Matius 13 - Sura Magali Nuntu Ngkatuwu

Nuntu mporapa tau mancawu inii 13:1-9

¹ Ri eo setu seʼe malaimo i Yesu ungka ri banua, njoʼu motunda-tunda ri wiwi ndano.

² Jelamo waʼa ntau sondo molimbu-limbu Sira, inceʼe puʼunya painaka mepone Sira ri duanga motunda njairia. Waʼa ntau sondo mekakore ri wiwi ndano.

³ Maria ngaya anu ndatotorakaka tau seʼe ri nuntu mporapa, ndatoʼo, “Reʼe sambaʼa topojamaa njoʼu mancawu inii.

⁴ Sindara mponcawunya, reʼe inii anu tudu ri wiwi njaya. Ungka lairia jela tonci mantungkusi pura-pura inii setu.

⁵ Reʼe woʼu anu tudu ri tana kewatu, anu sakodija tananya. Waʼa inii setu ronga tuwu ua pongoli tananya,

⁶ paikanya butu naindo ndeme, waʼa metinya setu montepuʼu malele rantani mangau pai mate ua bareʼe loʼuka pokalenya.

⁷ Reʼe woʼu inii anu tudu ri oyo ndui. Rui setu tuwu pai mangangkaʼuwi inii anu tuwumo rantani mate.

⁸ Paikanya reʼe woʼo inii anu tudu ri tana anu maboko. Inii setu tuwu, rantani mowua maria kojo wuanya, reʼe anu togompuyu reʼe anu onompuyu, pai reʼe anu saatu ngkani kasondonya painaka inii anu ndasawu.”

⁹ Pusa ndatuntu nuntu mporapa setu ndatoʼo i Yesu, “Komi motalinga, ndipedongeka!”

Wenu painaka i Yesu mompaguru ri nuntu mporapa 13:10-17

¹⁰ Ungka lairia maʼimo waʼa anaguru-A meoasi ri Sira ndatoʼo, “Wenu painaka Komi mompau ri nuntu mporapa ane mompau pai tau sondo?”

¹¹ Mesono i Yesu ndatoʼo, “Komi roomo ndawaika kaloʼe da maincani rahasia kono kaʼewambeʼinya poparenta i mPue Ala. Paikanya tau seʼe bareʼe.

¹² Maka tau anu reʼemo anunya, da ndarangani woʼu, pai da meruu anunya. Paikanya tau anu bereʼe anunya, sako anu reʼe sakodi ri siʼa da ndatima.

¹³ Inceʼe puʼunya painaka Yaku mompaguru ri nuntu mporapa ri tau seʼe, da naka mau napeole bareʼe da nakita, mau napedongeka bareʼe da narata ndaya.

¹⁴ Katepewalinya ewanceʼe kobanganimo anu nawati i Nabi Yesaya, ‘Ndatoʼo i mPue Ala: Tau seʼe da mampedongeka mpaliu paikanya bareʼe da narata ndaya; tau seʼe da mampeole mpaliu paikanya bareʼe naincani nunjaa anu mewali.

¹⁵ Maka nawa-nawa ntau seʼe makuyumo, talinga ntau seʼe bongomo, pai mata ntau seʼe tepobutamo. Inceʼi tepewali da naka mata ntau seʼe bareʼe mangkita, talinga ntau seʼe bareʼe madonge, nawa-nawa ntau seʼe bareʼe marata ndaya pai neʼe mewalili tau seʼe ri Yaku, painaka da Kupakaʼosa tau seʼe.’ ”

¹⁶ “Paikanya maʼai mporasimi komi,” ndatoʼo i Yesu ri waʼa anaguru-A, “maka komi yosa kojo pangkitami pai yosa woʼu padongemi.

¹⁷ Ndiendomo, maria nabi pai waʼa ntau anu mepoʼinaya ri Pue Ala da rayanya mangkita anu ndikita wawaseʼi, paikanya bareʼe nakita ntau seʼe. Da raya ntau seʼe madonge nunjaa anu ndidonge wawaseʼi, paikanya bareʼe nadonge ntau seʼe.”

I Yesu mantotoraka posoki nuntu mporapa tau mancawu inii 13:18-23

¹⁸ “Ndipedongekamo posokinya nuntu mporapa tau mancawu inii.

¹⁹ Inii anu tudu ri wiwi njaya inceʼemo waʼa ntau anu madonge nuntu kono kaʼewambeʼinya poparenta i mPue Ala paikanya bareʼe narata ndaya. Painaka maʼi i Majaʼa nayali yau nunjaa anu roo ndasawu ri raya ntau seʼe.

²⁰ Inii anu tudu ri tana kewatu inceʼemo tau anu madonge nuntu i mPue, liu-liu nasabe mawongko rayanya.

²¹ Paikanya nuntu setu bareʼe mokale ri raya ntau seʼe, painaka bareʼe ntani masae. Butu napomberataka ntau seʼe kapari bara pejeani ua nuntu setu liu-liu meuranaka tau seʼe.

²² Inii anu tudu ri oyo ndui inceʼemo waʼa ntau anu madonge nuntu setu, paikanya napoʼipu da katuwu ntau seʼe pai maʼai napampodaraya da sugi. Inceʼe puʼunya nuntu anu ungka ri Pue Ala bereʼe kasoanya da tuwu ri raya ntau seʼe, painaka bareʼe mowua.

²³ Pai inii anu tudu ri tana maboko, inceʼemo waʼa ntau anu madonge nuntu setu pai narata ndaya. Maria anu napowuaka ntau seʼe, reʼe anu saatu, reʼe anu onompuyu, reʼe anu togompuyu ngkani kamaria mbuanya.”

Nuntu mporapa lee ri oyo gandu 13:24-30

²⁴ Roo setu ndampau woʼu i Yesu sambaʼa nuntu mporapa, ndatoʼo, “Poparenta mPue Ala ndapaporapaka ewa tau anu mancawu inii anu maʼoe ri jamaanya.

²⁵ Butu mawengimo, ntongo ngkayore tau jelamo iwali ntopojamaa setu mancawu lee ri oyo gandu nepa napalaika.

²⁶ Katuwu gandunya madago kojo, paikanya tuwumo woʼu lee sangkani-ngkani pai gandu; ri powuanya nepa tongawa anu mbeʼi gandu pai anu mbeʼi lee.

²⁷ Njoʼumo to potetala ri jamaa setu ri tumpu njamaa natoʼo, ‘Anu ndisawu ri jamaami inceʼemo inii anu maʼoe, paikanya sinjau maria lee anu tuwu sangkani-ngkani pai gandu, bara ungka rimbeʼi kamaʼinya lee setu?’

²⁸ Mesono tumpu njamaa setu, ‘Incetu powia iwali.’ Ungka lairia napeoasi woʼu waʼa ntopotetala nto pojamaa setu, ‘Ndipokono da njoʼu karabusi waʼa lee setu?’

²⁹ Mesono tumpu njamaa natoʼo, ‘Neʼemo ndirabusi, boi kono pai gandu ndirabu.

³⁰ Ndipapaliukamo naka tuwu sangkani-ngkani rantani rata ri tempo mpomota, nepa da kutoʼoka tau momota, da ndipatani lee, nepa ndipasambaka roo setu nditunju, paikanya gandu da ndipasambaka mpodago nepa ndipariala.’ ”

Nuntu mporapa wuku nambo 13:31-32

³¹ Ndapau woʼu i Yesu sambaʼa nuntu mporapa ri tau sondo ndatoʼo, “Ane i Pue Ala moparenta, katedikanakanya ewa nuntu mporapa seʼi: Natima ntau sambaʼa saogu wuku nambo napomuya ri jamaanya.

³² Wuku nambo inceʼemo wuku mpinamuya anu maʼai kakodinya, paikanya ane tuwumo, siʼamo anu meruu kabangkenya ri oyo waʼa mpinamuya anu ntaninya ri tongo njamaa setu. Siʼa mewali puʼu ngkaju bangke painaka jelamo waʼa ntonci mosea ri raʼanya.”

Nuntu mporapa ragi 13:33

³³ Sambaʼa woʼu nuntu mporapa ndapau i Yesu ri tau sondo, ndatoʼo, “Ane i Pue Ala moparenta, katedikanakanya ewa ragi anu natima mbeʼa sambaʼa nepa natato pai tarigu opompuyu literi rantani mewoke pura-pura!”

Wenu painaka i Yesu mompaguru ri nuntu mporapa 13:34-35

³⁴ Pura-pura pompaguru i Yesu ri tau sondo, ndapau ri nuntu mporapa.

³⁵ Ua ewanceʼe kobanganimo wati nabi, anu mantoʼo, “Ri nuntu mporapa da pompau-Ku pai tau seʼe; da mampetumbuka tau seʼe waʼa anu tesambuni montepuʼu ungka ri pampapewali lino seʼi.”

I Yesu mantotoraka kono nuntu mporapa lee ri oyo gandu 13:36-43

³⁶ Ungka lairia ndapalaika i Yesu waʼa ntau sondo setu mesua Sira ri raya banua. Butu tepalaimo waʼa ntau sondo setu, maʼimo anaguru-A madadu Sira natoʼo, “Nditotorakaka kami nunjaa posokinya nuntu mporapa lee ri oyo gandu setu.”

³⁷ Mesono i Yesu ndatoʼo, “Tau anu mancawu inii anu maʼoe setu inceʼemo i Ana Manusia.

³⁸ Jamaa inceʼemo lino seʼi, inii anu maʼoe inceʼemo waʼa ntau anu mewalimo tau i mPue Ala; lee inceʼemo waʼa ntau anu nakuasai i Majaʼa.

³⁹ Iwali anu mancawu inii inceʼemo i Majaʼa; tempo mpomota inceʼe Eo Kiama; tau momota inceʼemo waʼa malaʼeka.

⁴⁰ Ewa ndapampasambaka lee nepa ndatunju, ewanceʼemo da pewalinya ri Eo Kiama.

⁴¹ I Ana Manusia da mampokau waʼa malaʼeka da mamparuru pai mampasambaka waʼa ntau masalaa pai anu majaʼa powianya ungka ri oyo waʼa ntau-A.

⁴² Nepa da ndataji waʼa ntau setu ri apu bangke, njairiamo kareʼe mpotumangi pai kakakeʼi-keʼi ngisi.

⁴³ Nepa da ndapapeawa waʼa ntau anu malulu pepokono i mPue Ala, tau seʼe da merara ewa reme ri Lino Dawoʼu mPue Ala, Papa ntau seʼe. Mewali, isema anu motalinga pedongeka!”

Nuntu mporapa aga-aga anu tesambuni 13:44

⁴⁴ “Ane i Pue Ala da moparenta, katedikanakanya ewa porapa seʼi: Reʼe aga-aga anu tesambuni ri raya ntana, nepa narata ntau sambaʼa, nepa nawali ntana muni njairia. Roo setu nakeni ngkawongko ndayanya, malai tau setu njoʼu napobalu aga-aganya pura-pura, nepa mewalili siʼa naoli tana setu.”

Nuntu mporapa matia anu madolidi 13:45-46

⁴⁵ “Ane i Pue Ala da moparenta, katedikanakanya ewa porapa seʼi: Reʼe sambaʼa to pobalu-balu anu mampepali waʼa matia anu masuli olinya.

⁴⁶ Butu naratamo saogu matia anu maʼai kojo kadolidinya, ganggara kanjoʼunya mampobalu pura-pura aga-aganya, olinya naolika matia anu saogu setu.”

Nuntu mporapa jala 13:47-50

⁴⁷ “Ane i Pue Ala da moparenta, katedikanakanya ndapaporapaka ewa jala anu ndatende ri rano, nepa ndaleʼo mpengaya-ngaya bau.

⁴⁸ Butu bukemo jala setu nanoʼo nto pojala, jala setu ri karatana. Nepa motunda tau seʼe mampatani waʼa bau setu: Anu madago ndakoni ndapari ngkaranji pai anu bareʼe madago ndatajika.

⁴⁹ Ewanceʼemo woʼu da pewalinya ri Eo Kiama, da maʼi waʼa malaʼeka da mampatani waʼa ntau anu majaʼa powianya ungka ri oyo ntau anu mawianaka pepokono i mPue Ala.

⁵⁰ Roo setu tau anu majaʼa powianya da ndataji ri apu naraka, njairiamo kareʼe mpotumangi pai kapari.”

Aga-aga anu masae pai anu dawoʼu 13:51-52

⁵¹ Ndapeoasi i Yesu ri waʼa anaguru-A ndatoʼo, “Bara ndirata ndayamo?” Mesono tau seʼe, “Karata ndayamo!”

⁵² Nepa ndatoʼo i Yesu, “Inceʼe puʼunya waʼa guru agama anu mewalimo tau i mPue Ala, tau seʼe siwiamo ewa tumpu banua anu mampapesuwu pura-pura aga-aganya anu masae pai anu dawoʼu ungka ri kareʼenya.”

I Yesu bareʼe natarima nto Nasare 13:53-58

⁵³ Roo ndatotoraka i Yesu waʼa nuntu mporapa seʼe,

⁵⁴ malaimo Sira njoʼu ri lipu-A. Kajela-A ri lipu Nasare, njoʼumo Sira mompaguru ri banua mpekakai ntau seʼe; jingki raya ntau seʼe madonge pompaguru-A, pai napantoʼo, “Ungka ri mbeʼi paratanya loʼe pai kuasa anu ewancetu? Pai ungka ri mbeʼi paratanya kuasa mantuju anu ndapojingki?

⁵⁵ Ara banya siʼa seʼi ana mpande kaju, inenya i Maria toʼonya, pai waʼa ngkasangkomponya anu tuama i Yakobu, i Yusupu, i Simo pai i Yudasi?

⁵⁶ Pai waʼa ngkasangkomponya anu weʼa woʼu paka reʼesi ri oyota? Ungka ri mbeʼi paratanya pura-pura paincani setu?”

⁵⁷ Bareʼe natarima ntau seʼe i Yesu. Paikanya mompau Sira ndatoʼo, “Sambaʼa nabi ndatubunaka ri mbeʼi-mbeʼi kanjoʼunya, paikanya bareʼe da ndatubunaka ri lipunya pai ri banuanya.”

⁵⁸ Ua bareʼe naaya ntau seʼe i Yesu, inceʼe painaka bareʼe maria tanda ngkuasa anu ndapowia njairia.