Matius 2 - Sura Magali Nuntu Ngkatuwu

Linggona ungka ri Pebetea 2:1-12

¹ I Yesu ndapoana ri lipu Beteleme ri tana Yudea ri sindara mPoparenta i Mokole Herode. Pai ri tempo setu seʼe reʼe bara tesangkuja tau anu loʼe mampeole betuʼe ungka ri Pebetea jela ri Yerusale.

² Napeoasi ntau seʼe, “Ri mbeʼi kareʼe ananggodi anu nepa ndapoana pai anu da mewali Mokole nto Yahudi? Kakitamo betuʼe-Nya ri Pebetea, pai kami seʼi maʼi da manyomba ri Sira.”

³ Butu nadonge i Mokole Herode pompeoasi seʼe, tesaluntengku siʼa, ewanceʼe seʼe waʼa ntau ri Yerusale.

⁴ Liu-liu napasambaka i Herode pura-pura waʼa ntadulako ntadu mpanyomba pai waʼa guru agama nto Yahudi. Katepasambaka ntau seʼe, napeoasi i Herode, “Ri mbeʼi da ndapampoana Mokole anu ndajanji i mPue Ala?”

⁵ Mesono tau seʼe, “Ri lipu Beteleme ri tana Yudea. Maka ewaseʼi anu ndaʼuki ri sura sambaʼa nabi.

⁶ ‘Siko Beteleme ri tana Yahuda, siko banya anu kodi mpodago ri oyo waʼa ngkota anu tetoʼo ri tana Yahuda. Maka ungka ri siko da mebete sambaʼa tadulako anu da mantadulakoni tau-Ku to Isaraeli.’ ”

⁷ Ri padongenya totoraka setu, napeboo ngkaroo i Herode waʼa ntau anu loʼe mampeole betuʼe anu ungka ri Pebetea setu. Napeoasi mpodago ri tau seʼe bara impia temponya pangkita ntau seʼe betuʼe setu.

⁸ Roo setu napokaumo tau seʼe da njoʼu ri lipu Beteleme, pai mepatuu siʼa natoʼo, “Ndiakomo ndipepali mpodago ananggodi setu. Pai ane ndiratamo siʼa, da ndipapaincanika yaku woʼu, maka yaku seʼe da njoʼu manyomba ri Sira.”

^9-10 Ungka lairia malaimo kojo tau seʼe. Nakita woʼu ntau seʼe betuʼe anu nakita owi ri Pebetea. Maʼai kojo kawongko ndaya ntau seʼe mangkita betuʼe setu! Betuʼe setu mamporiuka tau seʼe nepa meʼonto sintondo kalau Ananggodi setu.

¹¹ Mesua tau seʼe ri raya banua setu, pai nakita kojo Ananggodi setu pai ine-A i Maria. Mombukotu tau seʼe manyomba ri Ananggodi setu, nepa napanyombaka ntau seʼe wuyawa, dupa pai mire.

¹² I Pue Ala mampatiendo tau seʼe mampojaya pangipi, da naka neʼemo mebia ri Herode. Mewali pewalili ntau seʼe, malulu jaya anu ntaninya.

I Yesu ndakeni ri tana Masiri 2:13-15

¹³ Butu tepalaimo waʼa ntau anu loʼe mampeole betuʼe setu, mepatongawa woʼu malaʼeka i mPue ri Yusu ri raya mpangipinya, ndatoʼo, “I Herode da mampepali Ananggodi setu da napepate. Inceʼe painaka pembangumo, keni mpolonco Ananggodi setu pai ine-A njoʼu ri tana Masiri. Karoo-roomo njairia rantani reʼe muni songkaku ri siko.”

¹⁴ Ri wengi setu seʼe membangu i Yusu, nakeni mpolonco Ananggodi setu pai ine-A njoʼu ri tana Masiri.

¹⁵ Maroo-roo tau seʼe njairia rantani mate i Herode. Kobanganimo Nuntu i mPue anu naparata nabi-A mangantoʼo, “Ana-Ku da Kupeboo ungka ri tana Masiri.”

Pampepate waʼa ananggodi ri lipu Beteleme 2:16-18

¹⁶ Butu naincani i Herode siʼa nambambasimo ntau anu ungka ri Pebetea setu, maʼai kojo kajaʼa ndayanya. Painaka napoparentaka da mampepate pura-pura ananggodi tuama ungka ri tinuwu radua ntaʼu wailoʼu anu reʼe ri lipu Beteleme pai ri lipu anu samposorinya. Napasingkono pai totoraka waʼa ntau loʼe mampeole betuʼe ri tempo pangkita ntau seʼe betuʼe.

¹⁷ Ewanceʼemo pewalinya anu nawati i Nabi Yeremia, ewaseʼi natoʼo,

¹⁸ “Ri Rama reʼe ndadonge, tangi ja meʼode-ode, I Raheli motumangi, maendo ana tetaji. Bereʼe palindo ndaya, maka ana pura paya.”

Pewalili ungka ri tana Masiri 2:19-23

¹⁹ Butu matemo i Herode, sindara i Yusu ntongo ri tana Masiri, mepatongawa woʼu malaʼeka i mPue Ala ri pangipinya.

²⁰ Natoʼo malaʼeka setu, “Waʼa ntau anu da mampepate Ananggodi setu matemo. Pembangumo, poyunu muni Ananggodi setu pai ine-A, keni mpewalili tau seʼe ri tana nto Isaraeli.

²¹ Membangu i Yusu, napoyunu Ananggodi setu pai i Maria, mewalili ri tana nto Isaraeli.”

²² Paikanya nadonge i Yusu, i Arakelau ana i Herode anu moparenta ri tana Yudea masawani papanya, painaka maeka raya i Yusu njoʼu njairia. Mampojaya pangipi narata woʼu i Yusu patada ungka ri Pue, pai naka njoʼu ri tana Galilea.

²³ Kajelanya njairia, maroo-roomo siʼa ri kota anu mampotoʼo Nasare. Painaka kobanganimo wati waʼa nabi anu mantoʼo, “Sira da natoʼo ntau to Nasare.”