpu mpanta. Iomo tapampepate, da naka kitamo mampotumpu pantanya.’

³⁹ Nasoko ntau seʼe ana ntumpu bonde setu, natajika ri sambaliku bonde, nepa napepate.”

⁴⁰ Meoasi i Yesu, “Mewali ane mewalili tumpu bonde anggoro setu, ewambeʼi da napampowia waʼa ntopotetala bonde setu?”

⁴¹ Mesono tau seʼe, “Manoto da napepate waʼa ntau majaʼa setu, pai bondenya da napesaroka ri tau ntaninya, anu da mawaika siʼa wua anggoro ane rata ri tempo mpopupu.”

⁴² Ndatoʼo i Yesu ri tau seʼe, “Ara bareʼepa ndibasa anu lau ndaʼuki ri Sura Magali? ‘Watu anu bareʼe napake waʼa mpande mewalimo watu nono ntongonya. Inceʼimo powia i mPue; ara maʼaisa peawanya!’ ”

⁴³ Mewali ndatoʼo i Yesu neʼe ndikalingani, “Pura-pura katedikanakami ewa waʼa ntau i mPue Ala, da ndatima ungka ri komi, nepa da ndawaika lemba ntaninya anu da mepoʼinaya ri waʼa ncongka i mPue Ala. [

⁴⁴ Pai tau anu manawu mampere watu setu da pinoso; pai tau anu napere mbatu setu da malesa mewali awu.]”

⁴⁵ Ri padonge waʼa ntadulako ntadu mpanyomba pai waʼa nto Parisi waʼa nuntu mporapa anu ndatoʼo i Yesu, narata ndayamo ntau seʼe, katauseʼenya anu ndatinako ndaya setu.

⁴⁶ Mewali napari-pari ntau seʼe mampepali jaya da napaleʼo mancoko Sira. Paikanya maeka raya ntau seʼe ri tau sondo, maka pantoʼo ntau sondo Sira nabi.