Matius 14 - Sura Magali Nuntu Ngkatuwu

Kapate i Yohane Topopariu 14:1-12

¹ Sindara setu nadongemo i Herode anu moparenta ri Galilea, kono potetala i Yesu.

² Natoʼo i Herode ri waʼa mpegawainya, “Manoto siʼamo i Yohane Topopariu anu ndawali mpapembangu muni ungka ri kapate, inceʼe pai napangkoto mampowia waʼa tanda ngkuasa anu ewanceʼe.”

³ Maka roomo napokau i Herode tau mancoko i Yohane, ndarante nepa napari ntarunggu, ua poʼengko i Herodia rongo ngkasangkomponya i Pilipu.

⁴ Maka reʼe napanceko i Yohane i Herode natoʼo, bareʼe maya siʼa mamporongo rongo ngkasangkomponya.

⁵ Kamonconya daraya i Herode mampepate i Yohane paikanya maekanya ri tau sondo, maka tau sondo mantubunaka i Yohane ua siʼa sambaʼa nabi.

⁶ Paikanya ri eo ndapamposusaka eo pampoana i Herode, napokau i Herode ana i Herodia motaro ri suara waʼa ngkabosenya, mawongko raya i Herode mangkita potaronya.

⁷ Nakeni ngkawongko ndayanya najanjika ananggodi weʼa setu, nunjaa ntano anu naperapi da nawaika siʼa.

⁸ Napeboo inenya ananggodi weʼa setu napasuaka pau pai napantoʼo, “Kuperapi woʼo i Yohane Topopariu, da ndaʼulaya ri baki nepa ndiwaika yaku iseʼi seʼe!”

⁹ Madonge perapi ananggodi weʼa setu mapari raya i Herode, paikanya ua roomo najanji ri suara waʼa ngkabosenya bareʼemo maya da nasapu; napokaumo tau njoʼu mantima woʼo i Yohane.

¹⁰ Njoʼumo tau mampewoʼoki i Yohane ri raya ntarunggu.

¹¹ Woʼo i Yohane ndaʼulaya ri baki, ndatonjuka ananggodi weʼa setu, nepa njoʼu nawawaka inenya.

¹² Roo setu maʼimo waʼa anaguru i Yohane mantima wata ngkoro i Yohane napotaumate. Nepa njoʼu tau seʼe mampetumbuka i Yesu kapatemo i Yohane.

I Yesu mampakoni tau alima ncowu 14:13-21

¹³ Padonge i Yesu kapate i Yohane, malaimo Sira moduanga njoʼu ri tana soa. Paikanya butu nadonge ntau sondo palai-A seʼe, malaimo tau seʼe melinja ntana maluluwaka Sira. Napalaika ntau seʼe lipunya madadu Sira.

¹⁴ Penaʼu i Yesu ungka ri duanga, ndakita waʼa ntau sondo njaumo ri wingke mampopea Sira, mapuru raya i Yesu mangkita tau seʼe. Inceʼe painaka ndapakaʼosa pura-pura tau majuʼa ri oyo ntau seʼe.

¹⁵ Laukamo reme, maʼimo anaguru-A madadu Sira natoʼo, “Kita seʼi ri tana soa pai da mawengimo! Moruana ndipokaumo waʼa ntau sinjoʼu napalai maoli pangkoninya ri lipu anu mosu.”

¹⁶ Paikanya ndatoʼo i Yesu ri tau seʼe, “Neʼe ndipapalai waʼa ntau seʼe, komimo anu da mampakoni tau seʼe.”

¹⁷ Mesono tau seʼe natoʼoka Sira, “Anu reʼe ri kita podo roti alima ngkomba pai bau radua mbaʼa.”

¹⁸ Mesono i Yesu ndatoʼo, “Kenika-Ku maʼi!”

¹⁹ Nepa ndapokau waʼa ntau sondo setu motunda ri ewo. Roo setu ndatima roti lima ngkomba pai bau radua mbaʼa setu, metingara Sira ri yangi, mekakai ri Pue Ala, nepa ndaripusi roti setu pai ndawaika anaguru-A mampotilaka ri waʼa ntau sondo setu.

²⁰ Mangkonimo waʼa ntau sondo setu rantani mabosu pura-pura. Roo setu njoʼumo waʼa anagurua mampasambaka yabinya, buke sampuyu pai radua bingka.

²¹ Imba ntau anu mangkoni setu alima ncowu tuama, bareʼepa ndaimba weʼa pai ananggodi.

I Yesu melinja ri wawo ue 14:22-33

²² Jaroo pinca mangkoni, ndapokaumo i Yesu waʼa anaguru-A mesindiu moduanga njoʼu ri sambote ndano. Sira bareʼepa malai sangkani-ngkani pai waʼa anaguru-A, maka ntongo mampapalai waʼa ntau sondo setu da mewalili.

²³ Tepalaimo waʼa ntau sondo setu, nepa mandake Sira ri pongku ntana mekakai ndatiria. Narata mbengimo Sira ngkalio-A ndatiria.

²⁴ Sindara setu duanga anu napeʼulaya waʼa anaguru i Yesu, lawamo ri tongo-tongo ndano. Duanga setu tetampu-tampulaka narumpa ndopo, maka duanga setu mancumboʼo ropo.

²⁵ Tinti tatogo liumo ntongo mbengi, jelamo i Yesu madadu anaguru-A. Sira melinja ri wawo ue.

²⁶ Pangkita anaguru-A Sira melinja ri wawo ue, jingki pai maeka raya ntau seʼe natoʼo, “Tumaʼi angga!” mekiu-kiu tau seʼe nakeni ngkaeka ndayanya.

²⁷ Paikanya liu-liu ndaseko i Yesu tau seʼe ndatoʼo, “Ndikarodo Yaku i Yesu. Neʼe maeka!”

²⁸ Meboo i Peturu ri Sira, natoʼo, “Pue, ane monco kojo ka-Kominya, ndipeboo yaku da kukanjoʼu madadu komi da kumelinja ri wawo ue!”

²⁹ Mesono i Yesu ndatoʼo, “Maʼimo!” Menaʼumo i Peturu ungka ri duanga melinja ri wawo ue madadu i Yesu.

³⁰ Paikanya butu naepe i mPeturu karimbo mpewui ngoyu, meratamo kaeka ndayanya, painaka montepuʼumo da tedolomaka siʼa, meboo siʼa ri Yesu natoʼo, “Pue ndipelae yaku!”

³¹ Maliga ndakekeni i Yesu palenya nepa ndatoʼoka, “Peturu! Peturu! siko tau anu kodi peaya ndayamu, wenu painaka kanuʼu-nuʼu rayamu ri Yaku?”

³² Nepa mepone tau seʼe ri duanga, liu-liu mandamo ropo.

³³ Manyomba pura-pura anaguru-A ri Sira natoʼo, “Monco kojo Komi Ana i mPue Ala.”

I Yesu mampakaʼosa waʼa ntau majuʼa ri Genesare 14:34-36

³⁴ Katowote ntau seʼi ri sambote ndano, mesonda duanga ntau seʼe ri lipu Genesare.

³⁵ Pangkita waʼa ntau ri lipu setu anu jela setu i Yesu, napobambarika ntau seʼe ri waʼa lipu sampotenginya, painaka maʼimo tau mangkeni ri Sira pura-pura tau majuʼa.

³⁶ Merapi puru waʼa ntau seʼe ri Yesu, da naka ndawai majama juba-A, mauja joenya apa; maka pura-pura tau majuʼa anu majama joe juba-A daʼosa.