Matius 18 - Sura Magali Nuntu Ngkatuwu

Isema anu bangke mpodago? 18:1-5

¹ Sindara setu maʼimo waʼa anaguru-A mompeoasi ri Sira, natoʼo, “Isema anu meruu ngkabangke ri oyo waʼa ntau i mPue Ala?”

² Ndapeboo i Yesu sambaʼa ananggodi anu kodi-kodipa ndapapekakore ri suara ntau seʼe.

³ Nepa ndatoʼo i Yesu, “Da ndiayamo! Sangadi komi mewali ewa ananggodi, nepa da ndikoto mewali tau i mPue Ala.

⁴ Tau anu mampakalauka koronya ewa ananggodi, siʼamo anu bangke mpodago ri oyo waʼa ntau i mPue Ala.

⁵ Pai tau anu mancabe ananggodi anu ewanceʼi ua Yaku, posokinya mancabe Yaku.”

Waʼa anu mampapopuʼu tau mampowia salaa 18:6-9

⁶ “Bara isema anu malinguni mau podo sambaʼa tau ungka ri oyo waʼa ntau anu kodi-kodi seʼi, painaka siʼa bareʼemo meaya ri Yaku, moruana tau setu ndaloeka watu mpogili ri leʼenya nepa ndanawu ri tongo ntasi.

⁷ Ara marugisa lino seʼi ua mampapopuʼu tau manawu ri kasalaa. Maka lawi da reʼe mpaliu pelinguni anu ewanceʼe, paikanya marugimo tau anu mampapopuʼu!

⁸ Ane palemu bara witimu anu mampapopuʼu siko mowia salaa owomo pai tajikamo. Moruana siko da tuwu sangkani-ngkani pai Pue Ala mau bereʼe pale bara witi sambali painaka siko ndataji ri naraka sangkoromu.

⁹ Pai ane matamu anu mampapopuʼu siko mowia salaa, juʼimo pai tajikamo. Moruana siko da tuwu sangkani-ngkani pai Pue Ala mau bereʼe matamu sambali, painaka siko ndataji ri apu naraka mau momata mpotimali.”

Nuntu mporapa bimba anu tetaji 18:10-14

¹⁰ “Ndiendo-endoka! Neʼe kojo boi ndipetikodi mauja sambaʼa ungka ri oyo waʼa ntau anu kodi-kodi seʼi. Da ndipaincani waʼa malaʼeka ntau seʼe bareʼe tepalai ri suara mPapa-Ku ri suruga. [

¹¹ Maka i Ana Manusia maʼi da mancorepaka anu tetaji!]

¹² Ewambeʼi parata ndayami? Ane rapanya reʼe tau sambaʼa anu mampotumpu bimba saatu pai reʼe sambaʼa anu tetaji, nunjaa anu da napowia ntau setu? Manoto siʼa da mampalaika bimbanya anu siompuyu pai sasio ri wawo buyu, pai da malai siʼa mampepali anu tetaji setu.

¹³ Pai ane narata muni bimba setu – monco Kutoʼoka komi – maʼai da napampokawongko anu sambaʼa setu painaka anu siompuyu pai sasio anu bareʼe tetaji.

¹⁴ Ewanceʼe seʼe Papami ri suruga, bareʼe ndapokono da reʼe sambaʼa ungka ri oyo waʼa ntau anu nepa meaya ri Yaku seʼi anu da tetaji.”

Mampatiendo kasangkompo 18:15-17

¹⁵ “Ane kasangkompomu masalaa ri siko, sekomo siʼa neʼe naincani ntau ntaninya. Ane napedongeka pesekomu, posokinya nurata muni kasangkompomu anu tetaji.

¹⁶ Ane bareʼe napedongeka siko, salemo yunumu sambaʼa bara radua tau, maka malulu pantoʼo Ncura Magali, ‘da reʼe radua bara tatogo sabi anu mampakanoto kasala ntau sambaʼa.’

¹⁷ Pai ane bareʼe woʼu napedongeka totoraka waʼa ntau seʼe petumbumo ri dompu. Paikanya ane bareʼe napedongeka totoraka ungka ri dompu, kasangkompomu setu da nupasiwiamo pai toponduru asele pai tau anu bareʼe maincani i Pue Ala.”

Anu ndapetangani pai anu ndapomonco 18:18-20

¹⁸ “Da ndipaincani, nunjaa anu ndipetangani ri lino, inceʼe seʼe woʼu ndapetangani ri suruga. Pai nunjaa anu ndipamonco ri lino, inceʼe seʼe woʼu ndapamonco ri suruga.

¹⁹ Pai da ndipaincani woʼu: Ane reʼe ri oyomi ri lino seʼi radua tau sintuwu raya mamperapi bara nunjaa-njaa ntano, perapinya seʼe da ndabangani mPapa-Ku ri suruga.

²⁰ Maka ri mbeʼi kanjau ntau radua bara tatogo mompasambaka ua Yaku, Yaku lau sangkani-ngkani ri oyo ntau seʼe.”

Nuntu mporapa anamayunu anu bareʼe mampokapuru yununya 18:21-35

²¹ Roo setu, maʼi i Peturu ri Sira, natoʼo, “Pue, da sangkuja ngkani kupokapuru kasangkompoku anu mowia salaa ri yaku, bara pitu ngkani?”

²² Mesono i Yesu ndatoʼo, “Bareʼe, banya pitu ngkani paikanya pitu mpuyu ngkani papitu ngkani!

²³ Maka ane i Pue Ala moparenta, katedikanakanya madago ndapaporaka ewa sambaʼa Mokole anu mosireke pai waʼa anamayununya.

²⁴ Nepa ndatepuʼu mosireke, napoyunumo ntau sambaʼa anamayununya anu moinda mojuta-juta rupia kasondonya.

²⁵ Manotomo bareʼe da nakoto mabayari indanya. Inceʼe painaka ndapesongkaka i Mokole setu danaka anamayunu anu sondo indanya seʼe ndapobalu pai pura-pura aga-aganya sangkani rongo pai ananya, da naka reʼe doi ndabayarika indanya.

²⁶ Mombukotu anamayunu setu ri suara i mokole, merapi puru siʼa natoʼo, ‘Pue, ndipokapuru yaku ndiwaipa tempo ri yaku da kupangkoto mabayari indaku.’

²⁷ Merata puru ndaya i Mokole ri anamayunu setu, painaka natoʼo i mokole pura-pura indamu Kupalisimo.

²⁸ Palai anamayunu setu ungka ri suara mpuenya, momberatamo siʼa pai anamayunu anu ntaninya anu moinda ri siʼa bara tesangkuja ncowu rupia, liu-liu nakekeni rileʼenya natoʼoka, ‘bayari maliga-liga indamu ri yaku!’

²⁹ Mombukotu yununya setu ri suaranya merapi puru siʼa natoʼo, ‘Waipa tempo ri yaku da kupabayari indaku!’

³⁰ Paikanya bareʼemo nawai tempo, sawanya da napokapuru yununya seʼe, njoʼu napekitarunggu rantani tebayari indanya.

³¹ Pangkita waʼa yununya anu mewali setu, masusa raya ntau seʼe, painaka njoʼu napetumbuka i mokole.

³² Inceʼe painaka ndapeboo i mokole anamayunu anu majaʼa setu nepa ndatoʼoka siʼa, ‘Sikomo anamayunu anu majaʼa engkomu, indamu kupalisimo ua perapi purumu ri yaku.

³³ Ara banya siko woʼu da mampokapuru kasiyunumu ewa yaku mampokapurumo siko?’

³⁴ Nakeni ngkasengke ndaya i mokole, anamayunu anu majaʼa setu nawunca ri raya ntarunggu rantani pura tebayari indanya.”

³⁵ Ndapapusa i Yesu pasimbaju-A setu ndatoʼo, “Ewanceʼe seʼe Papa-Ku ri suruga da mampowia komi sambaʼa pai sambaʼa ane bareʼe mabuya rayami mampokapuru kasangkompomi.”