Matius 17 - Sura Magali Nuntu Ngkatuwu

I Yesu ndapapeawa 17:1-13

¹ Aono ndeme ungka njairia, ndapoyunu i Yesu i Peturu, i Yakobu pai kasangkomponya i Yohane, mompatani ri buyu anu ndateka.

² Nakitasaka anaguru-A tebalisakamo taʼa i Yesu, lio-A merara ewa eo, puju ngkoro-A mabuya makilaya.

³ Nakita woʼu ntau seʼe i Musa pai i Elia mompasimbaju pai Yesu.

⁴ Natoʼo i mPeturu ri Yesu, “Pue, ara maʼai ngkadagosa ane tamaroo-roomo ireʼi. Ane ndipokono Pue da kuwangunaka komi tatogo kema ireʼi: sambaʼa da galami Pue, sambaʼa da gala i Musa pai sambaʼa woʼu da gala i Elia.”

⁵ Ntongo mompau i Peturu, tingkarasaka tudumo limu makilaya mangkulamuti tau seʼe. Nadonge woʼu oni nganga ungka ri raya limu setu mantoʼo, “Seʼimo Anaku Anu Kupotowe, Siʼa anu Kupokawongko, ndipedongekamo Siʼa!”

⁶ Padonge anaguru-A oni nganga seʼe, mombukotu manyomba tau seʼe maka maʼai kaeka ndayanya.

⁷ Paikanya maʼi i Yesu madadu tau seʼe, ndajama tau seʼe ndatoʼo, “Ndipembangu, neʼe maeka!”

⁸ Butu membangu tau seʼe nakita bareʼemo reʼe tau ntaninya, jamo i Yesu ngkalio-A.

⁹ Sindara mpobalungke ntau seʼe ungka ri wawo buyu setu, ndapatiendo i Yesu tau seʼe ndatoʼo, “Neʼe boi ndipau-pauka tau wuwunya anu ndikita ngena, ri kabareʼepanya i Ana Manusia ndapapembangu ungka ri kapate.”

¹⁰ Meoasi anaguru-A ri Sira natoʼo, “Makuja pai napantoʼo waʼa guru agama i Elia da jela mamporiuka?”

¹¹ Mesono i Yesu ndatoʼo, “I Elia lawi da maʼi kojo mampatoka pura-pura.

¹² Paikanya Kutoʼoka komi, I Elia jelamo paikanya bareʼe naincani ntau seʼe kasiʼanya painaka napowia ntau seʼe siʼa gori mpepokononya. Ewanceʼe seʼe i Ana Manusia da napowia ntau seʼe gori mpepokononya.”

¹³ nepa narata ndaya waʼa anagurua anu ndatinako ndaya i Yesu inceʼemo i Yohane Topopariu.

I Yesu mampakaʼosa ananggodi anu napesuaki inosa majaʼa 17:14-21

¹⁴ Kajela muni i Yesu pai waʼa anaguru-A ri tau sondo, maʼimo sambaʼa tuama madadu Sira, mombukotu ri suara-A natoʼo,

¹⁵ “Ndipokapuru anaku tuama majuʼa mate-mate wula mapari kojo naepe. Maria ngkanimo madungka ri apu, maria ngkani woʼu madungka ri ue.

¹⁶ Roomo kukenika waʼa anaguru-Mi paikanya bareʼe nakoto ntau seʼe mampakaʼosa.”

¹⁷ Mesono i Yesu ndatoʼo, “Maʼai gagamo Komi seʼi! Komi waʼa ntau lingu pai bareʼe meaya. Sangkuja ngkasae woʼu da karoo-roo-Ku pai komi pai mantuju pande ndaya-Ku ri komi? Keni maʼi ananggodi setu!”

¹⁸ Nepa ndapokau i Yesu inosa majaʼa setu napesuwu ungka ri ananggodi setu. Mesuwu inosa majaʼa setu liu-liu osamo ananggodi setu.

¹⁹ Roo setu maʼimo anaguru-A madadu Sira, sindara tepatani tau seʼe natoʼo, “Nunjaa puʼunya painaka kami bareʼe kakoto mampapesuwu inosa majaʼa setu?”

²⁰ Ndatoʼoka tau seʼe, “Ua kakodi mpeaya ndayami.” Maka monco Kutoʼoka komi, “Ane lau peaya ndayami mauja podo ewa wuku nambo, ndikoto mantoʼoka buyu seʼi, ‘Pelimba ungka ireʼi,’ sangaya-ngaya da melimba, pai bereʼe anu bareʼe da ndikoto. [

²¹ Paikanya inosa majaʼa anu sangaya seʼi nepa da ndakoto mairi sangadi roso mpekakai pai popuasa.]”

I Yesu mampau woʼu kono kapatea 17:22-23

²² Sindara ngkaroo-roo i Yesu pai waʼa anaguru-A ri Galilea, ndatoʼo i Yesu ri tau seʼe, “Bareʼemo masae i Ana Manusia da ndapepombaika ri kuasa ntolino.

²³ Siʼa da ndapepate, paikanya ri katatogo ndemenya siʼa da membangu.” Mapari kojo raya waʼa anaguru-A.

Pabayari asele Banua i mPue 17:24-27

²⁴ Kajela i Yesu pai waʼa anaguru-A ri Kapenau, maʼimo waʼa ntoponduru asele Banua i mPue madadu i Peturu, natoʼo, “Gurumi nabayari asele Banua i mPue, bara bareʼe?”

²⁵ Mesono i Peturu, natoʼo, “Ndabayari!” Ri pewalili i mPeturu, liu-liu ndapeoasi i Yesu, ndatoʼo, “Simo, ewambeʼi parata ndayamu? Isema kamonconya anu da mabayari asele ri waʼa mokole ri lino seʼi? Bara palilinya bara tau anu mencua?”

²⁶ Mesono i Peturu, natoʼo, “Tau mencua.” Ndatoʼo i Yesu ane ewanceʼe, “palilinya bareʼe da mombayari.

²⁷ Paikanya da naka neʼe tapakakodi raya ntau seʼe, moruana njoʼumo momeka ri rano, timamo bau anu uyu mpaleʼomu. Ri raya nganganya da nurata doi anu gana da ndabayarika aseleta kita radua. Timamo doi setu bayarimo ri tau seʼe asele Banua i mPue tilata kita radua.”