Markus 6 - Sura Magali Nuntu Ngkatuwu

I Yesu bareʼe natarima nto Nasare 6:1-6a

¹ Ungka lairia melinjamo i Yesu pai waʼa anaguru-A njoʼu ri lipu mpearia.

² Ri eo Umapo montepuʼumo i Yesu mompaguru ri banua mpekakai. Maria tau anu tepasambaka njairia. Ri padonge waʼa ntau setu pompaguru i Yesu maʼai kajingki ndayanya, natoʼo ntau seʼe, “Ungka ri mbeʼi parata ntau seʼi pura-pura setu? Ewambeʼi kojo kaloʼenya tau seʼi? Wenu pai napangkoto mampowia waʼa anu ndapojingki?

³ Ara banya siʼa ana mpande kaju, ana i Maria, siʼa sangkompo pai i Yakobu, i Yose, i Yuda pai i Simo? Monco kojo sako waʼa ngkasangkomponya anu weʼa reʼe ri oyota seʼi.” Inceʼemo puʼunya painaka bareʼe natarima ntau seʼe Sira.

⁴ Ndatoʼo i Yesu ri tau seʼe, “Lawinya sambaʼa nabi ndatubunaka ri mbeʼi-mbeʼi, podo ri lipunya pai ri oyo waʼa ngkasangkomponya pai waʼa ntinanya, siʼa bareʼe ndatubunaka.”

⁵ Njairia bareʼe ndapokono i Yesu mampowia mau sangaya tanda ngkuasa anu ndapojingki. Reʼe yau bara tesangkuja tau majuʼa anu ndadonco tanoananya ndapakaʼosa.

^6a Benge raya-A mangkita kabareʼenya meaya waʼa ntau seʼe.

I Yesu mampokau anaguru-A sampuyu pai radua 6:6b-13

^6b Ungka lairia malaimo i Yesu ri waʼa lipu anu sampotenginya mompaguru.

⁷ Ndapeboo anaguru-A sampuyu pai radua, nepa ndapokau tau seʼe teraradua tau, tau seʼe ndawaika kuasa da mangairi inosa majaʼa.

⁸ Ndatotoraka tau seʼe ndatoʼo, “Neʼe ndikeni bara nunjaa-njaa ri pelinjami, podo toko maya ndikeni. Neʼe ndikeni pangkoni bara watutu ntau merapi-rapi, bara doi.

⁹ Ndipotalupa pai neʼe radua banju ndikeni.”

¹⁰ Ndatoʼo woʼu, “Ane mepone komi ri banua ntau, njairiamo da kareʼemi neʼe melimba-limba rantani ndipalaika kota setu.

¹¹ Paikanya ane rata komi ri sambaʼa lipu anu bareʼe napokono waʼa ntaunya mantarima komi pai bareʼe woʼu napokono mampedongeka pompagurumi, da ndipalaika lipu setu, da nditanongkosi awu anu metaka ri witimi da mewali sambaʼa petondoni da napaincani ntau ri lipu setu!”

¹² Malai kojo anaguru-A anu sampuyu pai radua setu. Tau seʼe mampobambarika da naka pura-pura tau da majea pai naponcosoi waʼa ncalaanya.

¹³ Waʼa anaguru i Yesu setu mairi maria inosa majaʼa, magereka lana ncaitu ri tau majuʼa da mampakaʼosa tau setu.

Kapate i Yohane Topopariu 6:14-29

¹⁴ Waʼa bambari kono pura-pura anu mewali setu tedongemo woʼu ri Mokole Herode. Maka toʼo i Yesu, lawi tetoʼomo ri mbeʼi-mbeʼi. Reʼe tau mantoʼo, “I Yohane Topopariu wali ngkatuwu! Inceʼe pai napangkoto mampowia anu napojingki ndaya ntau.”

¹⁵ Paikanya reʼe tau ntaninya mantoʼo, “Sira i Elia.” Reʼe woʼu anu mantoʼo, “Sira nabi, ewa sambaʼa nabi anu tuwu ntongo i pua.”

¹⁶ Ri padonge i Herode bambari seʼe, natoʼo, “Manoto kasiʼanya i Yohane Topopariu, anu kupokau ndapewoʼoki owi!”

¹⁷ Maka i Herode seʼi anu mampokau tau mancoko i Yohane nepa napari ntarunggu. Powia i Herode setu mopuʼu ri pamporongonya eranya i Herodia rongo ntuaʼinya i Pilipu.

¹⁸ Poʼengko i Herode ewanceʼe, papongkani-ngkanimo napatujuki i Yohane, natoʼo, “Bareʼe sintinaja siko Herode mamporongo rongo ngkasangkompomu setu.”

¹⁹ Inceʼe puʼunya painaka makodi kojo raya i Herodia ri Yohane, da rayanya mampepate paikanya bareʼe nakoto mawianaka ua napetangani i Herode.

²⁰ Maeka raya i Herode ri Yohane, maka naincani i Herode, i Yohane seʼi tau mayoa pai ndaposuro i mPue Ala. Napokau i Herode tau da majagai mpodago i Yohane ri raya ntarunggu. Lawi napokono woʼu i Herode mampedongeka potuntu i Yohane, mau maria ngkani jamarangani kasusa ndayanya.

²¹ Kapusa-pusanya narata i Herodia akala ri sindara mpoharijadi i Herode. Ri tempo setu napeboo i Herode waʼa ntau bangke ri poparentanya, waʼa ntadulako ncurodado, pai waʼa ngkabosenya ri Galilea.

²² Ri posusa setu napokau i Herodia ananya anu weʼa da motaro pai potaronya setu, mampakawongko raya i Herode pai waʼa linggonanya. Pai napantoʼo i Herode ri ana weʼa setu, “Nunjaa anu nupokono perapimo, sangaya-ngaya da kuwaika siko.”

²³ Mojanjimo i Herode ri ana weʼa setu pai montandokoro natoʼo, “Nunjaa ntano anu nuperapi da kuwaika siko, mau santila ri poparentaku nuperapi, sangaya-ngaya da kuwaika siko!”

²⁴ Mesuwu ana weʼa setu madadu inenya napeoasi, natoʼo, “Ine, nunjaa kalesenya anu da kuperapi?” Mesono inenya natoʼo, “Perapimo woʼo i Yohane Topopariu.”

²⁵ Mewalili muni ana weʼa setu ri Herode, natoʼo, “Anu kuperapi inceʼemo woʼo i Yohane Topopariu, da ndiwaika yaku seʼi seʼe da ndaʼulaya ri baki!”

²⁶ Maʼai kasusa ndaya i Herode madonge perapi setu. Paikanya bareʼe nakoto mancapu perapi setu maka roomo montandokoro ri suara waʼa linggonanya.

²⁷ Jamo nasongka sambaʼa topojaga da loʼu mantima woʼo i Yohane Topopariu. Loʼumo surodado setu mampewoʼoki i Yohane.

²⁸ Nakenimo woʼo i Yohane naʼulaya ri raya baki natonjuka ana weʼa setu. Nakabemo ana weʼa setu nepa njoʼu nawawaka inenya.

²⁹ Butu nadonge waʼa anaguru i Yohane pewalinya ewanceʼe, loʼumo tau seʼe mantima watangkoronya napotaumate.

I Yesu mampakoni tau alima ncowu 6:30-44

³⁰ Mewalilimo waʼa anaguru anu ndapokau i Yesu, sangkani-ngkani muni pai Yesu. Napetumbumo ntau seʼe ri Sira kono pura-pura anu napowia pai anu napaguruka tau.

³¹ Nakeni ngkaria ntau anu madadu i Yesu saʼe mewalilimo saʼe ntongo ngkarata, painaka bereʼe tempo i Yesu pai waʼa anaguru-A da mangkoni. Pai ndapantoʼo i Yesu ri anaguru-A, “Ndikaligamo tapalai ri tana soa, naka tepatani kita pai komi woʼu da meosa sarai.”

³² Moduangamo tau seʼe njoʼu ri tana soa, ri kabareʼenya reʼe tau.

³³ Paikanya palai ntau seʼe nakita ntau, pai waʼa ntau anu ungka ri kota ri daera setu maincani ri mbeʼi kanjoʼu ntau seʼe. Molonco waʼa ntau setu malulu karatana mampesindiuka i Yesu pai waʼa anaguru-A.

³⁴ Ri tempo mpenaʼu i Yesu ungka ri duanga, ndakita tau sondo. Merata puru ndaya-A ri tau seʼe maka tau seʼe ewa bimba anu bemoreʼe topongkambinya. Ndatepuʼu mampaguruka anu maria ngaya ri tau seʼe.

³⁵ Ngkinowiamo, natoʼo anaguru-A ri Sira, “Da mawengimo, pai tana seʼi tepatani.

³⁶ Moruana ndipokaumo waʼa ntau seʼi napalai ri waʼa lipu anu mosu da napangaoli pangkoninya.”

³⁷ Paikanya mesono i Yesu ndatoʼo, “Komimo anu damampakoni tau seʼe!” Mesono waʼa anaguru-A natoʼo, “Ara da malai kami njoʼu maoli roti anu olinya radua atu doi salaka anu da ndapakonika tau seʼi.”

³⁸ Nepa meoasi i Yesu, ndatoʼo, “Koisa ndipeole bara sangkuja roti anu ndikeni?” Karoonya napeole ntau seʼe natoʼo, “Reʼepa yau alima ngkomba roti pai bau radua mbaʼa.”

³⁹ Nepa ndapokau i Yesu pura-pura tau setu da motunda motobu-tobu ri pada.

⁴⁰ Motundamo kajo waʼa ntau setu, satobu-satobu modede mpodago. Reʼe anu saatu tau satobu reʼe anu limampuyu tau satobu seʼe.

⁴¹ Roo setu ndatima i Yesu roti alima ngkomba pai bau radua mbaʼa, metingara Sira ri yangi, mekakai Sira ri Pue Ala. Roo setu ndaripusi roti alima ngkomba nepa ndapokau waʼa anagurua mampotilaka, ewanceʼe seʼe bau ndapotilaka ri tau seʼe pura-pura.

⁴² Mangkonimo tau seʼe rantani mabosu.

⁴³ Roo setu napasambaka anagurua yabi mpangkoni ntau seʼe, buke sampuyu pai radua bingka.

⁴⁴ Imba ntuama anu mangkoni setu tempo-temponya alima ncowu tau kasondonya.

I Yesu melinja ri wawo ue 6:45-52

⁴⁵ Roo setu liu-liu ndapokau i Yesu anaguru-A da mesindiu moduanga njoʼu ri lipu Besaida ri sambote ndano, sindara Sira mampokau tau sondo setu mewalili.

⁴⁶ Butu tepalaimo tau sondo setu, mandakemo i Yesu ri pongku ntana ndeku mekakai.

⁴⁷ Butu mawengimo waʼa anaguru-A anu moduanga ngena ntongo mposumomba ri tongo ndano, pai i Yesu ntongo njaupa ri karatana.

⁴⁸ Ndakita maparimo naepe ntau seʼe mowose maka mancumboʼo ropo ungka ri dulungi. Inceʼe puʼunya painaka ri oyo tinti tatogo pai tinti aono mowuro Sira madadu tau seʼe melinja ri wawo ue. Sira melinja mpaliu ewa da maliunaka tau seʼe.

⁴⁹ Ri pangkita ntau seʼe Sira melinja ri wawo ue nasarumaka ntau seʼe Sira angga,

⁵⁰ painaka kumiji tau seʼe maeka kojo rayanya. Maka pura-pura tau seʼe mangkita Sira, pai maʼai kajingki ndayanya. Liu-liu ndaseko i Yesu tau seʼe, ndatoʼo, “Ndikarodo! Yaku i Yesu, neʼe maeka!”

⁵¹ Nepa mepone Sira ri duanga, meʼontomo ngoyu. Jingki kojo raya waʼa anaguru-A.

⁵² Tanda ngkuasa alima ogu roti setu bareʼepa woʼu narata ndaya ntau seʼe. Mapari da naparata ndaya ntau seʼe.

I Yesu mampakaʼosa waʼa ntau majuʼa ri Genesare 6:53-56

⁵³ Katowote ntau seʼe ri sambote ndano, mesonda duanga ntau seʼe ri wingke Genesare.

⁵⁴ Ri penaʼu ntau seʼe ungka ri duanga, nakita waʼa ntau, anu jela setu i Yesu.

⁵⁵ Inceʼe painaka molonco-lonco tau seʼe ri samalele ntana setu, montepuʼumo tau seʼe mangkeni waʼa ntau majuʼa ndaokotaka pai alinya nakeni ri Yesu. Ane nadonge ntau seʼe i Yesu njau ri sambaʼa lipu nawawa ntau seʼe tau majuʼa njairia.

⁵⁶ Ri mbeʼi-mbeʼi ntano kajela i Yesu ri lipu, ri kota bara ri desa ntano, jela tau seʼe mangkeni waʼa ntau majuʼa ri tana lapa. Nepa naperapi ntau seʼe da naka neʼe ndapetangani i Yesu waʼa ntau majuʼa setu da maisu juba-A, mauja joenya apa. Pura-pura tau majuʼa anu maisu juba i Yesu, daʼosa juʼanya.